30-6-2019:曼谷華欣暑假快人一步親子遊day 2(part 2).Jatujak市場、行到邊瞓到邉、悠閒玩玩水、超抵食Big C美食廣場

離開兒童發現博物館,我哋拿拿聲係附近買個椰青,俾兩個小朋友飲下提提神,因為想佢哋食埋午餐先好瞓覺~經過時聽到有live music,我哋按住聲音來源,搵到呢間有得食泰式簡餐既酒吧~

兩個小朋友都攰極,所以叫咗炸雞薯條等佢哋食得好啲,另外叫咗穩陣派炒飯同埋pad thai,仲叫多個湯嚟飲添~

等食物嚟都等得耐耐地,不過可以聽住歌嚟等都好啲~

有個中年叔叔係台上彈結他,自彈自唱,聲音聽得人好舒服,首首舊英文歌啱晒我哋兩個老餅,而家只記得其中一首唱咗Lemon Tree~

曉其實都差唔多聽到瞓著,好在食薯條有得點啲醬,佢最鍾意,兩個小朋友總算食飽飽個午餐先~

食完嘢狀態又好少少,一場嚟到都逛一陣市場啦~

我哋逛咗既部份都比較做遊客生意嗰啲,我哋食午飯既酒吧嗰一區全部都係賣畫賣藝術品,之後出番去大街就有啲衫呀、袋呀、飾物呀、紀念品呀嗰啲咁~話說今次出發之前,我係H&M買咗個圓形藤手袋,點解我鍾意嗰個袋呢,因為我玩嗰個fashion game 「Covet Fashion」入面我自己都擁有一個類似既袋,見到個實物就好高興了,點知嚟到泰國,周街都見到好似我個藤手袋既有得賣,價錢仲要「一樣」,即是相同價目,但我買港幣,人哋賣泰銖囉~不過呢,我都係覺得我嗰個靚啲,細緻啲~

我哋係市場度買咗幾條泰國褲仔俾小朋友啦~女人天生愛shopping,17個月大到4歲到35歲都係﹗

另外又買咗曉好期待既泡泡浴,晚上就可以享用啦~

呀,仲食咗椰子雪糕添呀,味道唔錯,但點解我覺得好細份既呢?睇番當年既舊blog,真係細啲﹗今次得兩球雪糕咋,嗰次有四球﹗

Jatujak市場~

小朋友通常都抵擋唔到泡泡既魅力吧~

佢哋越嚟越攰就想盡快返酒店,如果可以係酒店房度瞓覺,佢哋該可以瞓得好啲~的士又會塞車(實瞓著),tuk tuk又搭得耐(實瞓著),結果搭番BTS返去,冇辦法,兩個都係瞓著﹗﹗

唯有day抱住16kg曉+背囊,我抱住9kg詩,行去BTS站,等車、上車、搭車~好在兩個瞓得好冧,返到酒店附近個站都仲瞓緊,我提議係附近搵個地方坐低飲嘢等佢哋繼續瞓,我哋係Starbucks叫埋嘢飲,坐低,兩個都真係又繼續瞓,仲瞓多一個鐘添~

今次去泰國,我哋買咗一張電話+數據咭,入咗落day部電話,可以放hotspot俾我用,又真係幾好,$80左右用足八日,無限數據之餘,速度都唔錯~我哋兩個就坐係Starbucks一邊飲下凍嘢,一邊休息下,一邊篤篤篤到佢哋醒~瞓醒喇,提提曉我哋返酒店游水,佢就即刻醒神晒啦,可以行路lu~

返到酒店,飲下啲冰水,醒晒﹗你睇家姐餵詩詩飲水幾溫柔~

之前講過,我揀曼谷呢間酒店主要貪佢部洗衣機,話說我哋book咗酒店之後同家姐講起,原來佢哋舊年去曼谷時都係住呢間酒店喎~不過吸引佢book既唔係洗衣機,而係個比較大既泳池~對於我哋嚟講,我哋會去華欣resort住三晚,到時個泳池大好多添啦,但係曼谷如果有泳池都會加分既,聽到家姐講呢度個泳池唔錯,我都有啲期待了~

