7-6-2019:世界夢號家族海上假期day 1(part 1).提早10小時的準備

本來菊姨未約大家一齊去呢隻船既三日兩夜海上假期之前,我其實都有留意過呢隻船,諗過去,但上郵輪網站話bb唔可以著游水尿片入泳池,我就打算等詩詩戒埋片片先去郵輪啦~後來菊姨邀請大家一齊去,咁多人咁開心,即使唔游水都好玩既,咁就即刻舉手報名~菊姨幫我哋同郵輪公司確認,話bb可以落水,咁就更高興了~既然去三日兩夜唔算太貴,試下住下未住過既露台房啦,好期待呀~

因為傍晚先上船,適逢上船呢日係端午節假期,為咗令個旅行睇落長啲,我有研究過要唔要早少少帶埋啲行李出去玩,之後發現,郵輪碼頭冇得寄存行李,加上曉都係瞓一個好啲既晏覺,儲備充足精力先上船好啲,所以決定午睡後先由屋企出發~為咗要令曉及早入睡,一定要係屋企食飯,為咗逼自己一定要係屋企煮飯,我提早一咗舊叉燒等自己炒飯,為咗放晒兩隻嘢啲電,我哋安排上晝一定要有活動~所以午睡大作戰就由早上開始了,我哋去咗市鎮公園玩沙+玩水,咁就肯定可以放晒啲電啦~呵呵呵~

先玩沙…

玩完水再跳彈床,務求放晒全部電﹗

因為舊叉燒,即使我陪玩完沙同水都好攰都冇得偷懶,一定要返屋企炒飯,所以下晝既提早午睡都可以順利進行~blog既標題係「提早10小時」,主要係處理午睡問題,行李?好似出門口前一至兩個鐘先開始執~

我又幫手(搞亂檔)~

今次恃住直接搭的士去遊輪碼頭,加上一家四口帶隻大喼,我執行李就毫不猶豫咁帶晒想帶既嘢去,最誇張既應該係玩水既用品吧?曉啱啱學游水冇耐,開始游泳班之後都未同過我哋游,躍躍欲試,幫佢帶埋水袖、浮板、泳鏡,我都知道佢其實未有耐識游,所以都同時要帶兩個水泡,好在唔充氣時都唔會佔太多空間~既然有大喼,帶衫就唔駛客氣啦,盡情換衫吧~因為唔肯定郵輪上既餐廳對衣著有冇咩規格,所以幫day帶咗長褲,我哋幾個女孩子就帶番條裙~好在只係三日兩夜,okok放得落~

之前都去過啟德郵輪碼頭,第一次係去公園大草地野餐,搭小巴入去,當時只有曉,感覺還可以,之後一次去紙飛機親子餐廳,爹駕車入去,塞車塞得不得了,小朋友坐車都坐到冇晒耐性,所以我都有啲擔心郵輪碼頭既交通~

父女裝,出發﹗

可能今次係假期,搭的士入去都好暢順,加上提早咗出門口,我哋去到時比起約大家既時間早咗好多~一落的士個位就係郵輪行李托運既位置,本身諗住冇乜必要托運行李,我哋只有一件有轆既行李,應該自己拎都好方便~咁啱我哋又有時間剩,托運行李條隊又唔長,咁就試下啦~真係好在托運咗行李,之後估唔到搞咗咁耐先上到船,如果仲要顧多件行李就更辛苦了~(雖然小朋友可能可以坐/玩件行李…)原來早咗到都可以check in啦,雖然有自助check in既機,事實上都係有職員幫你操作,又好在有職員係度,唔知點解我個中文名錯咗,其實應該唔影響用張房卡,但真係好肉酸嘛,個職員就幫我整過一張只出英文名既房卡~

等候大家輪住去廁所既著片詩~

跟住就有自由時間啦,登船後先食晚餐肯定會好夜,所以一定要食下午茶,登船之前郵輪公司有派發包點同清水,我哋諗住時間咁多就索性搵間餐廳坐低食,但馬上就放棄了﹗好普通既茶餐廳下午茶,居然要是$50幾蚊  一份﹗﹗其實未算好餓,我哋決定唔食嘢住,出去平台花園行下~

自由活動﹗

一出到戶外,就見到我哋將要坐既世界夢號啱啱泊岸呀﹗

因為實在太大,我叫曉睇下佢都睇唔出係隻船,因為係柱子既中間望去,似楝大廈多過似隻船~

走去空曠啲既地方就睇得出成隻船了﹗

好大呀~

係平台花園,最吸引曉既係小池塘,因為有啲魚係入面游來游去,但詩就最唔鍾意小池塘,因為個池塘冇圍欄,詩咁鮮蹦活跳,一定會跌落水,唔俾佢落地又唔開心,好遠咁睇又唔開~

曉曉好鍾意啲魚魚~

詩,你遠遠地睇魚啦~

仲有荷花~(唔好問我乜唔係蓮花咩,我真係唔識分~)

行遠少少有片大少既草地,有啲小朋友係度玩吹泡泡,仲要係超大泡泡,我哋都好興奮呢~

行到咁上下,知道大家陸續抵達郵輪碼頭,我哋就落番去登船大堂會合大家啦~我都仲未介紹今個trip既成員﹗今次係大大家族旅行呀~除咗我哋一家四口,爹媽,家姐佢哋一家三口之外,今次仲同我婆婆、大姨同埋菊姨一齊去~乜個combination咁熟口面既?其實咪就係2010年去海洋神話號郵輪之旅既各位囉(請參閱:20-2-2010:海洋神話號day 1.上船囉~),不過要減去我當時未結婚既老公,同埋未出世既三個小朋友曉逸詩,哈哈﹗

下一篇blog我真係會上船架啦~要留意啊~

待續

前往其他遊輪旅遊blog

Comments

comments

發表迴響

你的電子郵件位址並不會被公開。 必要欄位標記為 *