5-10-2019:忙裡偷閒台中小旅行day 2(part 3).高美濕地

四日行程之中,由酒店往返高美濕地算係最遠距離了,搭uber真係節省好多時間,如果搭巴士轉車,可能要兩個鐘,但自駕/的士/uber只需要40分鐘左右車程就到了,車費還可以啦,一程700幾台幣~我哋叫醒曉出發,因為要日落之前去到呀~家姐瞓醒咗好精神又輪到妹妹瞓,所以遊覽高美濕地既上半場都係得我哋三個active members~

仲未落車,遠遠望到巨型風車時我同曉已經好興奮,落車見到成排宏偉既風車,加上壯闊既大海,真係歎為觀止,好靚~我哋沿住岸邊既長堤散步,享受下遠離城市既輕鬆感覺~

四歲半曉可以幫手揸下機影相,不過還需要練習…

自拍唔係唔好,影到既景點都少啲,都係train多啲曉攝影師吧~

時間尚早,我哋周圍影下相,等晏少少先入去木棧道~

曉好鍾意呢間似城堡既屋,不過到最後我哋都唔知呢楝建築物其實係乜嚟既~

可愛彈塗魚~木棧道gogogo~

出發前上網check定日落時間同埋木棧道開放時間,似乎木棧道係長期開放,只不過係盡頭准唔准落水就先至係「開放時間」所規限既部份~好在我哋早到咋,如果真係18:00先到高美濕地,已經天黑得七七八八了~

木棧道唔算非常長,但遊覽要花既時間都唔短,因為要一邊行一邊觀察小生物一邊欣賞風景,又要停低落嚟影相~我哋起步行木棧道時先啱啱開始有啲收太陽既感覺,都未算正式日落,但差唔多落水時就正正係日落時份了,時間啱啱好~

其實我哋都花咗好多時間係濕地範圍睇動物,曉除咗人類之外,佢係怕所有既小動物,除非距離夠遠,或者有玻璃/圍欄隔開,今次啲招潮蟹同我哋有啲距離,所以佢睇得好開心,可以坐係木棧道上面慢慢觀察~

啲蟹真係多得好—-交—-關—-﹗﹗﹗如果要劃1mx1m既方格有幾十隻蟹既話,成個高美濕地真係唔知有幾多萬隻﹗﹗而且佢哋好活潑,行嚟行去,曉就記起Peppa入面有一集講豬爺爺同豬嫲嫲帶Peppa同George去海邊,佢哋兩姊弟扮蟹打橫行,曉又學Peppa扮蟹打橫行~我哋睇下睇下時,詩就瞓醒覺啦,太好啦~

除咗蟹之外,仲有雀雀~

又係曉攝影師~

呢張唔錯﹗

我哋沿住木棧道一直向前行,其實今嚟台中,去好多地方都覺得好少人,同台北同高雄好大分別,但高美濕地既木棧道似乎係今個trip入面人口最密集既地方,可能只有逢甲夜市可以相比,木棧道左右冇圍欄,人又多,所以要慢慢前進~

一路行太陽開始落山,今日天氣算唔錯,起碼可以見到太陽慢慢變橙色咁落嚟,變成比較接近攝影師/官網入面既景色~

坐低欣賞日落~靚~

Perfect~

今次重頭戲之一當然係落水玩啦~

遠遠見到,前面既人開始落水啦~

唔知點解我咁天真,覺得只要水深唔過褲腳就唔需要替換衫,呢個決定可以係正確既,如果只有我自己一個人落水的話…

非常多既鞋﹗

小心奕奕…

爸爸眼中既我哋~睇落有少少狼狽…

曉都還可以控制自己,但詩一落水就覺得係去游水,唔理身上既裝束,直接浸入水入面,非常盡興~曉都俾佢感染到,想彈彈跳、大踏步咁係水度玩,兩個俾我盡力阻止都唔太有效~點解要阻止?你哋自己濕唔緊要,但唔好整濕其他遊客丫~本來我覺得day話唔落水有啲掃興,但後尾都覺得呢個決定正確,因為佢係岸上面保管住隨身物品,「傷亡」先冇咁慘重,而且又可以幫我哋影相~我落咗水都好想影下相,但就真係好怕一鬆手會跌個電話落水,所以小心奕奕,一隻手又要捉住詩~

開頭我都仲盡力捉住詩,等佢唔好浸入水,但發現無效,就豁出去吧~

model曉?

小朋友既重點唔係風景或者大自然,一定係玩水﹗

day話呢張影嚟俾我打blog喎,有情侶專登行到好出,影啲好sweet既相,即係擺成心心嗰啲啦~

個天開始比較黑我就「借啲宜」話要上水,其實詩都反抗,好在佢細細粒,我可以成個抱起帶走,但壞處係連我都濕晒囉~點都好啦,佢太濕啦,要快啲搵件衫俾佢換呀~

濕dap dap三人組~

詩詩既衫褲真係濕到冇得救…

玩到個天開始黑~

月亮都出嚟啦~

高美濕美沿海有好多商店,見到賣各種小食同飲品,本想睇下有冇啲鋪頭都會賣紀念品之類會賣埋衫,點知完全冇呀﹗﹗唯有除咗詩條褲,換條乾淨片,衫就冇辦法啦,好在天氣唔凍,就咁光住下半身出番市區再解決啦~

我哋嚟既時候搭uber,走既時候見到好多的士係度兜客,就直接隨便跳上一架算數,一架正常五座位的士,已經坐咗我哋2大2小,個的士司機居然想載多另外一組人?﹗仲要又係有大有細(最細嗰個都大過曉)~如果我哋架的士係全場最後一架的士,對方會冇車出市區,司機又唔介意超載,逼啲都唔怕啦,但問題係當時仲有好多的士,分明個司機係想賺多啲囉,我哋非常驚訝個司機會再撩人上車,根本逼到坐唔落,我哋爽快地拒絕了~後尾其實有少少兜路嫌疑,雖然係有啲塞車,但我哋搭的士既價錢貴過uber嚟既時候,花既時間又耐咗好多,個司機會唔會因為載唔到多一組乘客而深深不憤?所以真係uber好啲,你情我願丫嘛~

高美濕地旅遊網

http://www.gaomei.com.tw

待續

前往其他台灣旅遊blog

Comments

comments

發表迴響

你的電子郵件位址並不會被公開。 必要欄位標記為 *