29-6-2019:曼谷華欣暑假快人一步親子遊day 1(part 1).出發lu~Sawadee Ka﹗

因為曉學校暑假放足全個七月同八月,上年N班升K.1暑假我哋都善用呢個六月底七月初去咗韓國旅行(真係唔好意思,個blog只打咗一篇),希望稍稍避開人潮同埋稍稍平少少,今年都一樣,我哋星期五散學禮星期六就出發啦,利用七一紅日加埋啲星期六、日,爸爸可以請四日放九日,一方面去完旅行番嚟要休養生息一下,二來去泰國唔駛去九日既,所以就定咗星期六到星期六既八日行程~

其實原本諗住呢個假期去日本東北,事緣係fb見到朋友去咗銀山溫泉,靚得不得了,靚到想即刻去,我連旅遊書都買埋~但準備book機票時,日本就爆麻疹,兩個小朋友都未打第二針,冇理由明知有疫情都去嘛,所以趁未買機票就改目的地啦~排除咗最近去過既台灣同韓國,曉已經去過既馬來西亞同埋新加坡,近近地既東南亞地區之中揀咗泰國﹗其中一個重要因素當然係我好掛住泰國既spa啦~

去泰國當然希望住resort同做spa啦,搵行程時發現原來曼谷都有好多親子景點,所以又住下曼谷市區,又去下海邊既度假村~我哋頭兩晚住曼谷,跟住華欣stay三晚,之後再返曼谷兩晚,就完成八日之旅啦~除咗book機票同酒店之外,今次我仲用心良苦咁為曉張羅各種消暑用品,佢由細就特別怕熱,一出熱既戶外就會dur晒,一入冷氣又會醒晒,為免破壞旅行氣氛,我買咗個掛頸風扇同埋一對冰袖俾佢,希望幫到手~

出發前幾日我好唔好彩咁係街市跣親扭到腳,休咗一日病假,之後幾日又食止痛藥又貼膠布又搽藥膏,行路都仲行得勁慢,我都好擔心會影響行程~曉既安慰非常有效:「咁我拖住你行啦~」心都甜晒~行程頭兩三日比較痛要食藥,著波鞋行路就舒服啲,著拖鞋就痛多少少,後尾好啲唔駛食藥添了~

中午飛機,我哋係屋企食完早餐,執好行李都差唔多出門口lu~雖然帶住小朋友要帶多好多嘢,但湊住佢哋根本唔得閒執,執咗落去啲嘢又俾佢哋拎番出嚟,兩隻喼放係地下又阻住行路,而家反而越嚟越遲執行李,結果係執到最後一分鐘囉~

出發﹗

差唔多一歲半既詩而家基本上都係一日兩次小睡,係的士度佢就好自然咁瞓咗第一覺了~曉呢,就要同佢講數,佢好期待係飛機度睇好多好多卡通片,但如果佢睇足全程飛機,落機未上的士就要爸爸抱住瞓,所以一早同佢講好,睇住電視食完飛機餐就要瞓覺~

冇留意原來今次係Terminal 2辦登機手續,一落咗的士就行一大段路過去,經過的士站,好似已經去完旅行返屋企咁~曉有得坐住行李車就好開心~

媽媽想買嘢飲,等緊飲品時小朋友已經要落地玩下~

結果都係揀咗俾得佢哋兩隻嘢分享既飲品~話說而家興走塑,連Starbucks都變咗紙飲管,去泰國都多次遇到紙飲品,大人飲其實冇問題,但遇著鍾意咬飲管同含飲管既小朋友嘛,未飲得完本飲品支飲管已經爛咗~果然有需要自備飲管﹗

辦完登機手續寄好行李,兩父女已經好似holiday mood咁,一邊行,間間鋪頭都話要入去睇嘢,因為慣咗唔戴手錶又靠晒我,我老公一同我一齊就冇晒時間觀念囉~要不停提醒行啦行啦,另一邊廂我就要捉住隻詩,佢一樣對鋪頭全部貨品都有興趣~

