離開閔台緣博物館，下一個景點就係步行距離既西湖公園，其實兩個景點之間一啲都唔遠，但小朋友已經攰攰地就難搞啲~我哋當初落車時專登帶埋bb車，諗住即使詩詩唔坐，用嚟載下嘢都好，而家果然發揮咗效果，落車時仲涼涼地，個個都帶咗外套落車，但逛完博物館太陽出嚟，好熱呀，bb車載晒大家既外套都有少少overload~除咗載「貨」之外，bb車仲有一個功能，就係三個大既女孩子都好想推車，好處係增加佢哋行路既動力，壞處係爭住要推又要處理紛爭，總之無時無刻都係非常之嘈呀~

西湖公園原來非常之大，步行徑圍繞住個湖，有遊覽船可以搭~我哋由入園直至離園，都唔經過遊覽船既碼頭，午飯前亦唔夠時間專登兜過去，一場嚟到冇得搭真係有少少失望，好在下晝去既目的地我哋有得再坐船啫，填補番少少失落感~

對比起天氣，我實在著得太多衫，所以爸爸同曉曉都偷偷地係沿路除咗件底衫(偷偷地既意思係避開途人同埋嫲嫲既目光)，哈哈，曉再大個多少少就唔可以再咁做啦，一定要入廁所先除得~

西湖公園景色未至於驚為天人，對於生活係香港既都市人嚟講都係好好既休憩空間，對於小朋友嚟講都係可以跑跑跳跳既活動空間~

休息同散步既空間

攰~

抱啦抱啦抱啦~

西湖公園

不過佢哋冇乜energy既時候，就要靠唔同既遊戲嚟boost下精力，例如影古怪相或者賽跑之類~另外有效既方法當然係食下snacks啦，但就快食午餐，只限食少量果乾咋，唔可以影響胃口呀，福建咁多美食，食立雜嘢食飽晒就好可惜啦~

嗲嗲曉~

影下個招牌先~

哇，外面有啲攤檔，賣既係公園入面玩既吹泡泡、風箏之類，曉見到公主風箏就兩眼發光了~

為搏外甥孫女們一笑，大舅公係唔會理你立唔立雜嘢既~上車後一人一支冰糖葫蘆，最緊要開心~呢種冰糖葫蘆好特別喎，入面包既果子聽聞叫做油甘子，酸酸甜甜都幾爽口~不過嘛，詩淨係識得舔上面啲糖，然後滴晒口水啦，徙晒啲嘢丫~

呢個講法一啲都冇錯，因為午餐實在太好味了﹗﹗大舅父大舅母帶咗我哋去咗一間地道既鋪頭食肉粽、牛肉羮、蚵仔煎，樣樣都yummy yummy~

主菜嚟之前，先嚟泉州名物「土笋凍」~

其實土笋凍係一啲海產整既啫喱，大舅父描述為「海裡面的蟲」，我即刻唔敢食了，其實我估應該味道好鮮美吧？但恐懼勝過咗食慾，要問問day先知好唔好味了~

熱鬧既小餐館

嚟到主菜就啱晒我口味啦，我本身鍾意食粽，所以jap jap jap食唔停~福建既粽子同廣東既粽子有啲唔同，因為唔知道內容會有啲咩，所以一邊食一邊尋寶咁，我幫詩詩切開佢隻粽時，發現咗鮑魚呀﹗﹗﹗我真係第一次見粽子入面有鮑魚~一問之下，原來大舅父點咗十幾隻粽子之中，有四隻係海鮮粽，詩詩中獎了~但即使有新鮮鮑魚係入面，一隻海鮮粽好似都係十幾蚊人民幣咋~

詩詩愛粽子

yummy~

去福建當然係食食食食食食食食食啦~

另外要介紹既當然係牛肉羮啦~

呢樣食物對我嚟講就唔陌生了，因為自從嫁咗俾day，返去老爺奶奶度食飯都偶爾會食到呢個福建話叫做「胡-hack-gee」既牛肉羮，入面既牛肉非常嫰滑，啲湯汁就好鮮美，可以不停食好多碗都得~

蚵仔煎原來同台灣夜市食既唔太似，我奶奶平時整既果然係福建風味~台灣夜市食嗰啲粉漿比例多啲、醬料濃郁啲，而泉州食到既呢份呢，就比較強調蠔仔既天然味道，蠔仔隻隻又鮮又肥美，真係好正呀﹗﹗﹗

預咗今次去福建會食到肥晒番嚟，原來無論係貴價既筵席，定係平民既小食店，都一樣會食到飽到上心口，因為停唔到呀~希望爺爺、穎妍同詩詩既增肥之旅可以有好成績﹗

待續

前往其他中國旅遊blog

Comments

comments