早前留意到康文署「國際綜藝合家歡」既宣傳，我就睇下有咩節目啱兩個分別四歲同一歲半既小朋友睇，又要考慮入場年齡，又要考慮喜好，又要考慮日子同地點，結果決定帶曉去睇屯門大會堂舉行既「玩轉古典音樂會」~因為入場年齡最少要三歲以上，適逢公公婆婆去咗旅行，咁就由爸爸照顧詩詩，我帶曉曉去睇~
大backdrop太多人影，我哋同小冊子影啦~
其實曉曉都叫做第三次入場睇古典音樂，頭兩次都係香港小交響樂團既「寶寶愛音樂」系列，第一次去時曉曉都未夠一歲，嗰次個concert好多嘢玩，又有玩具又有樂器又有大合奏，小朋友可以離開座位又唱又跳，好似慶典一樣，非常開心，無奈當時曉只係個bb，未識行，得個望字~第二次去同系列既活動，嗰次詩出世冇耐，曉應該大概三歲，但嗰次就非常靜態，大會要求小朋友乖乖坐係座位一個幾鐘(曉坐係樓梯級都俾人趕番起身)，個指揮又不停用英文講解啲音樂(究竟個concert係for家長定小朋友？﹗)，甚至開到聲話如果小朋友太嘈可以帶佢出去，嗰次曉一直嗌住要走，我對個concert都好失望~所以都一直等合適既機會再帶佢去聽合適既音樂會~今次可以去聽「玩轉古典音樂」實在太好了，我睇咗少少宣傳短片就知道曉一定鐘意~
未開場時好緊張既小朋友~
「玩轉古典音樂會」係嚟自西班牙既恩波達室樂團，團員大約廿幾三十人吧，樂器只有小提琴、中提琴、大提琴同低音大提琴四種~與其話係音樂會，其實應該係戲劇音樂各佔一半份量；與其話台上面既係音樂家，其實佢哋應係演員﹗台上既演出只用音樂、肢體動作、表情嚟講故事，雖然冇語言冇對白，但都可以引到大家笑到卡卡聲，又可以引到大家拍手歡呼，非常厲害~
有一段演出係關於爭櫈仔，有一段係關於爭做指揮，有一段係關於指揮講電話，有一段係關於指揮指指下瞓著，然後啲音樂家趁佢瞓著就亂咁嚟~其中最精彩一段係電影主題曲medley，佢哋會演出電影既經典橋段，用樂器製造音效，有時先音樂後演出，有時先演出後出音樂，總之令人拍案叫絕，不過用既電影比較舊，可能要爸爸媽媽們先識笑，小朋友覺得有趣純粹係因為佢哋搞笑既動作同表情吧？另外將氣氛推至高峰既一段係，指揮教大家打幾個節奏，大家一齊練習好幾次本來都好興奮好開心，但更令人雀躍既係，原來啲節奏可以配合入去之後演奏、大家耳熟能詳既古典樂曲入面，全場大合奏當然開心啦~
不過有一段搞到曉曉爆喊，事關台上既樂手突然間衝落觀眾席，邀請大家上台參與下一個環節，我乜都冇做過，大提琴樂手非常自然地拖咗我上台參加，我受寵若驚地跟咗上去，冇諗到曉會馬上爆喊，但我發現曉爆喊時我已經坐咗上台度，唯有頂硬上，陣間再呵番佢…個環節係，我哋啲觀眾們坐係樂手既位置，然後佢哋匿埋係我哋背脊後面代彈，但台上面幾乎都係小朋友，好似得我一個大人？﹗點解咁榮幸揀咗我呢？我一直心急如焚想快啲去呵番個曉，一曲快樂頌完成，我就唔理咁多跳咗落台衝番埋個位度~好在曉好快都冷靜番，投入番去欣賞個演出~
演出只係1小時15分鐘，剛好適合小朋友既耐性，離場時原來樂手們出咗去大會堂既大堂，繼續演奏多一曲，一邊跳一邊彈，好好氣氛，最後佢哋企去backdrop前面俾大家影相~大家可以撈埋汁先返屋企，離開大門口時個個都笑咪咪呢~
演出非常成功有魅力﹗﹗下年都要再留意國際綜藝合家歡既節目呀~
「玩轉古典音樂會」介紹：
https://www.hkiac.gov.hk/2019/tc/concerto.html
恩波達室樂團官方網站：
http://www.concertoumore.com/concerto_CAT.html
恩波達室樂團Facebook專頁：
https://www.facebook.com/orquestradecambradelemporda/