我哋返房換好衫就出動了~

兩個都話:我預備好啦~

DCIM100GOPROGOPR0947.JPG

泳池係酒店8樓,我哋第一、二晚住既酒店房其實望到泳池,係房間數下有幾個人游緊水,究竟係大人定小朋友,游緊蛙式定自由式,有冇用浮板等等都係曉曉既樂趣~

曉最近開始學游水,上次去郵輪我專登帶埋浮板俾佢,今次行李太多,浮板就冇帶喇,佢見到酒店有得借用浮板就好高興了,另外我哋又帶咗少少玩水既玩具,兩個梗係開心啦~估唔到既係,啲水都有啲凍,大池好少少,bb池真係凍到想離開,想暖啲唯有keep住游啦~有時我推住兩個游,day可自由活動一下,有時就輪到我自由活動~今日係泰國第一次玩水,兩個小朋友都緊張少少,之後去到華欣再玩水就更加自在啦~

開心玩水水~

DCIM100GOPROGOPR0960.JPG

嚟個合照先~

因為午睡瞓得唔長,又游埋水,都擔心佢哋好快又冇電,個晚餐都係唔好搞到咁夜~先一晚我哋去咗Central World,今日決定去對面既Big C行下~

我哋去咗頂樓既美食廣場度食嘢,原來嗰度採取儲值咭形式嚟買食物,day同小朋友搵位,我就去買儲值咭同埋買少少嘢食俾小朋友先~買咗個海南雞飯,我就返去座位安頓佢哋開始食嘢,day就去繼續搵食~

開始食住咯咯雞先~

呢度啲食物超平,主食一般都係60 baht左右,我哋一開始儲咗500 baht落張咭度,除咗海南雞飯之外,又叫咗個炒河、湯粉、炸雞、芒果糯米飯,之後仲有得退番200幾baht﹗飲品就冇得扣咭要俾cash,怕詩詩食菜食得少,我專登叫咗個甘筍蘋果汁大家飲,份量夠晒足~

我去買嘢飲時佢哋偷影我喎~

由頭帶到尾﹗話說三父女都鍾意芒果多過糯米飯,對於追求芒果同糯米飯既平衡既人(即係我)嚟講真係唔係好公平,理應一啖芒果一啖飯,或者搭住嚟食,因為啲芒果俾你哋三個食晒,我既芒果同糯米飯比例恐怕變咗1:5囉,或者更糟~我應該要獨霸一份先得~

除咗食物勁平之外,美食廣場旁邊既兒童遊戲區都勁平,好多遊戲都係10 baht一局,我哋都俾佢哋坐下馬馬同鯨魚,又一齊玩咗一局扑傻瓜~

入一次錢有三隻馬馬一齊轉,先係一個泰國小朋友既爸爸媽媽入咗錢,佢請我哋坐埋,跟住我哋入咗錢,佢又可以坐多一round,太抵了~

原本想坐船仔,但另外既小朋友不斷encore,我哋唯有坐鯨魚啦~

開頭曉唔敢揼,後尾見我玩得過癮就想加入,但你真係慢半拍喎,我哋四人合力啦~

有架tuk tuk俾大家影相~曉司機好似問緊我哋想去邊~詩司機既車你又敢唔敢坐?

詩詩司機~

之後落去Big C既超市度行,曉不住讚歎,因為又大又多嘢賣,超高興~

兩個落地跑跑跑~

兩層既超市好大呀~

不過只係旅程第二日,我哋冇乜買嘢,同埋之後包車都安排咗一個行程係去Big C購物買手信,呢間Big C可能近好幾間酒店同Central World吧,超多遊客嚟掃貨,個個都一車車咁買,要排隊等俾錢都有排等,好在我哋買少少可以排啲短隊啫~

我哋連續兩晚都幫襯呢間24小時小超市,又買生果~曉負責去俾錢~

返到酒店,對於曉嚟講都仲有重頭節目呀,就係浸泡泡浴啦~今次兩間酒店都冇bb浴盆,即使係詩我都俾佢企係度用花灑洗乾淨晒先至一齊浸浴,唔知點解係屋企時會怕啲水淋個頭,但去旅行時又唔怕喎,每日沖涼都算好順利~我哋下午係Chatuchak市場買咗個泡泡浴球,而家可以三母女一齊享用啦,雖然我都鍾意泡泡浴,但今次我好似prefer就咁熱水多啲,泡泡浴太滑,詩又唔安份咁要係個浴缸度行嚟行去,女呀女,媽媽好驚你會跣親呀~

待續

前往其他泰國旅遊blog

Comments

comments

發表迴響

你的電子郵件位址並不會被公開。 必要欄位標記為 *