22-4-2019:大澳家庭一日遊

舊年家姐生日,我哋一家九口一齊去咗山頂玩+晚飯慶祝,今年又想照樣一齊嚟個outing,我哋今次揀咗去大澳~

屯門去大澳好方便,屯門碼頭有船可以直接到,船程只係一個鐘頭左右,不過假日人比較多,好在有爹媽係早餐前幫大家買定船飛,可以按計劃搭到10:30船~講起由屯門去大澳既方法,50年後都仲會提起我同day+曉兜大圈嗰次,話說曉五個月大時我哋去住大澳文物酒店,除咗book酒店之外乜都冇prep,一心諗住大澳位於大嶼山,去大嶼山一定係中環搭船,於是就盲中中去咗中環先發現冇船去大澳,去到碼頭點都想搭船嘛,就搭咗去梅窩再轉巴士,非常轉折之下去到,好在嗰陣曉b搭船搭車非常乖~嗰次回程就知道有船直接返屯門了,學精啦~呵呵~

我哋先去海趣坊翠華歎咗個早餐~

未出發,先興奮~兩婆孫玩槍ing~

距離上船仲有少少時間,就同小朋友們係屯門碼頭附近逛逛,睇下海跑下步執下樹葉之類~

其實曉詩有得熱鬧就好高興了,去邊度都唔緊要~

家姐一家打算俾逸逸上船瞓覺,佢哋坐咗下層既冷氣船艙,我哋同爹媽就坐樓上,吹吹海風睇睇風景~

輕鬆傾傾計既爹媽,怕熱既曉,瞓覺既day,睇風景既婆+曉~

byebye屯門~

詩上船前就瞓著咗(係碼頭排隊上船時爆喊扭眼瞓囉),我同媽咪就陪曉睇風景(day迅速倒下),睇下屯門,睇下飛機,睇下機場,睇下港珠澳大橋…到差唔多到目的地前曉都頂唔順瞓著了~

去到大澳就曉詩都醒晒啦,結果逸冇瞓過,如果係平時,曉瞓唔夠一定會奄悶好耐,但又有婆又有逸係度,好快就醒神晒,即使熱都可以一齊跑一齊玩~

詩一出碼頭就即刻落地行行行~

我哋先去咗碼頭邊既長堤,睇下海睇下紅樹林,詩詩都高興地自己跑跑跑呢~

不過曉自細都係超怕熱,我又唔記得提佢唔好著黑色衫,佢熱到咁上下都開始「dur」…帶嚟既水仲要多飲晒添~

即使熱都開心既~

行到長堤既盡頭,經過少少房屋,見到個兒童遊樂場,小朋友又醒神晒~

我哋係度真係玩咗好耐﹗﹗﹗曉平時最怕熱,但有逸逸係度,就熱都唔驚,可以不停出去跑跑跳跳,詩就最識為自己爭取權益,一時要不停上落樓梯,一時就主動要求要打鞦韆~

最近越來越少見既怕醜草~

結果家姐主動出擊,去咗附近食肆買咗冰凍樽裝水同埋可樂,詩詩一試過經過個水樽飲冰水,全日都唔肯再飲自己個水壺,即使加咗冰水落去係咁話,覺得大人都飲既係唔同啲~

呢個遊樂場最好既地方係,四周有圍欄圍住,小朋友唔可以自己走得太遠,最重要係有個涼亭可以一眼關七,望到遊樂場既每一個位置~

好喇,再前進喇,玩到冇力,曉就唔多肯自己行路了,好在有佢既精神支柱婆婆同逸逸係度,可以行多少少,如果得我哋四個,佢100%要爸爸抱全程了~出番去碼頭嗰邊,就見到好多晏少少到大澳既遊人了,我哋跟住大隊行過大街小巷,不停jap jap jap街頭美食,過橋後就感受下水鄉風情~今次我哋目標去大澳文物酒店食個早啲既tea,所以我哋決定唔坐低食午餐,路上就食咗雪條、墨魚、茶果、烤魷魚,爹媽家姐佢哋仲食咗大魚蛋同墨魚丸,即使唔係好飽都起碼唔餓啦~

