雖然冇落水，但兩個小朋友去完沙灘又坐又跳點都要換件衫先瞓覺，咁不如換套新嚟睇下啦~
紫色同綠色都好好睇喎~
陪兩個小朋友瞓晏覺，我基本上都會一齊瞓，但今日係熱醒咗，其實之前收到酒店通告，話今日下晝2-4有維修項目會停電，冇冷氣之下我就熱醒咗啦~兩個小朋友繼續瞓，day就set up咗小風扇吹下佢哋~停電冇得睇電視，連酒店wifi都冇，好在我哋自己有上網咭，可以篤篤篤電話~中午落過一陣雨之後，下晝停雨又漸漸好多人去游水lu，出面一樣吵吵鬧鬧的，停電令大家更加往外跑吧~
瞓醒晏覺，通常曉都要啲時間慢慢清醒，但如果有啲吸引佢既嘢就可以即刻彈起，要係佢耳邊講關鍵字，例如「去游水好唔好」之類~冇錯，我哋既下晝節目就係再享用多一次個酒店泳池~我哋又採取相同既路線，由family pool落水，捐過橋底個窿去teen pool sir下滑水梯，跟住去loop pool游一圈，再返kid’s pool玩玩水~但我同詩詩游水好快就要腰斬了，因為詩詩玩得一啲都唔暢快，係咁要黏住我，一落地就喊，後來我估因為落過雨，有啲凍，所以佢先喊喊~唔怕凍既曉就一啲事都冇，所以兵分兩路，我同詩返房沖身，day就同曉繼續游~
詩真係好凍丫，沖完暖水，著番晒衫再加埋長袖外套都仲凍﹗
跟住我哋出番去池邊，問職員拎兩條暖毛巾，我包住佢攬住佢等佢快啲暖~
結果佢自己揀咗最有效既方法—-奶奶~我抱住佢俾佢啜啜一陣奶奶，慢慢就暖番晒啦~嚇死媽媽，凍冰冰咁耐~好在冇病咋~
曉都好犀利，後來又落番雨，佢哋兩父女都仲玩得好開心，難得我係岸上，就幫佢哋影下相啦~
兩父女踢踢踢水~
呢個沙灘假期應該係曉最後一次用水泡啦，下個暑假，佢應該可以乜都唔駛戴游得好好了吧~打blog呢一刻簽到魚仔第五格，魚仔第六格之後就開始海獅，完晒海獅就學識自由式同背泳，之後到青蛙，之後到魔鬼魚同龍蝦，最後係海豚~呢個次序我哋成日都數，曉自己都好期待將來游得好叻，叻過我呢~
有個籃球架係泳池度，我都投過幾次籃，原來好難丫﹗day你又有冇入球？
游到時間差不多兩父女都上水返房沖身換衫，我哋今晚再去Market Village食晚飯行街~其實本來打算華欣既三個晚上搵其中一晚去筷子山嗰邊睇日落+食海鮮，睇人哋啲相好靚咁，但今日一直天濛濛，天色只會晚晚變暗，完全唔會有日落嗰種金黃色既天空，加上先一晚已經叫做食過少少海鮮，專登搭車咁遠既動力大大降低，算數啦，去Market Village近近地可以仲多時間行下街~
今晚我哋決定食下扒，呢間鋪頭有個自助沙律吧，原來叫一份扒就已經可以任食，我哋叫咗兩份main course，簡直就係二人價錢四人同行﹗﹗﹗
好多嘢食既自助吧~
除咗有非常豐富選擇既沙律之外，有好多款湯、甜品同水果，實在太好了~當然自助餐冇酒店嗰啲咁精緻同豪華啦，但品質都好好，兩父女繼續食好多甘筍條﹗﹗我見day曉兩父女咁鍾意食甘筍，返到嚟香港都專登買咗俾佢哋食，day都話，泰國啲甘筍好味啲，無論係酒店定呢間半自助餐都係~可能泰國真係農業大國，好多嘢都係國內生產，樣樣夠晒新鮮，好多蔬菜水果都比香港嗰啲好味，我諗沙律菜特別明顯吧~平時係香港食自助餐或者去其他地方旅行食自助早餐，我都會夾少少沙律菜，極其量可能夾碟既四分之一左右，但今次嚟到泰國，我啲自助早餐夾既沙律菜，一日比一日多，因為真係好好味~而且內容好有心思，除咗一般既葉菜、蕃茄、青瓜、粟米等等常見食物之外，有見過薏米，又有見過藜麥，又有見過輕輕燙熟既西蘭花，醬汁亦好多變化，令沙律更吸引~
