屬於公司活動，今日可以免費去迪士尼﹗最期待既係我同曉曉兩個，day未出發已經覺得會好攰，詩？未識期待吧？有得黏住爸媽姐就好了~今年生日原本計劃去海洋公園，仲約好咗爸媽家姐一家打算一家九口一齊去，點知我眼睛發炎+曉發燒取消咗；又原本計劃暑假結束前去迪士尼，點知曉又發燒又取消咗；再講番早啲，嗰次詩仲係我肚入面時我哋去咗住迪士尼既酒店，原本打算day 2入樂園玩，又係曉發燒所以check out酒店直接返咗屋企…點解咁一波三折呢？即刻搵番以前啲相先，原來住完酒店冇入園嗰次之後，一個月後我哋另外安排咗同曉曉入場玩，所以詩詩都有去過迪士尼架，不過嗰次係肚入面~
今次有得由屯門坐旅遊巴去，可輕鬆少少~講起今次既行程，其實天未光既五點己經開始，話說五點鐘時兩姊妹同時扎醒，詩詩後來瞓番，我都估到曉曉唔易瞓番，一來就快天光生理時鐘都知道，二來佢準備去迪士尼太興奮，詩詩爆片我要同佢換片換褲，搞一輪曉已經醒晒，安頓好準備再瞓，曉碌咗20分鐘左右，突然話：「太陽開始出嚟啦﹗」呢一刻我知道我要放棄了，咁起身刷牙洗面啦~曉又居然有個好好既提議：「不如我哋畫生日咭俾爸爸啦﹗」又冇詩詩騷擾，時間又充裕，真係好提議~我哋兩個好用心咁一人晝一張，正要寫到內容最尾一句時，詩詩就醒咗了~結果我哋三個玩到七點後就叫爸爸起身~換衫出門口，曉自己揀咗條Elsa裙，佢話佢一早諗好要著，哈，有準備﹗有見地~
所以呢，旅遊巴就好重要喇﹗因為全靠曉曉係車上瞓咗一覺，佢先可以玩得咁精神~車程好順利，好快去到迪士尼，但有啲人唔跟車出，我哋等齊人，影埋大合照先入場玩~呢個時候，本來完全唔熟絡既小朋友居然可一齊玩一陣，可能對方好熱情主動吧~
今日天氣好好，有好少好少既秋意，(我覺得)唔算太熱，全日陽光普照，好在帶咗個風扇仔俾怕熱曉，全日都叫做冇因為熱而發出奄悶聲~相信係受到近日香港既事件影響，相比以前既經驗，入場遊客係比較少，排隊等候時間都比較短~
我問曉想唔想好似其他人咁戴住米奇耳朵嚟玩，佢話唔想，其實最想佢戴嗰個係我，因為我自己都好鐘意，但又太可愛，女女代我戴就好喇~
但入到去，見到閃閃珠片蝴蝶結米妮耳朵，曉就愛不釋手了，而且仲好襯佢今日著既Elsa裙添呀~詩詩未識揀，我幫佢揀咗經典黑耳朵+紅色波點蝴蝶結，佢平時唔鍾意戴嘢係頭度，但今次見到鏡入面既自己，面上都露出喜孜孜既表情呢~不過詩詩都只係維持咗一陣就除落嚟，唔緊要，我戴，yeah~但再後來連曉都除埋之後，我都唔好意思繼續戴了，哈哈~
打blog既翌日，我問番曉邊個遊戲最好玩，曉首選明日天地既坐飛碟，第二係幻想世界既小小世界，可能因為係早上人比較精神既時候玩吧？印象特別深刻、特別美好~
坐飛碟
基本上下一轉就輪到我哋~
雖然詩詩係呢個呆樣，但一開始轉佢就笑笑啦~
11:45有一場魔法書房既演出，坐完飛碟，夠時間坐埋一次轉轉茶杯，跟住就要去排隊入場睇show啦~
