6-7-2019:曼谷華欣暑假快人一步親子遊day 8.善用酒店設施、返香港lu

曉成晚都冇再嘔都係好事,day 7去唔到既Kidzania其實我同曉都未死心,如果一朝早狀態非常好,又冇唔舒服,我哋都照去玩一陣啦~

我哋執好晒行李,拎埋行李落lobby度寄存,先去食早餐,前枱職員同我講,即使check out咗都可以去食早餐架,但我哋就先保留用間房既權利,因為唔知會發生咩事嘛,出去玩就話check out啫,如果出唔到去玩就要返房咯~

點知,係就係冇嘔,但食早餐時曉已經肚屙咗一次,算吧算吧,唔去Kidzania啦,唯有同佢講,下次等詩詩都大個啲,或者約埋逸逸先一齊去啦,曉先冇咁失望~

唔出街就返房先啦,個電視係網絡電視,可以開到youtube,打算開啲Peppa卡通片嚟睇~

首先搵到啲新既英文Peppa,雖然曉聽唔明,但因為有啲新角色,佢都好興奮,有冇人可以話我知隻長頸鹿叫做咩名呀?佢係幾時開始出場架?

睇咗好多電視之後,曉又暫時冇屙冇嘔,我同兩個小朋友落去酒店遊戲室玩一陣,爸爸放假食完早餐如果冇咩嘢做都會自動好眼瞓,趁我仲有體力就俾佢眠一眠啦~

其實當初book呢間酒店,除咗個洗衣機之外,另一樣好吸引我既就係有遊戲室~結果住咗咁多晚,臨走先第一次去玩~

冇筆既畫板,只有少量ABC磁石可以貼貼貼~

架紅色車車好難踩呀~

呢個少女係度做緊咩?

玩具唔算好多,曉玩咗一陣都話悶,但玩具係死既,人個腦係活既,我哋用啲咕臣、毛公仔、玩具、滑梯等等,整咗個障礙賽,玩到好攰呀~後尾有個大個少少既香港人小男孩,好想同曉詩兩姊妹一齊玩,但一來又唔用說話嚟同佢哋溝通,玩既時候又唔識得「憐香惜玉」,另一方面阿媽又過份保護怕受傷,睇到人好攰~我哋玩咗一段時間爸爸就加入啦,爸爸來得好﹗因為爸爸嚟咗冇耐,曉又屙多次了~慘慘曉~

玩到差唔多時間要check out,我哋就出發去機場了,係遊戲室度放晒電既兩隻,係車上當然呼呼大睡啦~

兩隻豬仔~

去到太早未寄得行李住,我哋先搵個地方食午餐,行嚟行去,叫做搵到間食日本嘢既餐廳,希望佢哋食啲烏冬會食得好啲,但曉完全唔開胃,一啲都冇食過~味道就麻麻地喇,總算坐得舒舒服服填飽咗個肚~因為大家都太愛芒果糯米飯吧?無論係咩餐廳,都一定有得賣芒果糯米飯,我哋食嗰間日本餐廳都有~有兩個香港遊客,似乎想買啲芒果糯米飯返香港做手信,係度打量我哋食嘢嗰間餐廳,真係好想同佢講,呢間啲食物麻麻地咋,你再考慮下啦,哈哈~後尾我哋都有買咗芒果糯米飯返香港,係入到去登機閘口附近既商店度買,我哋返到香港第二日先同爸媽佢哋分享,睇落硬邦邦既糯米飯,食既時候居然都仲好軟熟喎~都係嗰句,唔可以同三父女分芒果糯米飯丫,三個淨係食芒果,結果我要食勁多飯先有少少芒果,咁個balance好重要家嘛~

過咗關入咗禁區就會見到呢個大型雕塑,上次同家姐嚟泰國都有影到相~

曉午餐食得少,幫佢買定個三文治,肚仔餓時先食~我又同day買咗兩杯咖啡,消磨下時間~

因為早咗到,好多時間食下嘢、玩下~

Baby爸爸,baby爸爸,where are you? Here I am. Here I am. How do you do?

終於可以登機返屋企啦~詩詩呢程飛機都有瞓覺呀,我可以睇下電視,因為時間唔夠,睇唔到電影,我記得我揀咗個紐西蘭既飲食節目,呢集講兩個主持人去上海學整小籠包,都幾有趣,後來返到嚟香港,原來香港都有得播呢個節目呢~好啦,泰國之旅嚟到呢度就完滿結束啦~

Grande Centre Point Rachadamri網站:

https://www.grandecentrepointratchadamri.com/

泰國之旅完滿結束

前往其他泰國旅遊blog

Comments

comments

發表迴響

你的電子郵件位址並不會被公開。 必要欄位標記為 *