20-4-2019:Baby Shark音樂劇doo doo doo~

知道有Baby Shark音樂劇呢個節目之後都考慮咗一陣要唔要買飛,因為門票都幾貴,仲要一人一飛,究竟去唔去好呢?幾多個人去好呢?考慮過後,一不做二不休,決定一家四口一齊去買貴飛,哈哈哈~因為我、曉、詩全部都係超級fans嘛~有少少安慰自己既係,曉出世之後,咁多年都冇去睇五月天,就當用啲錢嚟去睇baby shark啦~節目係九展舉行,我哋揀咗復活節假期星期六既早上場,曉上晝可以精靈啲,詩就要局佢開場前瞓一覺,咁就兩個(即是四個)都可以好好enjoy個show了~

食完早餐就出發,點知詩搭出九龍灣既巴士又唔瞓,落車行路去搭shuttle又唔瞓,直至shuttle差唔多到九展先瞓著,急叉一陣應該夠用既~

去到Star Hall曉已經好興奮了,因為舞台上面既大screen已經有baby shark啲公仔同埋其他海洋動物卡通係度郁動~講真,Pinkfong係youtube上面好紅,其實我哋兩個小朋友反而冇乜點睇過啲youtube video,但我哋就係Apple music度搵咗啲大碟嚟聽,聽到滾瓜爛熟,曉就首首都識唱(當然係「唸口黃」),連詩都可以跟到下少少,起碼首Baby Shark佢識得「doo doo doo doo doo」~

好靚既大銀幕~

開場就叫醒詩啦~有好聽既音樂又有豐富既畫面,即使未瞓夠都唔喊~嚟之前我都同曉詩論過好多次,究竟點樣可以融入Pinkfong既金曲係一齣音樂劇入面,事關唔係真係咁多首歌同海洋有關,所以我同曉推斷音樂劇裡面起碼會有我哋熟悉既「Baby Shark」同埋「Under the Sea」,其他就真係唔知點算了~但故事開始之後就明白啦﹗原來講baby shark自己走咗去玩,daddy shark就搵Pinkfong同朋友們幫手搵番baby shark,咁又要穿過森林、遇到獅子、遇到恐龍、見到企鵝等等等歷險,咁就可以加晒全部歌入去啦~平時通常都係我哋幾個自己係屋企聽啲歌,但今次係個咁大既場館、同咁多唔識既人一齊聽番啲耳熟能詳既歌,唔知點解有啲好感動既感覺囉~一聽到熟悉既前奏,就要同曉對望,會心微笑~好多小朋友睇到好興奮,落晒地失控,但我家邱曉就貫徹佢既個性,非常專心非常安靜咁睇,你會知道佢會將全部細節記係佢既小腦袋入面~

終於搵番baby shark了﹗好好睇丫~大部份歌都識唱,演員係台上好有魄力(話係全隊韓國crew嚟香港演出),服裝、道具都好華麗,一個幾鐘既節目非常豐富,睇完會令人笑咪咪~上次詩睇小雄雞不想睡覺話劇,已經好叻,係臨到最後5分鐘先要奶奶,今次就更犀利,由頭至尾都咁專心~

睇完演出我哋去買紀念品﹗嚴格嚟講都唔算係musical既獨家紀念品,只係Pinkfong系列既玩具~我哋買咗一支可以播50首歌既音樂咪,入面有多首經典英文兒歌同埋Pinkfong大熱歌曲,仲有埋精美歌詞本添,曉同詩兩個都咁鍾意,之後返番禺拜山時搭長途車佢都幫我唔少~另外買咗一本baby shark音樂歌書,詩可以自己揭書同按鍵播歌都唔錯~啲紀念品貴就貴啲,不過quality好好,一場嚟到都買少少啦~

本來想俾兩個小朋友係附近搵個位瞓一陣覺,之後可以去MegaBox逛下街,但我攬住曉瞓著,詩又要搵我,搞到曉都醒埋,冇辦法,唔去行街,食個飯就返屋企啦~睇完Baby Shark音樂劇,我哋今日全套韓式喎,係九展食埋個韓式午餐先走,間餐廳啲waitress都係韓國人,唔識講廣東話,照理上我可以講韓文,但作為香港人係香港講韓文有啲別扭咁,結果都係韓英夾雜咁order咗~

最後送上詩詩x炸醬麵恐怖look作今篇blog既結束~>v<

Comments

comments

在《20-4-2019:Baby Shark音樂劇doo doo doo~》中有 2 則留言

發表迴響

你的電子郵件位址並不會被公開。 必要欄位標記為 *