兩個都有收獲,day買咗本東野圭吾,曉就揀咗本Peppa書~

去到登機閘口都仲有少少時間,可以係旁邊既小朋友corner玩一陣~

詩詩已經成個小朋友咁~

比起玩玩具同埋睇卡通片,佢哋更有興趣睇飛機,睇下啲貨物點樣由飛機卸落嚟,又睇下停機坪既車車,好多平時係路面都見唔到架~

指定動作~抱起詩詩影相爆喊~

同長輩們錄音say goodbye~

搭飛機都算如我想像既差不多,都算順利既,最唔想出現既場面係爆喊、勁嘈搞到周圍既人都唔滿意,結果全程詩都冇大叫,不過嘟嚟嘟去要捉住~通常帶住幼兒搭飛機,航空公司都會安排你坐第一行,需要既話可以掛個搖籃係前面,又可以有多啲空間,但其實打blog呢一刻先記起,上次曉21m去新加坡嗰次已經中過伏,因為第一排冇得放手提行李係前面張櫈既櫈底,一定要放上去overhead locker,嗰次曉由停機坪到起飛到解除安全帶標前一直不停叫「飲水水」,但無奈唔夠醒目,冇拎定樽水出嚟,嗰次求其用件衫遮住然後俾佢埋身食奶頂住檔先,但一離口又即刻叫「飲水水」,搞到好論盡~今次又編排咗坐第一行,記得拎定支水,又有拎定幾本書,但都好似唔係好夠用咁,要keep住詩安安定定咁坐係大脾半個鐘都真係唔容易~詩本來都冇自己既飛機餐,我同day嗰啲就食少少囉,淨係肯食甜品,總之唔嘈都算數~

上飛機,yeah~

今次去旅行發現,曉真係大個女,有資格去歐洲或者去美加旅行,可以自己食飛機餐啦,自己睇電視啦,自己瞓覺唔駛黐住我瞓~

講起機上娛樂,上次搭國泰去台北最開心,曉有得睇配咗廣東話既Dora the Explorer,我又有得睇Running Man,day又搵到心頭好(有時係烹飪節目,有時係電影之類)~今次搭泰航,口味冇咁香港人,但好在泰國小朋友似乎都好鍾意Pink Fong﹗﹗有半個鐘既Pink Fong music video,曉就睇得好高興,詩呢,唔鍾意個headphone,冇音樂既Baby Shark邊度好睇呢?所以只睇得一陣~

好難捉住隻詩~

短暫的美好,詩坐係爸爸度睇baby shark,曉自己食嘢,day可以睇一陣書,我?乜都好啦,唔駛練「天羅地網勢」就已經好好~(唔知係乜?請參閱神鵰俠侶,係小龍女既武功嚟架~)

好在坐到後半段佢都開始眼瞓,肯奶奶瞓覺,家姐又瞓詩又瞓,連爸爸都瞓,(我)終於可以停一陣~

(各位)終於重獲自由啦~

泰國既靚靚蘭花~

去到曼谷機場,托詩詩既福,我哋可以行關愛counter過關,總算順利,又係機場唱咗夠出市區既泰銖~原先睇人哋啲旅行blog話最好call Uber出市區,唔駛同啲的士司機討價還價,但結果都係懶咗,見機場唔係好多人就搭咗的士算數~

的士司機開價600 baht全包,我堅持要跳錶+highway費用,結果唔駛500 baht就去到酒店,果然跳錶係啱既~可能因為我哋坐咗架大的士,要再貴多少少,我哋走嗰日由酒店搭去機場坐架細的士,居然400 baht已經可以全包喎~

byebye機場,我哋去玩啦~

的士上輪到day瞓覺(媽媽永遠都係冇得瞓嗰個啦),我同小朋友玩啲千奇百怪既遊戲,玩下玩下就到酒店啦~似乎詩真係長大咗,坐車時有得坐家姐側邊就開心,係咪下次去旅行即使未夠兩歲都要買個座位俾你呀?

待續

前往其他泰國旅遊blog

Comments

comments

發表迴響

你的電子郵件位址並不會被公開。 必要欄位標記為 *