從來城門水塘繞圈既行山路線都只屬於初級中既初級，甚至係有啲人每日晨運既日常，但對於細個既小朋友嚟講都係挑戰嚟架~曉曉第三次去城門水塘，第一次去時一歲半左右，行少少、瞓多多、坐揹帶多多；第二次去時兩歲鬆啲，雖然都有自己行，但都係有唔少時間坐揹帶~今次四歲半啦，要自己行啦，究竟曉既功力如何呢？
點解會去城門水塘呢？因為出發前一日我哋睇下舊相簿，曉見到相入面既自己食雪條，就話：「我想去呢度﹗」我即刻話好啦，其實我都真係好鍾意行山架~我估計曉都應該會叻好多，而家去旅行都基本上唔駛抱，希望佢可以自己行全程~適逢天氣幾好，冇咁熱，又冇其他約會，就坐言起行啦~
有少少計劃唔到既係，今日曉無緣無故超早起身﹗﹗最近都有呢種情況，明明佢話鍾意返學，但返學既日子就剷佢唔起身，但放假既日子，只要太陽出咗一條線佢就醒咗，即係umum…六點鐘左右啦~咁早起身咪早啲攰？咁點算？我原本希望佢係巴士可以小睡一陣，但無奈車程真係太短，趕唔得切瞓著~
我哋係荃灣食咗個早餐之後就正式出發啦~
最近鍾意豬嘴既詩詩~
好在今日唔多人等小巴，第二架車就上到lu~
本來以為行山既挑戰嘛，係肉體既疲累、腳力、耐力既問題，估唔到第一個難關係上山前既踎廁~曉細個時我試過成個抱住佢屙踎廁，但大咗之後就好抗拒，上次返番禺掃墓，佢明明好急都係踎廁度屙唔出，結果搞咗好耐搵到個坐廁先去到，後來每一次去旅行，佢見到坐廁時都鬆一口氣話「唔駛練習」，但今次如果上山前唔屙，上到山係一定一定會急，唔通就地解決咩？但我又唔想因為廁所問題就落番山，好在，殘廁有一個坐廁﹗曉去咗個坐廁？nonono~個坐廁超污糟，就沖唔走既屎係入面，我俾佢揀，要乾淨既踎廁定污糟既坐廁，佢好識揀咁揀咗乾淨既踎廁—-成功咗啦﹗﹗返到嚟仲好威水咁同婆婆炫耀佢屙到踎廁呢~呢個真係曉既一大突破呀~下次就唔駛驚啦~
出發﹗好似全部自己行？詩其實真係自己行咗好少~
最近詩詩即使係抱/揹都要揀媽媽，為咗保留媽媽既體力，趁詩未太眼瞓時由爸爸抱先，到要瞓覺時先換媽媽啦~
曉今次都真係好叻﹗頭三個鐘都完全自己行，同埋都冇話成日要休息~其實佢腳力唔算差，弊係弊在超怕熱，好在帶咗風扇仔，已經幫咗好大忙~
城門水塘必影位~
曉攝影師作品~
見到水塘啦~
少女曉
溫馨媽詩組
呢張影得唔錯bor，good job曉﹗
自拍好好，親密啲~
風扇仔係非常重要架~
少有地得到詩詩寵幸既包包~
yeah~
爸爸與小情人ss~
玩拋樹枝，詩學家姐，居然拎咗一碌勁大既樹枝，笑死我哋~
休息~
呢度玩咗好耐呀~
呢張究竟影乜？呀，影爸爸﹗
太攰，要休息一陣~
後來見時間開始晏，day怕落山時間太晏，同埋曉又開始眼瞓，所以主動話抱佢~開頭係上斜就抱，平地就落番地，但後尾就抱多多了~
水塘景~
爸：「曉，你去唔去同牛牛影相？」曉(0.001秒回覆)：「唔影﹗」呢個驚任何動物既小朋友，只有興趣遠觀~因為我哋沿路行山，見到地上面好多牛屎，曉話：「牛牛，你要執番自己啲屎先得架~」
就快到啦~
終於去到主壩啦~終點了終點了~
自己行一陣啦~
冇電曉
媽媽好開心，因為就快到啦~
yeah~
過咗主壩冇耐有一個燒烤場地，應該就係上次食雪條既地方，呢排可能遊客少咗，冇小販上嚟賣雪條，好在有飲品機~day試咗Bonaqua既飲用水refill機，refill落自己水樽度夠晒環保，最近day因為肥咗好多，好注重唔好飲咁多甜嘢，所以有得淨飲清水就啱晒佢，不過如果啲水可以再凍啲就更好了~
我哋三母女就飲咗寶礦力朋友水動樂(曉都係叫佢寶礦力)~明明三個幾四個鐘都冇俾蚊咬過，爸曉兩個超惹蚊既人，停低係度休息下飲下嘢就即刻咬咗好多啖，慘慘~我同詩太難食，都唔知嗰度有蚊添~
飲完嘢距離搭小巴既位置仲有一段路，辛苦爸爸了，爸抱住曉行，曉幾乎瞓著覺﹗真係丫攰丫嘛~詩就瞓醒咗，我同佢就邊聽住Pink Fong系列歌曲，邊揹住佢行埋剩低既一段路~
真係好好彩非常好彩，好在day早少少開始抱曉行，我哋行到小巴站前100米左右就開始落雨啦，而且仲要幾大雨添，要小跑步行去可以避雨既位置~為咗減輕行裝，我哋今次其實冇帶遮呀~另外好好彩既係，小巴站太多人等車，適逢有架的士上到嚟，我哋同一對上咗年紀既夫婦合乘架的士落番去荃灣，佢哋仲唔收我哋車錢添，多謝晒啊~今次既行山之旅就又開心又辛苦咁完成了﹗
行得咁辛苦，梗係要獎勵下大家啦~yeah，去Pokka食芭菲~~~
到夜晚時，曉好鄭重咁同我講話下次唔去城門水塘了，佢一定覺得好辛苦啦~我話佢大個啲應該會好啲，不如五歲同六歲再試下啦，佢都有啲猶豫~但當我同佢講其實我好鍾意去行山時，佢就開始改變諗法，話可以去「美景山」(屯門置樂山上面引水道，因為係我哋鍾意去既美景茶餐廳附近，所以曉叫佢做美景山~)鍛練下，然後可以再陪我去行山~曉，多謝你咁愛媽媽，我都愛你呀~
點解超過1600字既blog冇乜點提起詩既呢？因為佢超過95%時間係坐係揹帶上面，屬於day或者我既一部份囉~詩，下次再去你要自己行多啲啦~