1-7-2019:曼谷華欣暑假快人一步親子遊day 3(part 3).Hua Hin Mariott Resort & Spa、Market Village美食大本營

終於嚟到今個泰國trip我最期待既部份,就係入住海灘resort啦,其實以前我同day間中都會去住下海灘resort,有咗小朋友之後少咗安排呢類行程~華欣既resort好多,今次特別揀咗貴啲既Hua Hin Mariott Resort & Spa主要係因為,相信佢係全華欣最family friendly既resort之一,係咪多嘢啱小朋友玩係其次,最怕係小朋友跑呀嘈呀時會遭人白眼,咁度假即刻唔開心,如果大多住客都係家庭為主,大家都會互相體諒~Mariott Resoft最令人期待係超大泳池,包括lazy river,仲有幾條滑水梯同埋玩水既樹屋連沙池,根本resort裡面就係一個小水上樂園~又有kid’s club可以玩玩具同埋參加各種小朋友活動,我都target呢三晚住宿期間可以抽時間去做下spa,希望我閃走咗既幾個鐘老公可以唔駛咁辛苦~

好啦,講番我哋入住酒店啦,曼谷包既車送到我哋到resort就完成任務啦,三日後再見~曉,起身啦,落車啦,係滑水梯酒店呀~

我去辦check in手續時,day就同兩個小朋友飲下welcome drink同埋坐下舒服既梳化~

welcome drink~我哋既係冰茶之類,小朋友既應該係果汁吧?

未瞓醒既攰曉~

我哋揀咗既房型叫做Deluxe Pool Terrace,我估我以前既blog已經講過十萬次,我想住下可以由房直接跳入泳池嗰啲房,今次呢度都有,但我就絕對絕對唔會book喇~因為頑皮詩係絕對有可能自己跳入泳池﹗﹗既然價錢只差少少,我就揀咗可以望到泳池、好近行去泳池,但自己間房個小花園道閘可以上鎖既Deluxe Pool Terrace代替住先啦,到詩識游水又唔會亂嚟時就可以試下嗰啲Deluxe Pool Access房型啦~

今次住呢間房有個好處,既近食早餐既Amber餐廳,又近泳池、Kid’s Club、沙灘,只係唔近lobby去街街啫,位置算好方便~

Check in時職員耐心講解resort設施同活動,原來小朋友參加Kid’s Club活動可以儲印仔,儲夠特定數目印仔可以換雪糕或者曲奇餅架~曉就難啲儲夠啦,一來佢要全天候黏住我,二來佢要花好多時間午睡,下次大個啲時或者有機會既~

