由食完池畔lunch到沖完涼之後開始，我所努力為既都係要進入呢個旅程我其中一樣最期待既項目—-spa﹗﹗決定去泰國旅行，某程度係因為我好懷念泰國既spa，而究竟要係旅程既邊一個位置攝個空隙成全我呢，就考慮咗好耐~究竟係曼谷既酒店spa丫，華欣既酒店spa丫，幾辛苦都要去番我上次超鍾意既Oasis Spa丫(請參閱：19-8-2013：即興曼谷day 4．至高享受Oasis Spa)，兩間酒店步行距離既day spa丫，定係附近既酒店spa呢？為咗令day唔好咁辛苦，我都係決定去華欣酒店既Quan Spa了﹗其實Quan Spa係酒店Spa既品牌，以前去海南島三亞時住Renaissance都去過Quan Spa(請參閱：1-10-2012：三亞悠閒遊day 2．全程hea@Renaissance)，印象質素好好，不過係貴囉，我之前上網睇過華欣Mariott Quan Spa既Spa Menu，冇我最鍾意嗰啲好長好多項目嗰啲Spa Package，係有少少可惜~

Anyway，我出去歎之前，要先令小朋友瞓咗覺先~

兩個沖完涼換好衫既乾淨寶寶﹗

要令曉容易瞓覺既方法，當然係要將詩移離現場，何況佢午飯前先瞓過，肯定冇咁快瞓覺住~

曉咁攰都好快瞓著，太好了~

我就message呼喚去咗playroom既兩父女返嚟，等day又瞓一陣，跟住先夠精力看住兩隻嘢~

呢段時間就變咗我同詩詩二人世界出去行街了，其實都只不過係酒店範圍內活動~

同媽媽二人世界﹗

周圍爬周圍走既詩詩~

今次係岸上面影，更清楚影到滑水梯泳池既局勢~

呢個就係曉努力游游游既family pool~

跑呀~

如果朝早起到身，可以係酒店大草地參加啲免費運動小組~

宴會廳、會議室外面既休憩空間~

睇下泳池，睇下花草樹木，explore下未去過既區域等等，最後一站係去泳池拎杯檸檸冰水嚟飲，哈哈~hea到差唔多3:30就返房啦，因為我約咗4:00 appointment，要提前早啲去到~

不過令我失去預算既係，嘈嘈詩一返到房就嘈醒家姐﹗﹗oh no no~~~~~~曉又未瞓得夠，我又要出去，點算好？好在曉而家大個咗，都冇喊，媽媽出發啦~

Quan Spa

見到呢啲擺設即刻感受到一種寧靜氣氛~

去到Quan Spa，職員先招呼我係大廳坐低，食咗個乳酪甜品，飲咗杯嘢refresh下先~我揀咗做兩個鐘既自選套餐，可以揀一個鐘既wrap或者scrub，加一個鐘既massage~我想趁機會relax + 變靚少少，揀咗scrub，可以有滑滑皮膚，然後嚟到泰國當然係要做泰式按摩啦~scrub可以自己揀料，我問職員邊一種最滋潤，佢就話芝麻同芒果都比較滋潤，我就揀咗芒果喇﹗成個Quan Spa係地庫，treatment房基本上係冇景觀，雖然話房間好大好闊落，裝修好似酒店咁靚，但點都及唔上有太陽光入嚟又有半露天shower既Oasis Spa咁正~治療師係好專業既，泰式按摩好舒服，我出發前扭傷腳嘛，呢幾日小腿比較繃緊，按完就鬆晒~我覺得scrub連shower整整一個鐘有啲太長，如果可以延伸到兩個半鐘有scrub+wrap就更好了~可能因為唔想有酒店住客book唔到treatment影響印象吧，所有spa package都好短~

煥然一新﹗

做完treatment之後，換好衫再出番去大廳，享用曲奇餅同埋茶，呢個放鬆小break就結束啦~(原來我食晒啲餅先記得影相)

返到房，原來三父女完全冇離開過間房，詩詩又未瞓覺，淨係睇電視同玩「幕幕」(用被嚟整帳幕)~第時你哋兩個再大個啲，可以同爸爸去有趣既地方長啲時間，媽媽就可以做長啲既spa啦~

既然已經六點幾，我哋出發啦~今晚去華欣夜市﹗

我哋係酒店附近搵篤篤，今個旅程搭既第一次篤篤其實唔算「經典篤」，經典篤應該係電單車+蓬頂+後座座位，我哋嗰架係「汽車篤」~

之前逸逸去泰國旅行，番嚟講坐篤篤、坐篤篤，已經令曉曉趨之若鶩，即使今次只係坐汽車篤已經夠令佢開心了~我原本都擔心坐篤篤會俾人壓榨，雖然知道有冇做到水魚，但感覺俾錢俾得舒服就算了~

華欣夜市

有諗過去華欣夜市掃街當晚飯，但去到睇到個格局發現唔太work，原來華欣夜市規模唔算大，熟食攤檔比例唔算好高，食物安全係一個考慮，但最重要既係，原來呢度唔似台灣啲夜市咁，熟食攤檔唔會附設簡單枱櫈，要食就真係要行住食，我哋帶住兩隻真係唔係好搞得掂，同埋去到夜市冇耐詩就瞓著，所以都係坐低食好啲~正好有啲海鮮餐廳好落力咁出嚟兜生意，見有好多non-海鮮價既菜式就入去試下啦，何況我都好想試下呢啲roof top餐廳~

結果係揀咗我鍾意既一間屋頂，食物好唔好就唔知喇~

平時曉一定要黐住我坐，但佢去到餐廳坐低之後睇落戰戰兢兢咁，原來佢怕跌隻鞋落旁邊既屋頂，佢寧願坐爸爸旁邊，等爸爸保護佢~

呢一對前世情人呢，有冇咁痴纏…冇眼睇~

最後我哋都只叫咗餐牌入面既菜式，冇話特別揀咩海鮮，呢間餐廳最偉大既地方，係有得食焗薯，兩個小朋友都勁鍾意~而且其他食物樣樣都好平﹗味道整體算ok啦不過唔算有驚喜~炸魚個魚露汁冇上次間水上餐廳咁好食，粉絲蝦有少少鹹~因為詩詩一直瞓覺，我用揹帶抱住佢一邊食，雖然手腳冇咁自由，但反而可以享受一刻既安靜~詩瞓醒後全靠有焗薯，都算食得乖乖~

兩個著情侶裝不特止，仲由樓上sweet到樓下…

食飽飽我哋逛埋剩低既少少夜市，就由夜市盡頭既另一邊搭篤篤返酒店啦~今次終於搭咗經典篤，比較特別既係，今次架篤篤總共載咗七個人﹗﹗因為司機係一個媽媽，似乎佢要照顧埋兩個小朋友，所以佢既兩個小朋友同佢坐係前座我哋四個就坐係後座，做雙職媽媽真辛苦呢~

返到酒店仲有排忙，輪住沖晒好多個涼終於可以休息了~

待續

前往其他泰國旅遊blog

Comments

comments