離開鐵道市場其實好快就去到水上市場啦，同曼谷包商量包車行程時，佢問我，想搵佢哋既合作船家丫，定係去多數遊客上船既地方自己搵船家議價，我上網睇好多人俾啲船家劏到一頸血，我哋又唔係擅長講價既人，佢報價1000 baht包船，同我上網見到既價錢1000-1500 baht包船都差不多，就索性跟佢安排了~
果然上船既地方好僻，見唔到其他遊客，但船家對我哋好熱情，又有個廁所可以去埋先上船(係曉唔駛學習既坐廁)，船家幫我哋影咗張紀念照就出發了~
一隻電動船本來可以載六個成年人，不過見多數都係包船比併船既多，總之越多人坐越抵啦，但自己一夥人坐一隻船會好啲，話晒大家想停留既店家都唔一樣丫嘛~
開頭day用揹帶同詩坐前面~
我同曉坐後面~
後來詩都堆埋嚟，我就顧住兩個，好在都差不多回程時詩先開始唔合作既~我哋上船既方離熱鬧既市集區域有啲遠，所以開頭係水道全速前進，曉都有啲驚驚要攬實我，後來去到有鋪頭既位置，船慢落嚟就ok了，仲乜都想買添^^”~
開頭未有商鋪就全速前進~
其實我哋嚟泰國呢個星期天氣都唔穩定，日日都有短暫時間落雨，連坐船時都唔例外，好在有蓬頂，唔怕淋濕~
開始有嘢賣啦~
選擇停留邊啲店家，我方、船家、同店家三方都有影響力，我哋係包船既boss，當然可以話事啦，唔知點解，好多鋪頭都係船家親戚囉，呢個又妹妹，嗰個又家姐咁，點都要去靠一靠岸，推銷一下商品，不過都唔算hard sell既，見你冇興趣都唔會逼你，至於店家，佢哋有非常厲害既工具，就係長柄鈎一支﹗你既眼神停留係佢某樣商品上面超過3秒，佢就會勾你隻船過去慢慢睇，好被動~
熱鬧既水上市場~
我哋都買咗少少嘢既，買咗兩條花裙仔俾曉詩，我自己就買咗條長褲，店家搏命推銷短褲同tee俾day佢都不為所動，確實嗰啲唔係佢著開既類型~另外曉揀咗啲拉鍊袋仔，話要送俾逸逸~乾貨買得唔多，啲紀念品睇落唔算吸引，而且定價都貴，恐怕去陸地上既市場買會平啲~
吸引唔到我嚟拎銀包出嚟既手工藝類紀念品~
我哋就買咗少少嘢係船上面食，買咗份烤魷魚，曉就食好多，但詩就咬唔斷~
詩咬唔斷都要食﹗
我揀咗烤香蕉，照理上人人都食到，但居然唔受歡迎，三父女都係一啖起兩啖止，我又唔敢食太多，之後要去靚靚餐廳食飯嘛~
曉個樣睇落真係唔多鍾意食~
我忙碌招呼兩隻嘢食嘢時，原來個老公咁悠閒咁自拍~
熱鬧既水上市場﹗呢度係早市，所以盡量要中午前嚟到呀，晏啲應該就冇咁熱鬧了~
估唔既係，我哋會係水上市場買嘢時，連載我哋既船家都買嘢食﹗
船家購物中﹗
我哋係一個位停咗有啲耐，佢買份即製既木瓜沙律，睇落辣咁~day好似之前都見到佢買其他嘢食，當時我就冇留意~究竟本地人買嘢價錢係咪唔同既呢？
水上市場既水道~比起上次同家姐去既Amphawa水上市場，呢度其實個陳設同風格都好唔同呢，講真呢度係好商業化，旅遊味重，咁我哋係遊客丫嘛，觀光下毋妨既，要唔要買嘢就自己決定咯~
離船時，我哋上船時影既相所製作既相架已經造好咗了，見唔係太貴就買咗，估唔到拎到返嚟香港放係房既窗台，兩個小朋友都好鍾意呢~
接住就去下一站，曼谷包介紹既Kaomai Plamun水上餐廳了，當初商量行程時，我要求餐廳要有bb椅，曼谷包嗰邊就話，因為餐廳遠理城市，bb椅方面唔能夠保證，而佢哋主要介紹本地去既餐廳，多數都冇冷氣添~既然冇冷氣都要介紹，咁一定好正啦﹗我上網search下，睇到人哋啲blog，哇，好靚呀~茅屋既材料，但起成好似教堂既形狀，係池塘旁邊，夜景更靚~
講到呢個位，我就記起，詩詩落車時係瞓緊覺，即是第一程車去鐵道市場時，應該兩個都冇瞓了，我抱住詩詩落車，抱住佢order同食嘢，食到半路佢先起身加入~
瞓住落車既詩詩~點解曉要摸肚肚既？你都好攰要瞓吧？食完嘢就瞓啦~
好在一本本既餐牌有英文~
餐廳雖然冇冷氣，但又好涼好舒服喎~
dur咗既曉，有得飲椰青就醒晒~
因為要唔辣，所以去泰國呢幾日真係成日都叫炒飯，起碼有一樣嘢小朋友啱食嘛~呢間都算係海鮮餐廳，我哋叫咗炸鱸魚，炒飯，見有兩樣啱佢哋食，我哋另外叫咗個紅咖喱蝦，飲品就叫咗個椰青~
炸魚好香脆，肉厚又嫰，非常好味，加上個魚露醬汁就更有特色~紅咖喱唔算辣，但似乎要配好多好多白飯同好多好多薄餅先唔會浪費個汁，可能係河蝦，味道唔算鮮，反而一齊煮既，好似水草既蔬菜就幾好味，因為一條條好幼，可以吸收好多醬汁係中間~話說埋單時張單係全泰文，我睇下啲價錢啱唔啱，發現有一項價錢好平唔知係乜，原來係冰粒﹗我哋叫咗支水，一齊上既冰粒原來要收費，咁都公道既，後來係另外既鋪頭都有遇到咁既事情就冇大驚小怪了~
因為位置比較僻，呢間餐廳一定要係自己駕車或者包車先會嚟~我哋司機只講好少英文，但笑容滿分，而且好體貼咁幫我哋開車門~開頭我都冇留意，後尾先發覺，原來我哋係每一個落車點佢都會影我哋上車落車既相，應該係要同公司交待吧，咁真係好放心~
之後嗰段路比較長，一早叫定曉要瞓覺，所以我同曉坐第一排俾佢攤平瞓，佢都好順利瞓著~
但問題係，坐第二排既詩詩唔安份，要走過嚟黐住我，結果變成右臂攬住個姐，左手抱住個妹，仲要個妹嘟嚟嘟去坐唔定，又要練「天羅地網勢」，可以幫到我既係聽歌零食同朵拉書囉，好在，目的地越來越近啦~
待續
前往其他泰國旅遊blog