2-7-2019:曼谷華欣暑假快人一步親子遊day 4(part 1).游游游、池畔午餐

華欣既第一個早上,我係四個人之中第一個瞓醒既,太美好了,我(以為)可以悠閒地坐下陽台,睇下書,享受一下真正既度假~

只有自己一個先醒咗既寧靜早晨~

享受一下個小陽台~

我係出咗去陽台度坐,亦有拎本小說出去,點知…影咗一兩張相,篤咗幾下電話,就有人出嚟搵我啦,媽媽真係好受歡迎~

咁?一齊梳洗去食早餐,跟住游水啦~當時我哋以為只有一間Amber餐廳serve早餐,所以二話不說就過咗去,咁大間餐廳居然要等位呀﹗﹗﹗因為知道大家會等得耐,所以餐廳門口有少少麵包同果汁,可以食住等,詩詩好快就躁動不安,原來肚餓﹗

佢明明唔特別鍾意食麵包,嗰個細pastry佢都好快咁食咗大半個~我諗起當年曉差唔多一歲時去台灣,我哋排隊食牛肉麵,曉超肚餓,結果食晒帶去救急既星星餅~今次等咁耐,小朋友都等位等到悶~餐廳職員呼籲大家可以去酒店另一間餐廳食早餐,我哋都等咗咁耐咯,聽日先去第二間啦~

個自助早餐果然好勁,最令人印象深刻既係鮮榨果汁種類之多,我同曉都飲咗哈蜜瓜奶昔﹗另外芝士迷曉都可以食到好多款勁勁芝士,連貴價又相對係自助餐少見既藍芝士都有,不過可能真係風味太強烈,我又夾得太大舊俾曉,第一次發現原來有曉食唔到既芝士﹗一來詩係門口等位時已經食到半飽,佢今日又特別黐身,我唔係好出到去拎嘢食,而曉呢就好怕啲識飛既小蟲蟲,wee嘩鬼叫,所以呢餐自助餐都食得唔太enjoy,之後兩日早餐都去Big Fish餐廳係正確既~

好在兩個小朋友食飽飽之後,有酒店職員派氣球俾啲小朋友,佢哋有得玩又開心番,我可以好好咁食下半集~

我可以慢慢歎埋杯茶~

食飽飽我哋就返房換泳衣去游水啦~我著咗尋晚係超級市場買既新泳衣,都幾好丫~我哋間房咁近泳池,決定唔帶咁多嘢出去,放低幾支水係我哋個小陽台度,只帶房咭同Go Pro相機就出去~

估唔到啲泳池水都幾凍﹗我唔理咁多成個人跳咗落水,順道抱埋兩個小朋友落水,day就遲遲都落唔到水,哈哈~玩落就唔凍啦~今次幫兩個小朋友都帶咗水泡,打blog時相距未夠一個月,但曉己經進步咗好多,而家同佢落樓下游水既裝備係手袖同埋游泳鏡呀,係腳可以踩到地既泳池佢已經唔需要水泡lu~我哋係family pool游一陣就急不及待要去explore下其他泳池了~

由family pool游過(其實係爬過)一條行人橋既底部就去到叫做teen pool既滑水梯泳池~

落嚟啦,你有水泡唔駛驚啦~

有兩條滑水梯,其中由高處sir既單人滑水梯速度都幾快,連我都覺得刺激,而有一條好闊既緩坡滑水梯就適合男女老幼,慢到我坐上去會唔識自己滑落嚟,要用隻腳撐下撐下先前進,所以好多小朋友索性跪係度sir,咁先夠快,我哋第一次玩呢條超慢滑水梯時曉都唔敢sir呀,係我同day拖住詩嚟sir,曉死命都唔肯,要行樓梯落去等我哋,fine~係後尾我同詩詩去咗瞓覺,得番day同曉兩個游時佢先敢sir~呢個真係一個好神奇既現象,曉黐住我就會乜都做唔到,同樣,我黐住day都會乜都做唔到,即刻好倚賴,day係度我就會殺唔到曱甴~得番曉同爸一齊就即刻勇敢啲喇﹗

超慢滑水梯,你睇,個小朋友簡直可以倒轉行上斜囉~

因為兩個小朋友冇話要encore sir滑梯,所以我哋就去試下loop pool,因為水深大人到地,所以好輕鬆,我哋推住佢哋兩個水泡,行下又得游下又得放下手又得,好free~

