5-10-2019：忙裡偷閒台中小旅行day 2(part 1)．色彩繽紛彩虹眷村、熱到掉頭走既ABC

先一晚夜瞓，所以盡量俾大家瞓得晏啲，鬧鐘時間係8:30屬於食早餐既最後通牒時間，因為早餐到10:00就結束了~不過嘛，屋企有細個小朋友既人多數都經歷過，其實有幾何要鬧鐘呢？你哋既小鬧鐘通常都又早又強勁~

今次經Agoda訂呢間Hotel 7逢甲，住過既客人都大大俾個好評，話服務好啦，位置好啦，9/F活動空間好啦等等，唯一唔好就係早餐唔太好味，我哋既評價都一樣，以台灣既酒店嚟講係唔算太好味囉~我覺得最好味既係白粥+肉鬆，就知道真係麻麻地，仲有方包搽牛油都唔錯~所以結果之後兩日既早餐我哋都出咗去搵食了~

之前咪講過，去親旅行曉都會病既，今次唔駛估佢第幾日病了，因為大細兩隻其實都係病住出發，大既流清鼻水，細既流黃鼻涕+咳，特別係詩，胃口認真麻麻地，直至打呢一篇blog既先一晚(回港後第三日)，胃口先恢復得差不多~精心幫佢揀咗佢食既機會大啲既食物，佢都冇乜點食~家姐係麵包愛好者，處理就簡單得多~

小朋友都好鍾意lobby既呢啲彩虹色梳化，所有要等候既時間，佢哋係度行嚟行去，又上又落，一啲都唔悶~

台中冇捷運，公共交通主要靠四通八達既巴士，但我哋時間唔多又帶住細路，加上台灣搭的士唔貴，我哋決定全程call uber或者搭的士~未試過猶自可，一試過就會愛上uber~一來車好快嚟到啦，通當都係五分鐘之內，快過香港用app call的士，車又新淨又舒服，最最最重要既部份係你情我願，因為司機知道目的地、知道收費先接order，佢肯定係想做呢單生意先接，接咗又會以最快既方法送你去目的地，肯定唔會借啲意兜路，因為有評分制度，所以態度好好，駕駛又安全~價錢嘛，我哋唔太清楚相同路線搭的士係咪真係會平啲，但總之uber既價錢係相宜啦~

我哋day 2第一站去彩虹眷村，本身有睇過啲一日遊tour，一次去晒我哋打算去既彩虹眷村、宮原眼科、高美濕地、逢甲夜市，抵係好抵，但我哋帶住小朋友最重要係自由度，幾時停留，係邊度停留，停幾耐，結果都係放棄作罷，

好似之前都有睇電視介紹過彩虹眷村，原來呢個地方係英國同日韓既旅客心目中好hit~香港出世既彩虹爺爺好大年紀先開始作畫，開始時係自家牆壁用鮮艷既顏色畫畫，點知大受歡迎，睇過既人都覺得心情會變好，後尾就出咗名喇，而家成條村都係相同風格既彩虹畫，好搶眼既色彩，好溫馨既字句，當然成為打咭熱點啦~

影下個招牌先~睇下，熱熱曉又出現~^^”

最初得彩虹爺爺一個畫畫，後來爺爺年紀越來越大體力差啲，加上出咗名又多人嚟，原來而家會有啲美術大學既學生嚟幫手補色~專業人士應該可以模仿到畫風，令我諗起叮噹作者藤子．F．不二雄過世後，其實都有好多新既漫畫同動畫繼續出版，畫風係冇問題，但感覺故事冇以前咁單純，而技安同阿福亦變得更惡更壞了，所以畫風係可以模仿，人既內心真係模仿唔到~

成條村都七彩繽紛，兩個粉紅人仔隱沒咗係圖畫之中了~

有啲影相牌，我哋邊個貌美？

Good luck everyone~

兩父女既自拍~

原本爸爸叫曉企係個窿入面，佢唔肯企，咁我企啦，umum…我企會…擋住晒啲公仔﹗

嫰模詩~

彩虹爺爺工作室

全球各地都有好多電視台嚟報導過啦~

當成為景點之後，自然有周邊商品出現，有啲彩虹眷村特色紀念品賣，而逛到口渴，亦有彩虹雪條﹗其實曉曉都好鍾意個花花雪條，但嚟到彩虹村冇理由唔食彩虹雪條嘛~

彩虹雪條~

彩虹眷村有個戴住Iron Man面具既矇面人出沒，佢拎住支結他嚟唱歌，又幫大家影相，炒熱氣氛~

我哋食雪條時佢就走咗入嚟獻唱一曲，因為係一首台語歌，所以印象深刻~曉當時好驚呢個矇面(怪)人，係咁縮係我後面~後來返到香港，day專登search下，原來遊客幫佢起名叫做彩虹戰士，佢仲會收到fans(遊客)既明信片同埋禮物添呀~day搵番嗰首歌出嚟俾曉聽，佢又認得出係彩虹村聽過，曉果然有少少音樂天份~仲有，去完旅行返嚟有一個星期，曉居然記得矇面哥哥件衫隻袖係藍色﹗﹗小朋友既觀察力實在不容忽視~我根本從來冇留意過，係而家搵張相出嚟先可以確認曉既說法~

為咗更吸引一家大細既遊客，後來仲起咗一條彩虹滑梯添，曉開頭戰戰兢兢，後尾發現好玩就不停sir，連詩詩呢個小小人仔咁高都敢自己sir落嚟~

好玩~

圍住滑梯係沙池，要除鞋入去，詩開頭係拮腳既沙上面行行得好慢，後尾習慣咗就自由活動啦~

小朋友幾時都鍾意玩沙~

滑梯都係彩虹村圖案設計~

扮屋既三父女

好靚既地下呀~

其實我哋係結ed~

本來係拋磚引玉，想曉咁樣影，但都係我嗰張影得好啲，哈哈~

話說去彩虹村時既Uber司機比較多嘢講，佢知道我哋係香港人，又傾下香港既情況，另外又問下我哋仲打算去邊度玩，我以為佢想兜生意邀請我哋包車，但原來佢真心想推介值得去既地方~我話佢聽，去完彩虹眷村，我打算去「附近河邊可以影相既地方」，佢完全唔知我講邊度，話呢度附近冇河…^^”其實嗰個地方叫做「筏子溪門戶迎賓水岸廊道」，個名咁長我講唔番出嚟，總之嗰度有好隻台中既英文字，啲人係嗰度影相得好靚咁啦~我知道唔算係咩特別既景色，但而家流行嘛，最重要係好近彩虹村，一場嚟到順便去埋啦~

search過google map，步行去嗰個廊道要30分鐘，對曉嚟講都唔係不可能既距離，途中又有超市便利店，但問題係，我哋雪條又食咗，又冇帶遮又冇帶風扇仔，超怕熱既曉係呢啲情況會變dur dur曉，好在day當機立斷話坐車，唔係行到半路中途call車就仲麻煩~

落車都係—-好熱﹗﹗﹗有幾熱？熱到曉即刻話要走囉~詩就係車上瞓著咗，影既相都係睡寶寶，曉就冇心機影相，好不容易影咗少少就嗌住要走~