去台灣旅行，無論去邊，總要去一個夜市掃下街~今日搭咗好多程uber，其中一程既司機問我哋會唔會去夜市，其實一心就諗住去最出名嗰個逢甲夜市，而且仲要咁近我哋酒店，一定要去啦~司機話，如果有幾個晚上，佢建議我哋都去下傳統夜市，就係當地人真正會去買嘢既週末夜市~不過我哋冇機會啦，得呢個星期六晚可以去夜市，因為星期日晚book咗親子餐廳(曉最期待既行程)，星期一就返屋企lu~所以我哋照原定計劃去逢甲夜市~
搭車沿途見到類似祭典既隊伍，但感覺有少少恐怖~
由高美濕地返市區，塞車塞到好悶，曉又係咁嗌佢套衫好濕，真正濕透嗰個又係我身上郁嚟郁去，我都好想快啲落車呀﹗
當我哋去到逢甲夜市，即刻精神一振﹗哇，真係非常熱鬧呀﹗
先嚟個大合照~
食嘢之前，希望可以買到衫俾兩個小朋友換~果然，行咗冇耐就有一間童裝，曉非常興奮，因為入面啲衫既款式都非常girlie，係我好少買俾佢哋既類型~因為秋冬裝已經上市，所以啲短袖衫褲放係啲隱敝啲既位置，係售貨員姐姐協助下，兩姐妹各揀咗一件T恤、一條短褲，即時換上~兩件T恤都係短袖露膊裝，曉好鍾意﹗佢話好似「姐姐跳舞」(我最近睇<Produce 101>)，然後佢學啲姐姐縮起膊頭嚟跳啲好sexy既舞步，勁搞笑囉~條短褲就鑲咗啲珠珠閃片上去，仲有lace~不過呢啲珠珠閃片敵唔過我哋屋企部洗衣機同埋詩詩隻手指，兩樣夾攻之下，著咗幾次之後而家啲珠珠閃片既數目大幅減少囉~而且嘛，呢套咁靚既新衫，好快又俾詩詩整污糟了…
曉著咗呢件衫覺得自己好迷人~
換好衫就可以搵食啦~成條街都係熟食，我首先俾月亮蝦餅個招牌吸引住，月亮月亮，好似好浪漫咁~
爸爸排隊買嘢食~隊唔長，但買咗飛之後要等就等得耐了~
排緊隊等時不如買第二樣嘢嚟食啦，爸爸等蝦餅，我哋就去旁邊間鋪頭買炸薯，炸薯條、薯角、薯球、薯片、薯乜薯物全部任揀三樣，仲可以揀味粉同埋醬添~我以為可以即刻有得食，原來要翻炸再加調味，結果兩邊都要等~
好豐盛既炸薯盒~
但等待係值得架，兩樣都好味，不過蝦餅嘛，詩完全唔肯試，曉食得一舊，我哋兩個食晒剩低嗰啲實在太多﹗點解詩唔肯試蝦餅呢？因為炸薯太吸引，我都覺得好好味，香脆得嚟又唔油膩，再配海苔粉同芝士醬實在太幸福了~特別係鮮炸薯片呀﹗
月亮蝦餅~
jap jap jap~
原本我打算掃街，食好多唔同既美食嘛，點知食完個蝦餅同埋啲炸薯已經飽咗大半，兩個小朋友已經想直接進入甜品階段~好啦好啦，陪你哋食咗甜品再算啦~
夜市當然有乾貨，仲有呢啲重口味既夾公仔機…怕怕~
見到有間好靚既雪糕店，我同曉都雙眼發光~不過詩詩可能太攰，唔耐煩，係咁大叫，完全破壞享受雪糕既氣氛，等雪糕時我要帶佢出去呀~爸曉組揀咗一個芭菲，一杯飲品~
個雪糕好靚呀﹗上面有黃色西瓜，下面有半個芒果呀﹗﹗day個飲品我就冇乜興趣，唔記得係芝麻甚麼定咩，我都唔記得我有冇試到，即使試咗而家都冇晒印象了~其實詩都仲有咳咳，我哋都知食雪糕會有風險，但真係太快見效了，果然嘔咗，仲不幸地係雪糕店度嘔，好在有少少先兆時我哋拎定膠袋出嚟，大部份都接得住，係詩推開膠袋整污糟咗少少鋪頭~不過上次係泰國嘔咗咁多次，day已經成為清理嘔吐物專員，可惜既係，著咗唔知夠唔夠一個鐘既新衫，又整污糟咗了~
算啦算啦，食完雪糕我哋決定直接返酒店啦，如果途中經過有嘢食想食先買返去食啦~
由逢甲夜市返酒店條路都唔短，最弊係好大部份路段都冇行人路，要貼住商鋪嚟行，我哋唔慣又帶住小朋友都戰戰兢兢~結果經過一間小食店，我要擔仔麵、貢丸湯，day就要咗魯肉飯~結果個擔仔麵又俾兩隻嘢瓜分，都好既，詩嘔晒啲嘢，食得番少少都係好事~因為未飲嘢有少少遺憾，經過一間飲品店我買咗杯綠豆牛奶，呢杯綠豆牛奶等到day爆炸，似乎要等好耐，所以我帶咗兩個小朋友返去先，day話個職員花咗好多時間磅啲綠豆，份量非常精準，哈，係幾好味既~
我哋係酒店lobby等埋爸爸同杯綠豆牛奶返嚟先一齊上房，lobby既小舞台自然變成小朋友既遊樂場了~
呢個分段式既夜市就此結束啦，一團糟，希望將來再嚟逢甲夜市，可以試多啲唔同款式既美食啦~
待續
前往其他台灣旅遊blog