7-10-2019：忙裡偷閒台中小旅行day 4(part 2)．宮原眼科繽紛雪糕、byebye台中

詩詩瞓醒覺，曉好熱烈咁要帶我哋兩個去睇下佢之前同爸爸睇到既靚嘢，特別要介紹靚底底，唔，媽媽都係習慣自己一個人時去買呢啲嘢bor~

好喇，我哋出發去下一站啦，呢一站都係我好期待既一站—-宮原眼科~宮原眼科乜傢伙？聽落好似診所名，原來係日治時期既眼科醫院，但後來呢楝古老既建築物就被活化，而家變成甜品店同埋手信店呀﹗個雪糕好勁架，令人非常期待~而且建築物既介紹，被形容為「好似哈利波特入面既圖書館」，都好想睇下~

宮原眼科

入到去樓底好高，裝飾美侖美奐，感覺古典得嚟好高級，連啲手信(既價錢)都好高級，今次去旅行去得短短地，都唔打算話要買好多手信，而且係誠品時曉已經搜購咗大量蔬菜脆片同水果脆片，所以嚟到呢度都冇收獲lu~

我哋穿過手信部一趟就去買雪糕﹗

最令人驚訝既部份係雪糕種類之多﹗﹗﹗

有三個冰櫃，每一個冰櫃入面有十幾款糕，第一個冰櫃全部都係朱古力雪糕，有唔同濃度，又有唔同名稱，我都分唔到咁多，唯有睇下邊個mark咗做「人氣」嚟揀~第二個冰櫃全部都係水果雪糕/雪葩~

第三個冰櫃全部都係茶類雪糕，樣樣都想試呀~有鑑於同兩個小朋友一齊食，我放棄咗揀茶類雪糕而揀咗兩款水果雪糕~

除咗雪糕種類多之外，另一亮點就係，揀每一球雪糕可以配搭一款小食，好似餅乾、脆脆、鳳梨酥之類，我哋三球雪糕可以揀三款﹗

小食都好多選擇~

詩詩仲未識得為咗好多選擇而高興，爸爸就同佢影下相消磨一下時間~

真係好大杯、好繽紛，未開始食，睇見都開心~如果睇台灣旅遊節目，一定會有「少女心爆發」、「好治癒」呢類詞語出現~

不過大大杯，三個人堆住(爸爸係唔會主動出擊)，通常都會發生意外，跌咗少少就實會發生~詩詩仲咳緊，唔想俾佢食咁多雪糕，所以俾咗舊大大舊既餅餅佢，佢慢慢享受塊餅餅時我哋全速食晒啲雪糕囉~不過嘛，個雪糕係好繽紛、好夢幻，但味道方面其實唔算太大衝擊，冇話食到瞇瞇眼咁囉，可能因為同環境惡劣有關吧？(嗰度冇枱櫈，為咗遷就小朋友，基本上係踎係度食)

食飽飽清潔乾淨，我哋上樓睇下影下相啦~呢啲係台灣旅遊節目稱之為「打咭景點」，可以影好多靚相，放上fb、ig俾人like~

好靚既樓梯~

似唔似哈利波特入面既學校圖書館？

好大地方，好多層~

不過我哋兩個人氣最高既小model唔太合作，細嗰個不嬲都唔合作，而大嗰個經冇晒電，隨時就地可以瞓著~我哋拜訪埋個靚靚洗手間就決定要搵地方俾曉瞓覺了~

原本有諗過係附近搵個地方坐低我同佢瞓，然後day同詩去行下街，但發現附近一來冇地方可以適合坐得耐瞓覺，二來根本附近冇好行街既地方，即使我同曉瞓咗，day都冇地方同詩磨咁耐~返酒店瞓？酒店頂樓有個休息空間~恐怕未到酒店曉就係車上瞓著，結果決定係，由得曉直接係車上瞓覺，我哋經過酒店，day去拎番行李，直接去機場，曉瞓到幾耐就幾耐啦~頭尾都瞓到有一個鐘，體力應該恢復到夠應付到夜晚了~

結果我哋就有好多好多時間係機場喇﹗話說一之內收到好多次航空公司既訊息，話班機時間會更改，但一直都confirm唔到，我哋早到機場都穩陣啲既~check in時職員俾咗機場用既餐券我哋，莫非真係會delay到好晏？晏到要係機場食晚餐？因為當時時間尚早，仲未肚餓，我哋先搵節目消磨時間，睇機場指南，話入閘後有「兒童遊戲區」，我哋就決定去望下~過關後，睇住地圖嚟搵嗰個遊戲區，但小朋友對於沿路既東西更有興趣，曉睇Victoria’s Secret個內衣show睇到眼定定，而詩嘛，係周圍既座椅度爬上爬落，根本就已經係佢既遊戲區，我哋終於去到遊戲區，原來係「BB遊戲區」多過「兒童」，曉都冇興趣去玩，而詩？繼續係佢既巨型遊戲區度玩，佢唔覺得個「遊戲區」比起其他部份更有趣囉~