趁連住重陽節既long weekend，又係時候出動﹗僅僅叫做四日三夜既目的地，重點當然要近、行程輕鬆~search下飛行時間兩個鐘頭內既目的地，考慮到最近有冇去過啦、班機時間啦、機票價錢啦等因素，最後剩低台中同埋海口，雖然海口機票平好多，但諗到台灣既親子遊樂設施多太多，結果揀咗又係去台灣﹗晚機去晚機返，飛一個半鐘，唔駛請假，仲有一個好處，原來台中機場距離市區比較近，去我哋酒店只需要25分鐘左右車程咋，加上機場規模比較細，拎行李又快，又唔駛坐接駁車甚麼，可以節省好多時間~
因為本住唔駛請假既好處，所以由我一拖二出機場，爸爸自己由公司過去機場~我放工時咁啱搭到一架曉叫既「中的士」(平時四座位/五座位既係「細的士」，後面可以放輪椅同好多件大行李既叫「大的士」，介乎兩者之間就係「中的士」喇，得好少架咋~)，知道曉鐘意中的士，我就問司機有冇興趣晏少少送我哋去機場，約好咗時間就更方便了~出發前既重要任務當然係曉要盡快午睡啦，詩我預咗佢唔瞓住，好在佢都唔搞搞震，我可以執埋最後既行李~難得既係未夠鐘曉自己就起咗身，咁就唔駛鏟佢起身啦~我有能力一拖二，主要係因為今次用一隻大喼可以放得晒四個人既行李，只係上落的士都唔困難既，而day早我哋少少到機場，佢可以接我哋落車咁就更簡單了~
準備要瞓覺既詩…
詩如我所料係車上瞓著，不過比起平時都係瞓得少啲啦，都冇辦法啦~
最近香港既情況，都有少少令我擔心機場保安加強，會令所有嘢慢好多，結果又ok喎，係進入離境大堂要check passport同電子機票啫，都好快~入面所有手續都非常順利，結果時間多得滯﹗﹗
曉見到靚靚廣告主動話要影相~
乜呢個都靚咩？
曉係候機室做功課，我就帶住詩去買嘢飲，然後曉問我十萬次，幾時上飛機呀？咁未夠鐘丫嘛~呢段時間，娛樂袋入面既玩具開始出場啦~
對功課又愛又恨既K.2女孩子，鍾意做得嚟又覺得好難，對於自己識寫字又覺得好自豪~
order要果汁既爸爸結果飲咗幾多啖呢？我好似飲得一至兩啖左右…
可愛~今次去程搭既飛機係細機，座位3-3，詩詩未有自己既座位，仲可以一排坐晒，回程時係更細既飛機，座位2-2，爸爸要坐走廊既另一邊了~
記起同樣係機場既落地大玻璃，當年兩歲幾既曉對住塊玻璃一邊唱歌一邊跳舞，而家四歲半既大女孩唔會咁樣做啦~
指定動作﹗
又點可以唔預埋爸爸呢？
上到飛機都有少少晴天霹靂，因為，冇—-電—–視—-﹗只有細細部係頭頂，幾個人睇一部冇得選台嗰種，其實我哋細個時搭飛機有得睇呢啲已經好開心啦~好在只搭一個半鐘，食得飛機餐嚟都差唔多到~三份飛機餐肯定唔夠四個人食，所以我帶咗三條蕃薯同埋一盒藍莓上飛機，呢個決定實在太好了，詩詩未起飛已經躁動不安，蕃薯出動，即刻靜晒，曉都唔太鍾意飛機餐個麵，食啦食啦食蕃薯啦，食啦食啦食藍莓啦~
食飽飽之後，好在呢一程飛機飛得好穩，坐唔定既詩詩可以俾佢落下地，我哋坐經濟艙最前嗰排，都有少少空位俾佢自由活動一陣~降落要坐定定時就睇下書或者奶奶下啦~
搭飛機冇嘢做又要攬住，攬住就會忍唔住想錫錫﹗
而家搭飛機壓力都少咗一半，因為曉可以自己搞掂，上次去泰國我都評定佢有資格去歐洲旅行了，主要係搞詩一個，都好好多~
辦好入境手續，拎行李，就要海關，因為非洲豬瘟既緣故，對於防止任何豬肉都非常嚴格，最容易中招既係零食同埋嬰兒食品入面既肉類，即使係由台灣帶出境食唔晒再帶返入境都唔得~好多staff當值去把關，不停提醒過海關既人拎晒啲肉出嚟，我都要由頭開始仔細諗清楚每一樣零食有冇唔入得既成份，冇事冇事，我哋得藍莓乾同提子乾啫~
之後去張羅換錢，換得嚟個機場已經空蕩蕩，我哋去到的士站完全唔駛排隊就上車了，果然台中比起台北同高雄既繁華都差好遠，只係夜晚九點幾，周圍街道都黑麻麻又靜英英，可能未去到夜市附近吧~個司機自己就好熱鬧，揸車聽歌就好普遍，但邊揸車邊睇youtube+食零食真係叫乘客驚驚~有驚無險去到酒店了~
我訂咗四人房，有兩張雙人床，事先己經要求酒店幫我將兩張床併埋再靠牆放，咁就唔怕詩碌落床啦，大家夜晚瞓覺時可以有多啲唔同既可能性^^”~
房好大，好開心，浴室都好大，有兩個洗手盆，又有企缸又有浴缸，曉最開心啦，可以浸浴~因為詩詩搭的士返酒店時已經爆咗尿片，所以都唔容許我慢慢嚟，基本上係幫佢除咗鞋，直接的入去浴室沖涼了~
可以俾詩爬上爬落時已經變番乾淨詩啦~
今晚要好好休息，day 2正式出動去玩咯~
Hotel 7 逢甲
https://www.hotelse7en.com/tw/index.html
待續
前往其他台灣旅遊blog