辦好手續,reception小姐親自駕駛哥爾夫球車,載我哋去到我哋既房間~

坐車車去房間~

我揀咗兩張double bed,自己併埋就闊過一張king bed啦,可以任佢哋兩個碌﹗

未併埋既兩張double bed,不過併埋有啲問題,就係中間嗰盞燈會係正瞓最出嗰個頭頂,which is day,記得瞓醒唔好即刻坐起身~哈哈~

我哋房個小陽台,望出去就係泳池啦,呢個就係幾個泳池之中既family pool~

曉見到個泳池己經兩眼發光,不過我同佢商量,因為時間經晏晏地,如果去游水游得一陣又要沖涼食晚飯,不如先去遊戲室,第二日先游水,佢都樂於配合~

享受酒店同埋小陽台~

但危險詩總會做出啲唔係你預期既事囉~

我哋係房稍稍休息一陣就出動﹗

我哋住既6211號房,詩詩成日都搞錯,以為係隔離嗰間房,想開門入去~

第一站先出去海灘睇下,跟住去遊戲室~

沙灘椅大量供應,唔駛爭﹗

今次我哋去泰國旅行,婆婆好關注究竟曉會唔會係華欣海灘騎馬,因為曉媽,即係我,一樣係四歲幾時都去過華欣,當年我就同媽咪合乘一匹小馬,八歲既家姐就自己騎一隻~

果然係海灘有好多馬丫,啲馬伕好熱情咁向你招手(生意)~

但曉不單止冇興趣騎,甚至因為驚啲馬唔肯行落去沙灘呀﹗﹗

詩詩就唔驚啲馬,或者係,佢眼中只有玩沙,一落到去沙灘就自動波坐咗係度玩沙,但阿女,我哋冇呢方面既預備喎~相入面既爸爸走去接曉落嚟~

當晚有沙灘bbq晚餐,個場set到好靚呀~不過我哋就冇係酒店食~

遊戲室幾舒服~

玩具都適合曉&詩既年齡玩,又有填色紙供應,電視就播住卡通片,大個啲既小朋友應該會對打機有興趣啲,可能為咗運作簡單啲,打機就只有FIFA同埋Mario Kart玩,我哋(我同day)後來都有打咗一陣機呀~

小朋友有得玩玩具就開心~似乎呢個形狀拼圖對於曉嚟講太簡單吧~

爸爸就想打機多啲~

豆豆梳化好舒服呀,可唔可以唔起身?

我哋既作品﹗好似每個小朋友都有鍾意油「彩虹色」既階段~

時間差唔多我哋就出去食晚飯啦,酒店大門斜對面就係華欣老字號大購物商場Market Village,我估大部份遊客都會去行下食下嘢買下嘢~有大超級市場,又有世界各地菜式既餐廳,嚟咗泰國一排思鄉既話都總搵到你想食既菜式~

到啦﹗其實好近,但以曉瞓得好少晏覺好攰嚟講就覺得好遠~

見到消耗幾多卡路里,行樓梯係咪有多啲動力?

呢度遠遠地先影到呀,去到太近就影唔到啦~

相比起曼谷,華欣交通真係輕鬆好多~

我哋由2/F天橋行入去商場,兜成個圈全部都係食肆﹗﹗﹗要決定食邊一間都唔容易~

day話想食啲肉,我就想唔駛顧住啲小朋友食得輕鬆啲,決定食日式餐廳~

又有得食多啲肉,有烏冬食時兩隻嘢又易話為啲~

家姐要辦大事,我同詩詩就係商場坐坐、逛逛等佢哋~

食飽飽我哋逛多一陣街先返酒店,呢度個超級市場都好大,我買咗套好抵既bikini,因為day去排隊俾錢已經排到,原本都想揀俾曉,但就唔夠時間去俾咗錢先,後尾我哋再去呢個商場時就買到泳衣俾曉喇﹗呢度啲水果冇切開一份份,day話佢徒手可以開火龍果喎,所以買咗兩隻火龍果,等佢表演下,唔好次次去旅行都買把刀切生果嘛,上次去北海道,把刀同個蜜瓜差唔多價錢~

另外我哋又買咗雪糕雪條,詩詩冇自己一支好慘?nonono,佢係三支都食過囉~

入夜後既酒店~

返到酒店,節目未完,沖完涼開電視發現咗個演唱會台,我哋一開始睇就停唔到啦~

幾投入?睇咩演唱會?

原來係Katy Perry演唱會﹗個名我就聽過好耐,佢有啲歌應該好hit吧,即使唔知道歌手原來叫Katy Perry都會認得首歌~今次叫做多啲認識佢,佢既舞台好繽紛,佢好有自信,演出好energetic,所以我都睇到入咗迷~如果而家問曉,佢都仲記得「戴綠色假髮嗰個人」架~

Hua Hin Mariott Resort & Spa網站:

https://www.marriott.com/hotels/travel/hhqmr-hua-hin-marriott-resort-and-spa/

Market Village網站:

http://www.marketvillagehuahin.co.th/en

待續

前往其他泰國旅遊blog

Comments

comments

在《1-7-2019:曼谷華欣暑假快人一步親子遊day 3(part 3).Hua Hin Mariott Resort & Spa、Market Village美食大本營》中有 2 則留言

  1. Hi, 我也有興趣去華欣; 途中加兩個景點都吸引, 請問最終幾點才到酒店?

    • 唔好意思,啱啱先睇到個留言…
      我睇番啲相,我哋去到酒店時大約下晝四點左右呀~

發表迴響

你的電子郵件位址並不會被公開。 必要欄位標記為 *