睇show時兩姊妹都睇到好入迷，但詩詩開始眼瞓，一到少啲跳舞、演員少啲走動，唱慢啲既歌時，就係咁叫「奶奶呀」，但唱番啲起勁啲既歌時，注意力又去番舞台上面~睇完show，曉既comment係：「我覺得公仔嗰個Elsa靚過真人既Elsa呀~」哈，媽媽都同意呀~
劇場後面馬上就係小小世界了，我哋順便去坐埋~
小小世界
坐船仔好開心~
專心
係鬱金香呀，曉曉，你嗰組呀~(K.2曉今年嗰班所有組都係花既名做組名，佢係鬱金香組，另外仲有玫瑰花組、百合花組、向日葵組同埋綉球花組~)
睇完一次曉馬上話要encore，睇第二次時詩就瞓著咗啦~坐兩次唔算多，上次同曉嚟時好似坐咗三次~其實爸爸(day)同姨丈都好鍾意小小世界(入面啲冷氣)架~
抱住瞓覺詩，我哋坐咗旋轉木馬，詩詩坐完都唔知自己坐過…
好夢幻既畫面呀，靚~
曉本身好想直接去玩小熊維尼，但適逢巡遊表演時間，我哋去睇咗先啦~原來我記錯咗時間，以為係1:30開始，原來係1:15開始，我哋去到巡遊路線時已經開始咗啦，都好啦，睇到一半~
一去到，曉就話：「我唔夠高呀~」爸爸二話不說就俾佢騎膊馬…
我係旁邊睇落都覺得辛苦…
但原來爸爸好高興咁樣自拍咗囉~
再排隊玩小熊維尼，呢個詩詩知道喇，因為坐到中段就醒咗啦~
詩詩，多謝你借對耳仔俾媽媽戴~:p
坐小熊維尼既蜜糖樽探險~
醒咗就啱喇，去食午餐咯~我哋每次都捧場既Corner Café好多人，而對面既中菜又close咗，最就近既就係食漢堡包薯條既火箭餐廳，又貴又唔太好食，叫做坐得舒舒服服啦~
曉曉玩到又熱又攰，詩詩又學佢伏係檯面~
難得詩詩唔坐bb櫈都坐得又正經食得又乖~
jap jap jap~
小朋友水壺啲水飲晒，係火箭餐廳搵唔到斟水既地方，我記得bb房入面有水機，原來得熱水，照斟咗之後，職員有少少唔高興地話應該去餐廳斟，因為我斟咗啲熱水可能會煲唔切俾bb用，一問之下，佢話除咗火箭餐廳之外，全部餐廳都有水機，咁，火箭餐廳應該盡快安裝番水機了﹗
食飽飽，去廁所既去完廁所，換片既換好片，發現，哇，新既Star Wars主題Space Mountain唔駛排隊呀﹗﹗出發前我問曉可唔可以陪我坐過山車，因為佢今年夠高啦，佢話唔好~去到Space Mountain外面，有好多同佢差唔多大既小朋友都入去，佢見到係坐車車sir滑梯之類，佢就肯陪我入去~但…開始咗之後，佢好驚呀﹗出到嚟都猶有餘悸，對唔住呀曉，係我叫你入去陪我…佢話5歲唔再坐，10歲都唔再坐，30歲呢？佢呢一刻答唔到我住~
轉換下心情啦，我哋去咗探險世界坐船仔，玩叢林歷險之旅，噢，sorry，原來呢個都好驚呀？佢最驚唔係啲假蜘蛛假鱷魚，而係臨尾著火嗰度，差唔多喊咁滯，要爸爸攬到實~落船啦落船啦，唔駛驚啦~
咁不如去Toy Story嗰邊啦，應該冇咁驚既~曉完全唔考慮睇落有啲刺激既跳降傘，但彈弓小狗就ok~
彈弓小狗要排好長隊呀，呢個時候曉已經好攰，排隊排到變成一pat+奄悶，就快到啦，而家放棄好唔抵架~瞓醒冇耐既詩詩當然好精神啦~
輪我哋上車，即刻醒神番，曉仲話好玩添~
待續