本來我盡量避免帶曉曉參加下晝既活動，因為作為超級睡寶寶，佢到而家4y8m仲係要瞓好多晏覺，而且睡意來襲難以抵擋，隨便都瞓兩個鐘以上~由出世到而家超過一千七百日，完全冇瞓晏覺只係試過兩日咁大把，平時星期日四點半學游水我都覺得好大壓力，去完教會要衝返屋企小睡再叫醒佢去游水，所以安排下晝既活動都係要小心啲~今次班入面既同學家長搞活動，一齊去參觀騎術學校，見咁難得就挑戰一下啦﹗
參觀時間係下晝兩點半至三點半，我哋要兩點鐘係美樂輕鐵站集合，所以放學後唔返屋企了，婆婆同小朋友們係我診所附近食住嘢等我，跟住就一齊出發了﹗短短既輕鐵車程，我要確保曉唔好瞓著同埋詩要盡快瞓著，結果都成功呀~
騎術學校
K.2曉同同學仔既互動果然同N班、K.1時好唔同了，會同佢哋拖住手行，一齊傾計，冇以前咁怕醜啦~因為有幾個同學仔都一齊學游水嘛，我都有熟人丫﹗哈哈~
去到騎術學校，職員姐姐千叮萬囑叫小朋友一定要安靜同埋唔好跑，因為會嚇親啲馬，呢個聽落咁簡單既指令，要一眾K.2小朋友徹底遵從真係好難呀~
一開始時職員姐姐問，有冇小朋友係驚馬架？umum…我哋嗰個驚任何動物既曉勇敢地舉咗隻手，不過舉得太低睇唔到，「太好啦，個個都唔驚~」呢個係姐姐既結論~可能因為全程太緊張，又要捉實媽同婆，所以參觀完曉真係攰得好交關~
首先我哋入去lecture room睇一段video，簡單講解人要接觸馬時既Do’s and Don’ts，小朋友坐前面兩排座椅，大人坐後面，但內容有啲難明時佢哋就開始坐唔定啦~後來夜晚同爸爸講起參觀既內容，好在曉都仲記得好多既~
馬房A
之後參觀馬房，講下啲馬既種類(pony係小馬，horse係賽馬嗰啲「高頭大馬」，果然小馬既叫聲真係好似Peppa既朋友Pedro咁架，Pedro真係pony﹗)，馬既食物(原來一日食七餐，食乾草、蘿蔔、蘋果、薄荷糖，因為乾草唔及新鮮草咁有營養，仲要加馬糧，即係好似狗糧嗰啲呢)，馬既屋企(木糠鋪既地板，其中一隻馬有鼻敏感(?)，用報紙碎嚟鋪地而唔係用木糠；佢哋有個馬馬自己控制加水既飲水兜)，馬既衣服(平時唔駛著衫，但認真凍既日子會披番一件外衣架)等等~
小黑馬
原來騎術學校有80隻馬，除咗俾人學騎既馬之外，仲會係度照顧啲退役既賽馬~姐姐指住其中一隻馬，問小朋友係咩顏色，大家好爽快又好整齊咁答「白色﹗」，原來嗰隻本來係灰馬，但老咗毛色會變白，好似人啲白頭髮咁，睇佢個嘴角既毛色就知道佢原本既顏色喇﹗
戶外浴室
之後出去戶外，參觀馬馬既浴室，原來佢哋沖完涼之後係用個刮刮嚟刮走啲水，好似抹窗咁，沖完涼要散一陣步曬一陣太陽，等啲水乾晒先入番屋入面，冇咁易冷親~
之後又介紹啲鋪沙地用既拖拉機同埋馬蹄鐵，曉有主動答問題呀﹗因為佢睇過既書有講馬蹄鐵嘛，係熟悉既內容~好主動，叻女﹗
最後一個環節係同迷你馬影相，由我同詩詩係中間，隔開馬同曉之下，可以順利影到張靚相~今日特別鳴謝婆婆陪我哋一齊去，幫手照顧兩個小朋友~