29-12-2019:熱鬧非凡福建探親觀光團day 3(part 1).法石堂的主日崇拜

day 3適逢係星期日,當然一齊去參加主日崇拜啦,崇拜九點鐘就開始,好在地點離酒店非常近,只係幾分鐘車程,即使先一晚玩到好夜,第二朝都唔需要太太太早起身既~兩個表姐要趕功課,所以今日早上出動既人馬就只有爺爺嫲嫲姑媽同埋我哋四個喇~本來我都唔係好知道法石堂同我哋既連繫係邊一方面,直至去到主日學嗰邊碰到表嫂先「哦」一聲~

泉州市基督教法石堂

我哋去到法石堂時,跟住指示上去教堂,其實途中都有教友告知,地庫嗰邊有小朋友既崇拜,當時我都冇諗過帶兩個小朋友去,因為我知道佢哋實要黐住我嘛,又言語不通,肯定唔肯自己留低~

上到去教堂,非常安靜~

我哋坐低冇幾分鐘崇拜就正式開始了~

讀經、講道、祈禱會以普通話同福建話雙語進行,而詩歌就全部都係福建話~即使我做得到即時傳譯都冇可能令曉詩保持趣味兩個鐘,人哋咁靜我又陪佢哋玩又唔太好,今日又冇準備娛樂袋,我決定帶佢哋出去外面~

周圍影下相,睇下嘢時,慢慢就發現到兒童崇拜既地點~好熱鬧~原來由1-2歲既bb到小學高年級既年紀都有~我哋一去到,表嫂就見到我哋就好熱情咁招呼我哋,原來今日剛剛係三個月一次既生日會,有得食有得玩~係一個大既空間度,一張張枱圍住咗中心既位置,每張枱都可以坐幾個小朋友,枱面有大量零食同飲品,可以一邊食一邊睇出面既節目,個feel有啲似古裝宮廷片既嗰啲宴會咁~

非常豐盛既宴會桌~

因為家長可以陪,所以曉詩雖然有少少緊張,但都樂意留低~平時我實在唔會俾佢哋一次過食咁多零食,我准許佢哋每人各揀一款脆脆零食,之後可以任食既就只有水果了,其實都好好丫,有蕃茄仔、沙糖桔、棗子,都好豐富呀~

零食

水果

我心裡面有啲不安既係,中午本身約好食自助餐,但而家食咗咁多立雜嘢咁點算丫…你要知道,除咗佢哋兩個食飽咗之外,好明顯,佢哋食開咗又食唔晒嗰啲都係我執手尾,即是連我都食飽咗﹗

敬拜環節,詩詩好投入喎,因為唱緊讚美之泉既「活出愛」,投入係因為聽到熟悉既歌吧?

一邊食食食既期間,出面就有各式各樣既活動,好似唔同級別既小朋友輪流表演啦,有啲唱歌跳舞,其中有一組係朗誦新詩,好特別~

唱歌跳舞~有啲小朋友其實同曉差唔多大咋~

朗誦新詩

另外又有玩遊戲時間,有個動物版既廚師上菜,啲小朋友玩得好興奮,曉就唔係太睇得明~

切生日蛋糕時間,表伯娘抱高詩詩俾佢參與~

食食食食食~

呢啲係主日學小朋友既「貨幣」,佢哋活躍參與可以「賺錢」,啲錢可以用嚟換禮物架~曉詩當然冇錢啦,不過燕騰表姐同佢自己既錢嚟換咗兩個小禮物送咗俾曉詩~多謝丫﹗

食到飽咗,又唔係好知出面做緊咩,兩個小朋友開始有少少唔耐煩,我決定帶曉去下洗手間順便周圍探索下~

影下大門口~

原來教堂有樓座,我哋上去偷睇爸爸佢哋~

呵呵,我哋都俾爸爸發現咗喎~

爸爸,你都好唔專心喎~

大人崇拜都結束後,我哋就搭車返酒店了,個天落緊毛毛雨呢,落雨會唔會影響今日接住落嚟既行程架?

待續

前往其他中國旅遊blog

Comments

comments

發表迴響

你的電子郵件位址並不會被公開。 必要欄位標記為 *