曉讀到K.2，意味住今年我哋第三年挑戰幼稚園一人一花了，第一年好快死咗既黃時鐘花，到第二年醜樣得嚟總算開過花既一串紅(請參閱：17-1-2019：幼稚園一人一花之我家的一串紅)，今年既挑戰者(嚟我哋屋企居住而要掙扎求存係對花既挑戰)係—-洋鳳仙~

第一次開花時既洋鳳仙~

舊年未用晒既泥仲有係度，既然一串紅已死，用番同一個盆就ok了，所以洋鳳仙抵達頭幾日就可以搬屋入去比較寛敞既新居~移植咗幾日都生得穩陣了，我哋同樣放係廚房出面既位置，優點係每日下晝會有陽光，缺點係嗰個位置非常當風，唔知你可唔可以適應得到呢？

話說種咗一段時間之後，有一晚天氣轉涼，特別大風，第二朝發現大—-件—-事—-﹗屋企，遍地風沙﹗﹗﹗原來大風吹倒咗洋鳳仙，然後大風將啲泥土吹到成屋都係﹗地板係泥、地墊係泥、玩具係泥，周圍都係泥~兩件事要緊急處理，兩個小朋友起身之前要清理一地泥，同埋要救番棵洋鳳仙呀，唔知佢倒下咗有幾耐，總之有啲枯萎既感覺，即刻幫佢加番啲泥同淋番啲水~不幸中既大幸係，出事當天係假日，我哋可以有時間整理災場~而隔咗幾個鐘之後，有好消息呀，洋鳳仙復活了~太好啦~

命大既洋鳳仙隔咗一兩個星期之後仲開花添~到而家都叫做開咗有三四輪花lu，全盛時期最多開過六朵呀﹗開咗第一朵時我好高興咁叫曉捧住盆花影咗張相，send咗去家長group，先知道人哋唔單止開咗花，仲要好茂盛好大棵，啲花好大朵囉~

當人哋啲花好大棵時，我哋既洋鳳仙出既新葉越嚟越細塊，距離要帶棵花返學校交功課既日子仲有兩星期，我決定要買肥料俾佢谷一谷，之前冇刻意施肥，洗米時倒少少洗米水俾佢，煮雞蛋時又送少少蛋殼咁咋，但真係太瘦弱要補一補~係日本城買咗綜合肥料，交功課前叫做滴到兩次，葉唔見得大塊咗，但睇落新開既花又好似鮮色咗既，係咪有少少用？

K.1時既一串紅到交功課時都冇死到，但因為大醜樣，我同曉都一致決定唔帶番學校，今次其實都麻麻地靚架咋，但都帶番返去~路上見到N班到K.3既洋鳳仙燕瘦環肥，睇嚟唔同既栽種條件都好影響結果，而大家用既花盆有大有細，而結果棵花既大細好似都好同居住空間有關，我哋嗰棵種極都唔大可能都係因為個盆太細囉~

原來帶咗返學校就會自動進入投票活動，自己班既同學投票選出「我最喜愛的洋鳳仙」，小朋友既選擇好明顯同大人既選擇唔一樣，我哋既少少醜樣洋鳳仙居然都有兩票，兩票都係曉既友情票—-來自佢既兩個好朋友~之前講過好大棵又好靚既居然唔係得到no.1喎，聽曉講，有個同學個花盆裝飾得好靚結果得到好多票數，哈哈，變數真係好多~

活動結束拎咗盆花番嚟，可以繼續種，究竟下一棵「一人一花」來到之前，你仲撐唔撐得住呢？加油﹗

Comments

comments