湯方面，小朋友可以飲忌廉湯時，我可以飲冬蔭公湯，各取所需~
詩最近都自己飲湯飲得叻叻，不過泰國旅行期間有打爛碗既不良紀錄，要小心啲幫佢扶住個碗~
主菜雖然唔算特別有魅力，但牛扒都幾好味既，擺盤靚，食得都開心~
叫俾小朋友既海鮮main course都好受佢哋歡迎，三文魚同蝦佢哋都肯食之餘，人氣no.1既其實係個焗薯囉，哈哈，又係焗薯贏咗~
比較遺憾既係另外叫既飲品，我哋個花生奶茶實在太太太太太太太甜，個「太」應該要x100先夠多，我加咗水落去，等啲冰再融多啲都唔係好飲到…甜得太嚴重~
我估小朋友飲既西瓜冰沙應該正常好味既~
今次比起「飲呀飲呀飲呀」(17m詩詩講既飲品)，應該甜品更吸引，佢哋超鍾意個超甜既朱古力mousse，食到要倒轉個兜兜~
埋單時送咗好耐冇見既綠箭薄荷糖，曉躍躍欲試，試下啦咁，結果…食唔完，頂唔順~
我哋食飽飽其實只係八點鐘左右，但餐廳已經得番零星幾枱客人，後來我哋行完街先知，原來商場好早關門，一到九點鐘就全部鋪頭落晒閘~我哋晚飯後逛逛街，我哋行咗家品店HomePro，好大間好大間既鋪頭，大小電器、衛浴設備、傢俬、小家品等一應俱全，估唔既係我哋居然都有收獲，買咗兩對窗簾，之前買窗簾都係去IKEA，比起訂造窗簾平，但全部都係落地長度，要拎出去俾人改，又要花錢又麻煩，今次係HomePro見到有短身窗簾啱啱好，款式又靚，返到嚟掛起咗好好睇呀~綠色遮光窗簾睡房用，希望大家午睡瞓得好啲，白色半透明窗簾就客廳用，明亮啲~
揀窗簾~
我係度同曉不停講「原來泰國人既浴缸係咁既」、「原來泰國人既座廁係咁既」、「原來泰國人既雪櫃係咁既」…(下刪100樣貨品)day眼中係同公司有關既東西，佢對啲冷氣機好有興趣，影咗一大堆，哈哈~
我都話你最鍾意LED架啦~
我哋另外有收獲既就係再去超級市場了，上次我自己買咗泳衣，今次終於揀咗一套俾曉，返到嚟香港發現多一套泳衣都好，因為佢而家又學游水，我哋又會自己去游，有時都未必洗得切~另外就係，原本嗰套泳衣佢唔係好自己著到除到，因為過頭笠又有少少窄，一定要大人幫手，今次套新泳衣係前面拉鏈，佢可以自己著自己除，咁萬一只有爸爸帶佢去學游水都可以自己入女更衣室換，唔駛跟住爸爸入男更衣室啦~
女孩子們開心shopping~
話說我哋係超級市場俾錢出嚟時，個商場已經變成黑麻麻，原來商店九點就關門，我哋急急腳就啦~
返到酒店即刻試晒啲戰利品上身，有小馬寶莉泳衣同埋拖鞋，仲有頸鍊手鍊裝添呀~其實曉曉本身想揀Elsa泳衣多啲，但我說佢揀小馬寶莉，咁香港好多Elsa嘛，個個都一樣，小馬寶莉佢都鍾意，特別啲嘛~
HomePro網站：
https://www.homepro.co.th/?lang=en
待續
前往其他泰國旅遊blog