6-12-2019:小孩必食懶人南瓜飯

爸爸同事結婚要去婚宴,得我哋三母女係屋企食飯,呢種情況我哋通常有三個選項,一係出街食順便去行街買嘢,二係去婆婆屋企食,三係自己屋企煮~但自己屋企煮嘛,梗係要揀啲煮得方便,佢哋食得叻,唔駛我勞氣既食物就最好啦,之前成日煮曉口中既「芝士麵」—-白汁pasta類,加上無限芝士+/-芝士粉,兩個都食得好好,最近我就鍾意整電飯煲一鑊熟既懒人飯(我娘家叫呢啲做「有味飯」,day屋企叫呢啲做「鹹飯」)~

爸爸去飲時我哋食既芝士南瓜飯~

早幾年有一排潮流興整蕃茄飯,facebook上面見到人人都整,放原個大大個蕃茄入去電飯煲中間,加啲油加啲鹽加啲黑椒,配其他餸菜,煲好撈勻就變成蕃茄飯~我屋企傳統既有味飯就有滑蛋牛肉飯、冬菇排骨飯、鱆魚肉粒飯等等…

我最近就鍾意整南瓜飯,其實效果同蕃茄比較接近,因為南瓜煮到腍晒時變成蓉,而且口味比較似西式,有少少似risotto咁~餸菜內容方面,可以加入冰箱長期都有存貨既粟米、蝦仁、小帶子、三文魚柳等等,新鮮蔬菜方面如果有洋葱、菇類、甘筍等等都可以放入去,基本上同屋企既炒飯差唔多,有乜就可以放乜~要留意既係嗰啲食物會唔會出水同埋本身入面水份多唔多,咁會影響煲飯既水量,例如蕃茄本身多水份就要減水量,菇會出水都要小心啲~

我媽以前整有味飯,佢會飯滾時先放肉類落去,以免肉類煮得太老,我本身都學佢咁做,但我發現我屋企個電飯煲似乎性能唔同,太遲放肉類/海鮮類落去會令成個鍋入面降溫,飯會熟唔透,飯煲嘟嘟嘟後要加馬再煮多陣,而家我會一開始就放埋肉類落去,不過鋪係面唔浸入飯同水中間,到飯煲倒數10分鐘左右時先打開撈勻,咁樣似乎會一致地熟得好啲~

我分別試過用三文魚柳切粒一早放入去煮,同埋臨煮好時拌入煙三文魚,撈勻啲飯時三文魚柳粒會散開,變成三文魚味融入飯粒中間,但冇咗三文魚口感,煙三文魚既好處係可以半熟咁食同埋保留口感,但要注意煙三文魚有鹹味,一開始時要加少啲鹽先得,同埋煙三文魚就貴啲囉~

如果想香啲可以加牛油,想幫詩詩增肥(其實會順便幫自己增埋肥)可以用cooking cream或牛奶代替煲飯用既水~最近買咗芝士,飯煲好之後加啲芝士,成鍋放入焗爐度焗溶佢亦得﹗令小朋友食得快食得多既,當然唔少得芝士粉放題~其實炒飯、中式既鹹飯佢哋都食得好,但我實在接受唔到曉加啲芝士粉落去豉油味既冬菇飯入面囉…

最近去大眾書局買文具,可以加錢換本食譜,係粥粉麵飯68種,其中一款栗子蕃薯飯,又係我既懶人飯朋友,我用雞脾切粒代替火鍋豬肉片,另外加咗冬菇,都幾好味呀﹗大家又有乜鹹飯idea?

Comments

comments

發表迴響

你的電子郵件位址並不會被公開。 必要欄位標記為 *