5-7-2019：曼谷華欣暑假快人一步親子遊day 7(part 1)．Sea Life曼谷海洋世界、Lukkaithong Royal Cooking

如果search曼谷既親子景點的話，Siam Paragon入面既Kidzania一定會入圍，去過既人都一定話好正，小朋友玩到唔捨得走等好評，Kidzania係提供模擬工作體驗俾小朋友，target為幼稚園生至小學生，好似曉咁大既小朋友都好鍾意~其實係媽媽我自己好有興趣，所以暗地裡好想曉去玩，出發前我俾曉睇去過Kidzania既小朋友既相，講俾佢聽有咩玩，大概會係點，佢果然好有興趣話要去~但有兩大難關，第一，參加每一個體驗職業其實佢要自己入去，爸爸媽媽只可以係外面等，透過玻璃窗睇住佢，以膏藥曉嚟講係好大挑戰；第二，嗰度啲職員只會講泰文同英文，唔會講中文，我游說佢時就話，好似Miss Bonnie同你上英文堂咁之嘛，有時你唔聽得明晒佢講咩，但你都知道要做啲咩~係我強力推薦之下，曉都變得好想去Kidzania了﹗

所以一大早食完早餐，我哋就係Siam Paragon商場開門之前去到等候了~正打算買飛入場時，職員好鄭重咁告誡我哋，話今日有1000人團體嚟校外教學，相信每個職業體驗等候時間會長好多，1000人真係好多丫﹗當每個職業體驗係15-20分鐘既話，可能排隊時間仲多過玩既時間，我哋諗一諗，我哋翌日last day其實仲有一個上午，如果好efficient咁玩一個上午，可能比起係咁排隊玩成日更好，同曉商量好之後，決定今日先去其他地方玩~

為咗令到第二日可以暢順地check out酒店、玩Kidzania、pick up行李，我哋仲專登花咗啲時間explore下Siam Paragon有冇寄存行李locker或類似服務，原來locker就冇，但嗰度有一間鋪頭可以寄存行李，甚至可以幫你寄埋行李去機場﹗硬件了解咗，正式點樣安排都係再諗諗先~

話說我哋由抵達Siam Paragon，以至搵路去Kidzania，然後又去搵locker，再去以下既景點，中間又輪住要去廁所，總之係個4/F、5/F度行咗好多轉…

我哋係商場行嚟行去行咗好多轉~

其實幾年前同家姐嚟旅行時都有嚟過Siam Paragon，但今次既印象特別深刻，就係，我終於明白點解變成媽媽太太們咁鍾意同啲閨密嚟曼谷旅行shopping，因為大家都咁鍾意做spa(啲老公通常一般鍾意)，大家都咁鍾意行街買嘢(啲老公通常一般鍾意，而且戰鬥力薄弱，唔係指錢方面，而係指體力方面)，曼谷啲嘢實在又平又靚又精緻又多選擇﹗﹗﹗同埋老公仔女一齊真係好難慢慢睇、慢慢買~到咗我可以自己出走三日左右，曉詩都唔會喊住搵我時，我一定要再嚟shopping呀~

既然已經嚟到Siam Paragon，梗係去全東南亞最大既海洋水族館Sea Life曼谷暹羅海洋世界啦~之前網搵資料時知道，可以經Klook買門票，即買即用，平過係櫃枱買飛好多，又唔駛排隊~套票有幾種，有啲係淨入場，有啲就包括4D電影等活動，因為我哋小朋友太細，其他活動全部未啱玩，就咁入場就夠了~

點解呢個商場啲路咁難搵？

終於搵到入口了﹗

我去處理門票事宜，day就同曉周圍影相﹗雖然話Klook有特別櫃枱，似乎我都搞咗好耐，佢哋先可以影到咁多~

我同詩詩加入啦~

Sea Life海洋世界好大，入面海洋動物種類好多，魚類到無脊椎類到甲殼類到兩棲類到哺乳類樣樣都有，睇得曉都好有興趣~

魚~

蟹~

曉曉看海馬~

海馬個水池入面有啲浮游粒粒，係咪海馬既食物？定係便便？仔細一睇，原來係bb海馬呀﹗﹗佢哋好細粒呀~

曉曉看熱帶魚~

bb企鵝呀﹗曉一直問幾時有好多企鵝，但逛水族館要跟住參觀路線行嘛，想急都急唔嚟架~

蛇明明唔係海洋生物，但都有得睇﹗

仲有啲花喱花碌，睇嚟好毒既青蛙添﹗令我諗起之前玩過一個幫青蛙配種既game，目標要儲晒唔同款式既青蛙，當然有唔同難度，有啲常見有啲罕見咁啦，後來玩玩下又放棄咗lu~

佢叫做鱉吧？

有大型隧道，可以多角度觀賞海洋生物~

又有小隧道，俾小朋友同大朋友捐入去觀賞海洋生物~

Hello Hello~

我哋仲欣賞咗兩個餵食show，曉最有興趣既唔係內容，而係個導賞員幾時講英文幾時講泰文~四歲曉好有趣，廣東話非常流利，英文只係有限公司，普通話基本上唔識講只識唱幾首自己識既歌，但佢可以「講英文」同「講普通話」，內容係「邱曉文」，你唔知佢講乜，但真係捉到英文同普通話既神髓，如果佢英文同普通話輪住講，你會分到架，見到佢時叫佢講下你哋聽啦~