食食下個茶果俾人鬧﹗話我哋啲花生滴污糟晒個鋪面喎~其實嗰度睇唔出係鋪頭,因為冇開門…我只覺得自己企埋路既旁邊食咋~

行過去酒店嗰條路對小朋友嚟講可以係大長征,兩個行得叻既大小朋友就想抱,唔俾得佢自由周圍走既細小朋友就好想落地~唯有帶住佢哋睇下有趣既東西,減低腳上既疲累同埋熱熱啦~睇下紅樹林、睇下蟹、睇下人畫畫、睇下路邊攤~

行到攰,要坐低休息下,一齊唱「大西瓜」~

地上執到雞蛋花都兩個美少女~

終於到啦,見到酒店仲要行條長長樓梯先上到去丫~事先問咗下午茶由兩點半開始,但假日冇得book枱,我哋2:35左右去到餐廳,都已經大排長龍,冇得攞飛等位,要真係放個人係度排隊,我哋部份人排住隊,部份人就繼續自由活動,我揹住詩排隊,涼下少少冷氣都好,其實餐廳門口展示咗大澳風情既Lego模型,詩就唔多識欣賞,好在佢鍾意讀讀,餐廳門口都擺咗幾本關於大澳同酒店既書,仲要係圖片非常多既相集,咁樣等得位嚟(我)都唔算太痛苦~哈哈~

我哋入座時應該都有三點,我哋二話不說先決定要三份三層雙人tea set,當個職員話要入廚房睇下仲有冇時我差唔多想噴火,我早幾日打電話嚟話想book枱,你哋話假日全walk in冇得book,你哋兩點半開始serve下午茶我哋2:35嚟排隊,到入座時如果已經賣晒係咪完全講唔通?﹗但如果佢真係冇,你仲要壓榨佢都冇用,因為咁多樣點心,即使有材料重新再整都唔係一時三刻既事~好在,仲有得食﹗因為已經熱咗好耐,得6杯飲品俾9個人分唔係好夠,本身想額外order一杯飲品,家姐話不如索性多叫一份普通下午茶,所以我哋除咗食tower之外仲有多一份公司三文治,啲小朋友就最鍾意隔離嚟薯條喇~

豐富既食物~

tower既甜點鹹點都充滿大澳風情,因為用好多大澳材料,印象最深刻係個迷你漢堡,入面舊肉係大澳咸魚肉餅﹗肉餅味道好好,不過都係同白飯襯啲~雞翼係蝦醬雞翼都好夠特色~小朋友就當然最鍾意啲甜點啦,無論係奶凍(包括上面裝飾嗰塊朱古力)定係可以不停點啲醬既churros都好受歡迎~

食tower tea set感覺應該配杯earl grey,但呢度清一色配指定紅樹林特飲,味道都算好既,總算係以大澳特產紫背天葵加果汁調成,咁就冇得揀都算你啦~

六個女孩子~

大澳文物酒店前面的大合照~

有得用復活節主題道具嚟影相,大家都非常可愛~

原來酒店都有搞glamping,但咁貴,不如住番酒店房?﹗

招牌點都要影下既~

食完個下午茶我哋都要慢慢行番出去碼頭lu,因為我哋一早買好五點半既船飛返屯門~今次唔駛邊睇嘢邊行,速度快咗好多~去到碼頭前面既巴士站,條隊長得好交關,好在我哋一早買咗船飛,因為假日即使有加班船都好full丫~我哋去到啱啱好可以上船﹗小朋友們都要瞓覺啦,詩離開酒店時已經瞓著,曉就差唔多去到碼頭時瞓著~

爸爸的睡寶寶~

去大澳時揀咗坐樓上睇風景,回程諗住坐船艙涼冷氣瞓覺,點知船艙超熱﹗﹗﹗我抱住詩,簡直兩個人都完全濕晒﹗

啲汗多到可以gel頭~

直至去到東涌有一堆人落咗船,可以坐得鬆動啲,我哋先再揀個冇咁熱既位嚟坐~

後尾詩瞓醒,我都要拋開佢既造型,幫佢除咗條褲嚟降溫~^^”

今次大澳之旅就結束啦,不過夜晚我哋同家姐食埋個生日飯,完成佢今年既生日慶祝活動~

Comments

comments

在《22-4-2019:大澳家庭一日遊》中有 3 則留言

  1. 平日逸逸同我地一齊行幾步就要抱,去大澳個日都突然狀態大勇,行得多到嚇我一跳

發表迴響

你的電子郵件位址並不會被公開。 必要欄位標記為 *