崇拜結束之後，我哋又重新組隊繼續行程，爺爺嫲嫲想午飯之前返酒店稍稍休息，而我哋仲係精力充沛，而午飯前既少少時間，要唔要嘗試滿足小朋友們既心願，去坐酒店旁邊既泉州之眼摩天輪呢？
我哋返酒店會合穎彤表姐佢哋又再次出發了~
一直落住毛毛細雨，我幫曉曉著好雨褸，呢件Elsa雨褸係今次旅行前專登新買架，因為佢著咗兩年嗰件麵包超人已經唔啱著lu，而家輪到詩詩著啦~因為落雨，為免佢哋太失望，我哋都為小朋友做好心理準備，同佢哋講，落雨既話摩天輪未必開門架~
等爸爸去買飛…
結果嘛，摩天輪係有開門，但我哋冇成功坐到摩天輪，why？原來賣飛嗰個人去咗食飯﹗﹗居然係荒天下之大謬既原因~但點解摩天輪可以繼續運作呢？原來運作個摩天輪嗰個人仍然當值中，即是，如果你本身已經有門券，或者用電子支付嚟買門券，咁就可以玩喇，但唔知點解我哋嗰一刻個we chat pay同支付寶都唔work，買唔到飛就冇得玩了~爸爸去處理門票時，我就不停解釋俾啲小朋友聽咩事，摩天輪下方有個小遊樂場，包括滑梯同埋沙池嗰啲咁，都幾吸引，其實有個半遮住既屋頂，但因為落雨啲沙都好濕，我又要解釋俾佢哋聽點解唔可以入去玩…其實都唔係唔可以玩，不過全部人玩完要返酒店沖涼囉，似乎呢一刻唔係合適既時間(突然發現我變成老餅了<–day話「老餅」呢個詞語都好老餅，我同意)~
雖然冇得坐摩天輪有啲失望，但好快呢個低落既心情就過去了，因為商場嗰邊仲有好多嘢玩呀~我哋玩咗碰碰車同埋小火車~
就係呢啲碰碰車啦~
小車手試車中
呢啲商場既遊樂設施既優點同埋缺點都係冇乜規管，唔理你個小朋友幾大個，只要隻腳夠長就可以揸車，而且亦冇明確既遊玩範圍，平台內駛到過去既好似都可以駛過去，重點係，其實個平台有好多其他客人行來行去~
因為詩詩隻腳唔夠長，所以我隻咗隻腳俾呢個瘋狂駕駛員，無預警，不停轉彎，我唯一可以控制既就係唔俾油(電)，所以先可以刹停架車，有必要時我會搶番個軚盤，但詩詩司機就會表現不滿，為咗我哋同行人既命仔都冇辦法啦~講到好恐怖咁，其實車速都唔太快既~
瘋狂駕駛員詩詩
曉雖然夠腳長，但就唔係太識自己揸車，可能對於佢嚟講，一直都以為揸車係不停轉個軚盤吧，唔太理解手同腳既用途有咩唔同~
曉與穎彤
玩完碰碰車就跳上旁邊既小火車啦~
day同sandy嫲嫲冇坐，幫我哋影相~
每個小朋友座位都有呔盤，唔駛爭~
出發lu，byebye~
坐咗小火車係商場外面兜一圈先知道原來仲有其他遊樂設施玩，同埋見到有好多食肆，包括國際連鎖店~
玩埋小火車我哋差唔多要搵食了，收到通知，自助餐聚會取消了，但大舅公大舅婆、爺爺嫲嫲會過嚟join我哋一齊食~
猜樓梯都可以玩一餐~
好大但又冇乜人既商場~
我哋陪小朋友玩緊遊戲時，sandy嫲嫲去咗探路，原來商場地庫有個超大美食廣場，呢幾日食得餐餐肚滿腸肥，有美食廣場非常好，可以鍾意食多就食多，食少就食少嘛~
其實個美食廣場仲有得現煮游水海鮮，好抵又肥美呀，不過呢幾日食得太多嘢，都係俾腸胃休息一下好啲~
夾公仔見得多，居然有夾龍蝦﹗﹗夾到仲可以存放係鋪頭，等你有一兩日時間邀請親朋好友一齊嚟品嚐~
我哋冇試到既游水海鮮~
都叫做試咗好多美食呀，印象最深刻既有三色生煎包，除咗白色既平常豬肉餡之外，橙色既係新蝦餡，綠色既係薺菜餡，三款都咁好味~
曉食緊橙色生煎包，考下你，即係咩味呢？
另外又食咗啲湯麵呀雲吞呀炒飯咁，仲有糖水紅豆粥添，結果都唔係食得太輕盈，哈哈~呢餐我食得少少狼狽既係，詩詩掛住瞓覺唔食飯，我要抱住佢食，不過肉體辛苦，其實顧少一個反而食得輕鬆啲，冇錯呀，所以我哋留起咗啲麵同生煎包，等詩詩瞓醒食囉~
爸同曉食飽咗，係美食廣場附近逛一逛，影咗啲我冇見過既嘢~
出發遊覽下晝既景點之前，我哋中間既時間去咗拜訪大舅父大舅母屋企，詩詩瞓醒可以有個安定既位置食午餐，我哋亦度過咗輕鬆愉快既時光~
好大個陽台，景色好開揚~
詩詩歎麵，我歎茶~
大舅父大舅母不停供應大家水果同埋零食，最開心梗係啲細路啦，食零食先發現詩詩最唔怕辣同埋乜都肯試，福建海產多，所以有好多甚麼魚乾魷魚乾嗰啲嘢，小辣既佢都食到﹗另外曉原來好鍾意啲「鹹濕嘢」，有種類似話梅條既東西，佢非常鍾意食，大舅公成樽送咗俾佢，被曉譽為「福建最好食既嘢」，真係好搞笑~另外咁啱大舅父屋企有好多橙喎，大舅母切咗啲橙出嚟，但大家掛住玩UNO唔想整污糟隻手嚟食，day傳授咗大舅母碌橙搣橙法，令大舅母非常驚異，活咗大半子都唔知道有咁容易搣橙既方法，跟住佢哋搣咗好多粒出嚟，多到食唔晒，哈哈~
大家愉快地玩UNO~
至於我呢，發現咗燕騰既房間有部鋼琴，仲有本四手聯彈既琴譜，我就請求佢陪我彈一曲，係咪好難拒絕長輩既請求呢，我都唔想欺負你，但呢啲機會好少有丫嘛~呵呵~
時間差不多，我哋要出發去下一個景點啦，大個既小朋友都要係車上瞓一覺了~
待續
前往其他中國旅遊blog