1-7-2019：曼谷華欣暑假快人一步親子遊day 3(part 1)．曼谷華欣包車(1)之美功鐵道市場

今個trip當決定要去華欣之前，首先要解決來往曼谷同華欣之間既交通，帶住幼兒搭兩三個鐘既飛機都咁大壓力既時候，如果再要加兩次三個鐘既長途車係旅程中間，可以話搵自己笨，即使去到海邊既度假村relax完，再返去曼谷時都即刻冇晒電~我search咗見有包車停景點呢個option，而睇啲台灣人blog就介紹呢間「曼谷包」包車公司，係台灣人開既公司，即使去到同唔到唔識英文既司機溝通，都可以通過台灣既客服即時解決問題，所以雖然價錢貴少少，我都揀咗呢間，起碼唔怕俾人呃又可以放心啲~價錢包曼谷去華欣車程，九小時用車，可以停四個景點/餐廳，超時或額外增加停站先額外收費~未出發時係香港through online用信用卡俾晒錢，出發前會通知你邊位司機負責、車牌同聯絡電話，夠晒妥當~而俾錢後staff亦會同你商量行程，佢亦會關注我哋帶住兩個細小朋友而對行程方面俾意見我哋~我哋決定今日去美功鐵道市場同埋丹能莎朵水上市場，之後既午餐地點就係曼谷包嗰邊建議既，跟住就去華欣既resort啦~

所以要額外準備既就係download定個Line係電話度，用嚟同司機溝通囉~食完早餐，執好晒行李，我哋九點前去到酒店lobby，司機帶住笑容，熱情地走過嚟同我哋打招呼，哈，原來day用咗張我哋既近照做Line既profile pic，司機跟住張相好容易就認得出我哋了﹗

我哋兩大兩細+兩件行李，我一心諗住普通五座位私家車已經好足夠，點知派咗架11人廂型車俾我哋喎~

坐得好闊落又舒服，不過我哋都係有啲浪費啦，三排座位，大多數時候到頭來都只係四個人逼晒係第一行囉~

九點鐘出發，午飯前玩晒兩個景點，午飯後就直接去華欣既酒店，第一程車比較長，要搭一個半鐘左右，如果小朋友可以先小睡一下先去景點就好lu~基本上搭飛機同埋長途車既策略都係，可以既話先由得佢哋自由發揮玩，如果冇耐性煩躁不安就出動娛樂袋既法寶、食下零食或者聽下歌，真係搞唔掂就俾詩詩奶奶~今次個娛樂袋帶咗幾本精選故事書，填色貼貼紙嗰啲活動書飛機就啱用，搭長途車時就收起咗咯，帶咗個Pinkfong咪，另外一堆零食~話說我為咗呢趟旅行，專登買咗Peppa Pig提子乾，諗住可愛啲，詩詩平時明明最鍾意挖麵包入面啲提子乾嚟食，但佢居然只鍾意個盒唔肯食啲提子乾喎，好在上次搭郵輪已經食緊既士多啤梨乾佢仲鍾意啫，今次仲帶咗又可愛又好食既Mark & Spencer動物餅嚟添~聽歌既話，有平時最鍾意既讚美之泉同Pinkfong係度就應該ok啦啩？

話說未去到美功鐵道市場之前，司機係一個油站度停咗車，原來係佢自己要去洗手間，day都順便去埋，入面發現咗曉好驚既一樣嘢—-踎廁﹗﹗上次去番禺掃墓時曉幾急都屙唔出，結果好不容易搵咗個坐廁先去到~事後day有同佢傾計，話將來遇到踎廁就「學習」，究竟，今個泰國trip邱曉有冇需要「學習」呢？

我都唔係好記得邊個幾時有瞓點樣瞓嗰啲啦，總之我哋去到第一個目的地—-美功鐵道市場~睇番blog先記得，原來上次同家姐嚟泰國時都有plan過要嚟，但後尾交通上花時間太多，放棄咗，只去咗Amphawa水上市場~我其實都有同曉係電視睇過旅遊節目介紹過，當時都覺得好amazed，點樣可以一日幾次係條火車軌上又開檔又收檔呢？好耐以前可能真係一個有必要地咁樣運作既市場，而家其實已經變成做show俾遊客睇吧？

果然見到路軌同攤販零距離﹗

曉係咪第一次行係路軌上面？

佢都戰戰兢兢~定係太熱？

開心啲影張合照啦~

我哋由路軌既一邊行入去，兩旁見到啲攤檔，比較多係賣水果、小食嗰啲俾遊客~水果一下子食唔到咁多，帶住成日又怕啲水果唔捱得，我哋即使見好抵買都冇幫襯~一來啲路軌好難行，二來曉非常怕熱熱到有啲dur，三來再繼續行應該都差不多，最重要我哋嚟主要係睇火車埋站嘛，我哋影咗少少相，行咗冇幾遠，決定搵個靚位坐低等火車埋站~

見到有間鋪頭有非常近路軌既吧台位，我哋就先坐低，之後如果再多啲人想settle down就未必有咁靚既位啦~為咗理直氣壯咁坐三個位，我哋叫咗三杯飲品，嚟到，哇，大杯得不得了﹗