經過第一個早上排長龍食早餐，我哋第二個早上決定直接去另一間餐廳—-Big Fish﹗

大中小手拖手，出發﹗

結果都係要抱住無定向周圍走詩，先可以順利去到餐廳~

哇，去過就發現，根本唔應該去大餐廳Amber Kitchen，因為Big Fish景觀一流，落地玻璃同華欣沙灘係零距離，而且可能因為客人少，職員都特別殷勤~

無敵落地大玻璃海景~

好明顯我心情即刻up~

豐富食物~

食物方面，有自己出去拎既自助餐，一個corner有沙律吧，一邊有麵包pastry蛋糕等等，熱食係室外，近廚房嗰邊有啲cold cut、芝士等等~

要特別講既係一個飲酒corner，我趁唔駛餵奶，斟咗一杯香檳嚟飲，但飲咗一杯之後都覺得食早餐飲酒唔係好對路，哈哈~嗰度仲有得俾你自己調酒，其中有蕃茄汁、volka、甘筍條、西芹條、檸檬角俾你自己調bloody mary，我哋之中冇人有興趣飲bloody mary，唔飲酒既day斟杯蕃茄汁嚟飲時，都婉拒咗staff提醒有volka既好意，但更搞笑既係我哋有day小白兔同埋曉小白兔，兩父女差不多食晒人哋啲甘筍條﹗﹗﹗

食物除咗可以出去拎之外，仲可以order，自選雞蛋啦、湯麵啦、waffle等等，最犀利居然可以order生蠔﹗﹗﹗

其實你厚面皮+唔怕肚痛係可以無限嗌~自從我哋放寛俾曉食壽司時可以食魚生之後，佢越嚟越鍾意食生嘢，今次我冇特別邀請佢，佢都主動話想試下生蠔，佢好似冇話特別鍾意食，不過既無扁嘴，亦無encore囉~飲品方面，果汁既選擇的確比Amber嗰邊少既，但兩個小朋友有得飲椰青水就好高興，我哋既咖啡茶當然無限添飲啦~

話說食Big Fish早餐既兩個早上，曉都要幫襯個餐廳廁所，廁所入面有香薰，講緊係真正要點蠟燭係底嗰啲香薰，特別有格調~

不過我話，唔可以帶埋詩入去丫，佢一定會搞，又要去廁所又要捉住佢就好唔得閒~

食飽飽我哋就去Kid’s Club了，因為我哋打算今日俾曉試下參加活動，幫佢預約咗第一堂整鎖匙扣同埋第二堂整風鈴~係電話度溝通時話，可能小朋友太多既話，家長就唔可以陪同，我有同曉預告要佢自己去，先一日佢話冇問題，但臨場又想縮沙~後尾啲staff都冇話要求家長要離開，我哋就四個人留晒係Kid’s Club入面，我就陪下佢做手工咁~

要自己行唔拖住既大個女詩詩~

第一堂既鎖匙扣係收費項目，曉可以揀鍾意既木牌仔，自己填色，之後職員會幫佢用啲小字母粒砌個名貼上去，封好膠面同釘上鎖匙扣就完成~

專心上堂既小朋友~

填色~

油得幾好~

成品嘛…塊面綠色既小男孩對我嚟講有少少衝擊~

上完堂睇人打機~

上完第一堂，我企圖想俾詩瞓一陣覺，但佢奶奶完就去玩，恐怕都係因為Kid’s Club太吸引~

第二堂既風鈴係免費項目，所以我哋兩個小朋友都參加咗~

不過難度太高，即使係曉都要爸爸幫好多手，詩簡直完全唔幫得手，佢最幫得手既部份就係難得冇搗亂~不過媽媽幫佢整其實自己都樂在其中，要用幼繩穿貝殼上既小窿，又要打結，又要穿珠珠，又要綁樹枝，要整得靚都要俾啲心機架~同枱有個七歳既小女孩自己嚟Kid’s Club，聽完導師教既之後，成個風鈴可以獨力完成，完來七歲同四歲既能力真係差好遠呢~

完成啦~

做好晒兩堂手工之後，我想再試下俾詩詩午飯前瞓下，諗住用揹帶揹住行沙灘等佢瞓…

點知，沙灘都係好吸引，出到去就「落地」~算啦算啦，你陣間食嘢醒醒定定丫~我哋由酒店出去沙灘時可以留低啲鞋係酒店，但出去時職員要求你登記，同埋俾個手環你戴住，可能擔心大家會係海游水，萬一有意外知道有邊個落咗海之類？

曉攝影師既大作~

筷子山方向，可以行到好遠~

另一邊都見唔到盡頭~

呢個時間既沙灘冇人兜客騎馬，曉終於可以自然啲享受下個沙灘~華欣海灘既沙好幼，踩落去好舒服~兩父女又拍拖啦~

等我都同詩詩拍拖啦~

一去到沙灘就想坐低玩~

兩個一齊玩沙好可愛~

你哋整緊咩呀？

冇話整啲乜呀，不過成手都沙就好開心~

漫步沙灘既詩，好似個小仙女呀~

我哋一邊向海既方向進發，經過好多貝殼碎片時有少少拮腳，但都唔影響我哋前進，反而去到地下有好多窿窿既地方我哋停低咗~我哋兩個大人都好清楚，有咁多窿窿一定係有小生物住係裡面，但究竟係乜呢？

我哋靜靜地企係度觀察一陣，原來係好細好細隻既蟹仔呀﹗﹗之後連曉都見到了~我哋睇咗一陣蟹仔打算繼續前進，但曉郁唔到，原來佢怕踩親啲蟹，太可愛了﹗你唔駛擔心架，照行就得架啦，佢哋會匿埋保護自己架啦~

我哋行到去到海，用腳感受下海水，都唔算真正玩水，好快就開始落毛毛雨啦~

開始有雨我哋拿拿聲返去酒店，洗腳，著鞋﹗既然時間都晏晏地，索性又返去Big Fish食埋午餐先咯~

菜單基本上同尋日既Pool Bar一樣，我哋揀啲唔同既食物啦，今次揀咗小朋友最愛既「芝士麵」(白汁既pasta類)，叫咗個兒童餐單既fish and chips，另外叫咗個tortilla，即使兩個小朋友唔食佢哋都有足夠既食物選擇~今次tortilla既side揀咗sweet potato wedge，轉轉口味~

樣樣食物都好味呀~呀，當然唔少得再叫下啲特飲啦，正﹗

要特別記低呢件事﹗詩詩本來用手抓啲長通粉嚟食，點知發現好熱﹗佢就自己拎起隻叉嚟拮，好叻女呀~

食飽飽我哋要返房午睡lu，瞓醒再活動﹗

待續

前往其他泰國旅遊blog

Comments

comments