28-12-2019:熱鬧非凡福建探親觀光團day 2(part 4).食得盡興、玩得盡興的生日宴會

離開海絲公園之後,司機直接載我哋去到今晚參加生日宴會既酒店了,係邊位長輩既壽宴?nonono,原來對於福建人嚟講,人生有兩次做主角,一次係16歲既成年,另一次就係結婚啦,今晚既主角就係大舅父個孫、我哋既表姪、曉同詩既表哥—-鷹騰~正因為福建人視16歲為成年,所以即使day生長係基督教家庭,信義會又有嬰兒洗禮,但day當年都係滿咗16歲後先洗禮+堅振架,我以前都唔係好明白點解咁遲洗禮,今次又解開多一個謎團~其實呢類成年禮可以大有大搞,細有細搞,但今次既宴會就係酒店入面既宴會廳,筵開十席(大約啦,冇正式數),所以非常熱鬧~

其實我哋到達酒店時時間尚早,連主人家都未到,我哋本來打算放低啲行裝,然後係附近隨便逛逛,睇地圖嘛,酒店附近好似有個公園仔咁,睇下有冇得消磨一陣時間~

於是我哋直接搭電梯上去宴會廳,入面仲佈置緊,我哋放低咗bb車呀,袋呀嗰啲就輕裝出動~但離開酒店先發現,周圍原來非常荒蕪,其實與其話「荒蕪」,應該話地方太大,同其他建築物相距太遠,步行嚟講逛唔到啲咩,加上去公園放完電之後,詩詩係咁扭計,唔肯行之餘,抱住佢仲扭來扭去,又唔肯俾爸爸抱,辛苦死我,所以都變成冇乜興緻~結果我哋圍住酒店兜咗一圈,經過咗酒店spa既入口,同埋見到兩間貨品唔太吸引既便利店,冇收獲~

但我哋再返去宴會廳時,就變得非常熱鬧了,多咗好多人嚟到,當中包括先一晚見過面既親戚同小朋友~有好多氣球做佈置,同埋俾啲小朋友玩,佢哋又進入玩既瘋狂狀態了~

除咗追逐同玩氣球之外,另外最吸引既就係枱上面既前菜同埋飲品了,其實之後要食大餐,但枱面偏偏預備咗好多立雜嘢嚟招呼客人,大人係可以節制多少少既,同埋個胃容量大少少,食咗立雜嘢都仲食得落正餐,但小朋友真係好難講,我都唔太敢俾曉食晒成杯乳酪,同埋都叫佢食飯時先飲嗰支類似益力多既飲品(味道相同,但size應該係3倍左右),另外仲有好多款冷盤,係度向大家招手,「食我啦,食我啦~」

因為詩詩已經攰到極點,其實我好想俾佢奶奶強制瞓一陣,期望成晚唔好太扭計,但周圍實在太熱鬧,瞓唔著,佢奶一陣又突個頭出嚟望下嘢~話說筵席開始之前有播住啲背景音樂,都係loop住啲兒童聖詩,一loop到讚美之泉既「讚美的孩子最喜樂」時,詩就突個頭出來了,我都冇佢辦法,唯有看著辦~好在佢後來有得玩,我又唔逼佢食嘢,佢整體表現都算可以啦~

今晚食既當然豐富啦,尤其一圍枱本來坐10個大人,而家我哋坐得4大4小,份量方面真係超澎湃~

(以上只包括部份菜式,因為太忙唔得閒影呀~)

龍蝦同埋刺身都可以大食特食,餸菜當中有幾樣印象比較深刻:

一個係海參南瓜羮,特別既地方係,湯羮入面有啲一粒粒既穀物,口感有啲似pasta米粒麵(risoni),但中菜入面又冇理由有risoni,後尾好似係有人解答到架,但我而家又唔記得咗叫咩了,呢個似risoni既湯既口感非常好~

另一樣要特別講既就係蒸蟹喇,因為上菜時小朋友已經飽晒去咗玩,我非常難得地可以好悠閒咁食蟹,好耐冇試過,通常一係佢哋瓜分晒我剝得好辛苦既蟹肉,一係就想我陪佢哋~

出咗去玩既詩詩回歸食炸魚~

另外有個炸魚都非常好味,炸魚個脆漿有啲炸到脆脆既粒粒麵包,好香好脆,魚好鮮美,但又唔會覺得油膩,正﹗不過詩詩淨係搣啲脆脆麵包粒出嚟食囉~食到甜品時小朋友又回歸了,明明之前話飽,但又可以食晒成個奶皇菠蘿包,再飲糖水同埋食生日蛋糕囉~

小朋友食飽飽,出去玩呀~

既然係生日宴會,當然有切蛋糕既環節啦﹗平時曉曉非常怕生,今次唔知係攰到進入發揮小宇宙既狀態丫,定係真係有表姐係度壯下膽,佢居然會自己走上台同其他小朋友一齊參與~

鷹騰表哥親自分蛋糕俾小朋友~

蛋糕係放入另一個胃既~

餘興節目方面,仲有唔同團體輪住上去唱下歌,講下祝福既說話,其中一個團體就係我哋啦~早上係車程上得到大舅父邀請,我哋臨時商量唱咩歌,最好就係穎彤穎妍兩姐妹同曉曉都識唱既歌,結果就決定唱一首兒童版既主禱文,曉曉好勇敢地揸住咪唱,大獲好評呀,講嘢既部份當然交俾爸爸啦,得佢識講福建話,詩詩?歌又唔識唱,負責賣萌囉~

曉詩既嫲嫲,主角既姑婆上台講幾句~

曉曉非常喜歡啲氣球~

有得帶走當然更開心啦~

曉:你幫我影張相啦~(其實已經影過好多張啦)

宴會結束,我真係成個人攰到散晒,好在兩隻嘢表現尚算ok,雖然係攰,但都度過咗愉快既晚上,又食咗好多好嘢,又傾咗好多計,最後仲要又食又拎~小朋友可以拎走裝飾用既氣球非常高興呢,不過要同佢哋約法三章,氣球可以帶返酒店玩,但搭飛機嗰日就要留低啦,佢哋都乖乖同意~既然咁攰,回程又係「Into the unknown」時間啦~

帶到返酒店既大氣球~

待續

前往其他中國旅遊blog

Comments

comments

發表迴響

你的電子郵件位址並不會被公開。 必要欄位標記為 *