話說曉曉十個月大時，Dora同Daisy已經嚟到我哋屋企，邊個嚟既？佢哋係一對孖女洋娃娃bb，當年新年時嫲嫲話要買玩具俾曉曉，我哋帶佢去玩具反斗城，曉曉bb親自揀咗呢兩個同佢都一樣係bb既娃娃~本身孖女有套類似睡衣/家居服既衫，呢段日子玩呀玩，套衫即使再洗都好殘舊~

曉曉@10m，與新簇簇的孖妹之一~

後來到曉兩歲生日時，找請公公婆婆買咗一set替換衫俾兩個「曾孫女」，其實當時兩歲曉都唔識幫佢哋換衫，嗰套替換衫基本上都係我玩既，呵呵，反而而家差唔多五歲就幫佢哋換得好叻了~

曉曉@兩歲生日，箭嘴指住既就係Dora同Daisy既衫衫了~

呢段抗疫停課日子，個口成日好悶(屋企自己煮飯煮得太多，好想食啲味精同埋好多肉)，兩個小朋友更加日日都好悶，困住係屋企冇乜得點去街~媽媽好努力諗下有咩玩有咩搞作，事關我啲手作仔真係唔多擅長~但我真係唔知點解，忽然諗到要幫Dora親手整套衫~其實唔係全無道理既，我當時既思路係，曉有套Hello Kitty磁石換衫玩具，不如幫Kitty整啲新衫–>唔得閒去文具鋪，睇下HKTV mall有冇大張磁石，搵唔到–>屋企有咩材料–>有啲打算放入回收箱既舊衫未處理–>索性就地取材整下嘢~估唔到曉反應好熱烈，平時chur住要我陪佢玩既，都放我去整衫俾Dora，仲以熱烈既眼神期待住成品添~

大家可能會問，點解淨係整俾Dora唔整俾Daisy呢？話說因為孖女一樣樣，爸爸為咗可以分辨兩個「孫女」，就幫Daisy個腳板底紋咗個「s」字，自此曉就偏心了，然後將Daisy過繼咗俾詩詩^^”，基本上而家只有Dora係曉曉個女囉~

我係唔要既舊衫之中搵到一條粉紅色紗裙，設計靈感就嚟啦，用lace部份做裙，用粉紅色布料做衫，再用lace做衫袖~以前家政堂學既嘢大派用場，不過笨手即是笨手，總之唔係太精美囉，做娃娃既裙都可以接受既，但應該唔洗得，可能放入洗衣機轉一轉就會散~星期六嗰日係屋企縫縫縫，去嫲嫲屋企食晚飯又帶埋去縫縫縫，曉實在太期待，當我話整唔切要第二日再繼續時仲喊添~

我縫縫縫時，佢再幫Dora串條頸鍊，成set就好華麗啦~

差一隻袖就完成了~

第二朝終於完成埋另一隻袖﹗

Dora個頭太光，要加啲頭飾，幫佢整埋個蝴蝶結髮帶，好靚呀~

曉話：「你咁細個就著公主裙，好似百日宴咁﹗」哈哈，又俾你諗到~

曉：你自己同佢影一張啦﹗你整家嘛~

既然材料多得很，整個蝴蝶結又咁簡單，就整多一個俾曉啦，等佢哋有母女裝，yeah~

衫後面我用魔術貼，可以俾Dora穿脫，但因為張魔術貼係係日本城買而唔係縫紉用品店買，魔術貼背後係膠紙，但黏貼布料唔夠實，問題就嚟喇，我用針線將魔術貼釘實，但支針穿過魔術貼時，黏咗好多膠係支針上面，搞到寸步難移又黐立立，我求其釘下衫嗰六張魔術貼先，其他慢慢搞啦~

Comments

comments