但曉真係攰得不得了，提議索性返屋企，佢都話ok~r 唯一惦記住既係，我應承咗佢食完午餐冇咁飽時可以食雪糕，但佢擔心如果返咗屋企就會冇雪糕食，唔駛擔心架，屋企有雪糕，返到去一樣仲有﹗曉話要瞓覺，要爸爸抱，果然好快就瞓著，由呢個位，行到出去車站真係好遠，只不過由反斗奇兵大本營行到去探險世界曉已經瞓著，我提議不如坐低等佢瞓醒先再行啦，好精神可以再繼續玩~
爸爸與小情人~
與此同時，適逢今日示威活動去到屯門，其實我都一早有擔心回程時未必可以順利返到屋企，家姐send咗message提我哋當時屯門既情形，叫我哋玩夜啲，有需要時住酒店喎，咁嚴重？﹗
返屋企明明可以唔駛經過屯門市中心，但一睇google map，似乎係市中心區既狀況，影響到屯門公路都塞死晒，真係暫時返唔到去~唔好理住啦，我哋坐低俾曉瞓啦~原本想俾詩詩奶奶，等佢都一齊瞓，點知奶完又彈起身唔瞓覺~呢個時候發生小插曲，話說詩詩一彈起身時，有個途人話：「哇，佢流鼻血呀~」當時詩詩背住我，我記得食完午餐，佢係有啲西瓜汁既漬未抹得乾淨，所以我隨口應咗嗰位好心既女士，「唔駛擔心，抹咀未抹乾淨啫~」一轉番詩詩過嚟，真係流鼻血﹗﹗不過已經停咗，基本上抹乾淨之後就冇再滴出嚟，嚇親媽媽啦~
既然詩咁精神，就同我去玩啦~因為我哋坐旋轉木馬同小熊維尼時，詩詩都瞓著咗，我睇下而家駛唔駛排隊，如果好快有得玩就同佢玩多次，所以直接去幻想世界~噢，而家兩樣都要排，今日未玩過既小飛象都要排隊﹗結果我哋兩母女去咗玩唔駛排隊既「米奇幻想曲」~
自己戴就戴成咁…
似fashion造型多過3D眼鏡﹗
呢隻手掌其實係詩詩既「yeah」嚟架~
靚靚合照~
詩詩睇得好留心，但佢似乎唔太鍾意戴眼鏡，咁你睇show時咪好似散光咁囉？有兩個影﹗又冇立體效果~可能要等多一兩年大個少少先識得戴住嚟觀賞~
我同詩詩兩個人出動時，碰到貝兒公主呀﹗不過好長龍，而且詩詩應該唔識得興奮，而我嘛，意見同曉一樣，我覺得公仔既公主靚過真人既公主呀…
想買啲凍飲，我正考慮買咩時，詩詩就開始眼瞓了~咁算啦，我哋返去探險世界既大本營搵番爸爸同家姐啦~
返到去時家姐啱啱醒，呆呆滯滯，搞咗好一大輪先清醒番~家姐準備好，就爸爸抱詩詩繼續瞓，我哋一齊出發啦~估下我哋去邊度玩？冇錯喇﹗又係玩多次「米奇幻想曲」~哈哈~
爸爸趁機會小休一陣…
曉就識得正正經經咁戴住眼鏡嚟睇喇﹗佢一如既往，睇親show都會非常專注，專注到近乎嚴肅，當其他小朋友會伸隻手去摸啲寶石時，佢依然郁都唔郁，但到個show結束時，就話唐老鴨飛咗去個窿度好搞笑~我哋睇米奇幻想曲時，因為音效好大聲，詩詩都醒咗啦~
其實睇完show時都六點幾，所以決定先搭車出番青衣食晚飯，之後進可攻退可守，返到屋企就返屋企，返唔到屋企就住酒店啦~我search咗啦，青衣既兩間酒店有房呀，三人房連早餐都係四百幾蚊一晚，萬一要住就係青衣城買少少替換衫同埋日用品啦(買呢堆嘢仲貴過住酒店)~不過我完全冇向曉透露可能會住酒店，免得佢太興奮，冇得住要返屋企時會太失望~
離園前當然要去紀念品店啦~曉可能都feel到我唔會買玩具/公仔/大件既嘢俾佢，所以佢揀咗公主髮夾，我叫佢同詩詩、逸逸分佢都好樂意~我本身係其他紀念品店見到有特價小童泳衣，想睇下要唔要揀定俾佢哋下年夏天著，不過美國小鎮大街既紀念品店又冇喎，咁算數啦~其實曉見到啲公主裙有雙眼發光，但你自己唔出聲，就唔會有討論落去既下文架啦~所以今次都冇大出血~
搭鐵路出去青衣都順利~係車上檢視戰利品~
返而去到等位食飯等得耐，因為我哋堅持要等好耐冇食過既丼丼屋~
終於入座﹗
曉：影我啦~
都好丫，兩個超級攰既小朋友食烏冬會食得叻啲，我又可以食刺身飯(俾曉食咗我好多刺身，好在加咗錢配咗刺身set)，最重既係？可以兌現食雪糕既承諾囉~
丼丼屋有兩款雪糕，焙茶雪糕同埋米雪糕，佢哋當然食米雪糕啦，口感好得意，真係食到一粒粒米係入面架~
我哋出番青衣時，其實返屯門既路已經暢通晒，所以我哋好順利咁返到屋企啦~唔駛(冇得)住酒店lu~下次早有預備時專登book靚靚既度假酒店仲好過啦~