Loop pool游游游~

兩個都要媽媽~

沿途會經過pool access既客房,不過都唔多人走咗出嚟佢哋自己既「碼頭」~

間中又有啲水簾洞位同噴水位,兩個小朋友都唔enjoy呢啲最好玩既部份,原來最貪玩嗰個都依然係我~

經過親呢啲位都要幫佢哋點樣快啲唔淋到個頭過對面囉,唔知點解,去市鎮公園嬉水區就要走過去淋,呢度有得淋又要避開~

我同day講,可以圍住個圈嚟游真係好瘦呀,不過嘛,去旅行時,游幾多都冇用,食嘢食咁多,好快食番晒啲卡路里~

游咗一個圈都夠了,可以去體驗下kids’ pool,其實有啲似市鎮公園嗰啲玩水設施,不過澎湃好多,多到佢哋有少少驚~

有地下噴出嚟既水柱,好似噴水池咁啦~

又有一個水簾洞涼亭可打秋千啦,啲水勁到詩都唔係好坐到,佢明明好鍾意秋千家嘛~

家姐都係坐一陣就要走~

好大範圍任玩唔嬲~

好澎湃~

好玩呀~

詩詩唔執輸~

最令小朋友又愛又怕既大水桶,注滿水就會倒落嚟啦,曉當然唔敢玩啦,睇下啲大哥哥大姐姐玩都ok既~kids’ pool既另一邊有真正好淺水既bb池,淺水到keep住留係度會有少少凍~

講到bb池,bb池旁邊有個service counter,有無限量既暖沙灘毛巾同埋檸檬冰水供應,實在太細心了~

玩到呢度,詩詩開始眼瞓,我決定同佢去瞓覺,曉就同爸爸繼續玩,佢哋有去堆沙啦,再挑戰滑水梯~

又有係family pool游游游,去旅行時曉開始學游水學咗差唔多兩個月,佢戴住水泡踢腳都可以前進呀~

我打算同詩搵個偏僻少少既位置奶奶瞓覺,點知池畔既沙灘椅都全部被occupy晒,我哋去咗望向沙灘嗰邊既沙灘椅,仲好,雖然望唔到家姐,但個view仲靚呀~詩詩瞓著咗,吹住海風,連我都舒服到瞓著埋~我醒咗就問附近pool bar既侍應生拎個menu,似乎可以係池畔食埋午餐先返房沖涼午睡呀~

等家姐佢哋都游完水過嚟會合,我哋叫咗家姐最愛既Margherita pizza、一份burger同埋兩杯飲品,兩杯飲品可以叫做一杯smoothie一杯mocktail,點叫都好啦,都要係物價比較低既地方先可以係五星級酒店隨便叫嚟飲,非常精美又好味既飲品,計番都係香港係starbucks飲一杯既價錢~

靚靚飲品~

趁詩詩未瞓醒我歎下飲品先,如果唔係佢一定爭住要「飲呀飲呀飲呀」~

抱住睡寶寶~

悠閒假期~

曉淨係飲smoothie,因為佢唔鍾意有汽既飲品~同我細個時一樣﹗

對住個沙灘食午餐~

pizza同埋burger都好味,最受小朋友歡迎既一定係薯條,仲有得點啲唔同既醬添,就更吸引啦~

yummy~

詩詩,你唔可以淨係舔啲醬架~要食晒條薯條先得架~

話說池畔午餐期間都發生一段小插曲,我一直抱住詩食嘢,點解張櫈好似濕濕地咁呢?雖然大家游完水係有啲濕…oh no~未戒片既詩呢啲其實唔算賴尿,只係算正常小便,但人哋唔預你著住條游水片咁長時間,游完水瞓埋覺再食午餐,已經超出咗佢可以負荷既程度了,唔好意思唔好意思,我哋即刻抹番乾淨,好在張沙灘椅唔吸水~

午餐後我哋就返房沖身啦~

Hua Hin Mariott Resort & Spa網站:

https://www.marriott.com/hotels/travel/hhqmr-hua-hin-marriott-resort-and-spa/

待續

前往其他泰國旅遊blog

Comments

comments

發表迴響

你的電子郵件位址並不會被公開。 必要欄位標記為 *