曉四歲生日前，我就開始同佢推銷「生日package」，「你就嚟四歲lu喎，我哋…開生日會﹗買生日禮物﹗學游水﹗睇牙醫﹗」開完南昌公園野餐生日會，買咗朵拉背囊做生日禮物，而家到第三浪慶祝活動—-學游水~其實本身都知道史丹福游泳學校入到嚟屯門，係圓玄小學個室內游泳池開班，呢個地點本來對我哋嚟講就方便到不得了，適逢有一日係市中心有人派傳單推銷免費試堂，我就係whatsapp group問下其他同學仔有冇興趣，結果湊到六個小朋友一齊試堂，實在太好啦~

曉曉舊年既泳衣已經唔啱著，所以今年要買新泳衣，當逸逸表妹係保守baby鍾意短袖短褲連身泳裝時，曉其實係sexy baby，佢話鍾意「胸圍同底褲嗰啲泳衣」，婆婆就糾正佢，係叫比堅尼呀~但係學游水著bikini又好似唔係太好，所以我就搵咗套三件頭泳衣俾佢，裡面係bikini，外面可以多套一件長袖防曬衫，咁就可以符合兩個需要啦~搵番舊年買咗既游泳鏡同埋表姐俾既泳帽，就齊晒裝備啦~

開心試泳帽~

曉出門口時著定泳衣係入面，又揹上朵拉背囊，心情愉快得不得了，但去到游泳池時就開始緊張同埋想喊，大概唔知道會發生咩事又要同我分開吧，即使之前已經做咗心理準備100次~

心情忐忑中…

去到更衣室時真係喊咗少少出嚟，後尾同佢既同學仔一齊隔住玻璃睇下上一個時段既小朋友學游水，心情先慢慢平靜落嚟~

夠鐘入去啦，爸爸媽媽們係玻璃門送別佢哋入去，原來一班既小朋友排一行集隊，要先跟教練做熱身運動，曉既一行六人個個都因為好緊張而動作好僵硬，開始時完全唔識郁，曉有一個同學仔仲唔肯同家長分開唔肯過去排隊添，後來佢哋慢慢適應落嚟就睇落好少少，曉都有跟住做熱身動作，不過幅度係標準既五分之一左右吧？

之後就一隊一隊咁跟住所屬既教練去上堂既位置，曉佢哋既超級初班位置係泳池既左邊，嗰度池底鋪咗墊，所以淺水啲，小朋友可以企到地，根據曉既資訊，池底係凹凹凸凸的~佢哋先坐係池邊，教練一個一個咁幫佢哋戴好泳鏡、水袖、背上縛好浮板，跟住就學下踢水，平時玩得好奔放既小朋友們都好斯文，動作…非—-常—-細﹗

紅色泳帽曉~

落水後就慢慢真正warm up，指既係心理上既warm up多過身體上既warm up囉~教練同佢哋以好多小遊戲既方式去熟習水入面既感覺，好似沿住池邊行路調位、一個搭一個膊頭做架小火車前進+捐窿窿、圍個大圓圈吹吹吹等等，最尾有一個個教練扶住輪住試浮係水面，內容都好豐富有變化，一個鐘既時間好快就過去lu~

曉放學時，幫佢除泳鏡、泳帽嗰一刻既表情真係由心而發既開心，一邊講「好好玩呀」，所以我都好開心~其實未試堂既時候我都決定咗90%機會會join，而家連曉都鍾意就加埋嗰10%喇，好好彩，試堂既六個小朋友之中，有四個決定一齊join，可以有伴一齊學游水咯~其實我知道咁細個去學未必會咁快學得識，我嗰陣都小學先學游水啦，但今次係曉曉除返學以外，第一次高興地離開我(一個鐘)肯去學其他嘢，真係大個女既一大步丫~希望佢會繼續enjoy游泳班，如果繼續學落去，你好快就游水叻過媽媽啦~

Comments

comments