曉曉學校有得睇話劇，邀請爸爸媽媽一齊返學校觀賞，我當然支持啦~今次劇目係「小鴨鴨找媽媽」，其實個故事就係曉曉學校睇開嗰啲故事書既其中一本，所以我哋對個故事內容都好熟悉了~
今日曉曉其實要正常返學，話劇11:00先開始，我9:00送咗佢返學之後有兩個鐘自由時間，yeah~大約10:45係學校門口排隊，跟住就好似接放學咁接返自己個小朋友，係中間既表演場地搵個位坐，因為幾班上午幼兒班一齊睇，所以有家長嚟既小朋友就坐大脾，家長唔得閒嚟既小朋友反而有得自己坐前面，坐舒服啲，同埋個位仲靚喎，不過我估大多數小朋友都會寧願有爸媽陪住一齊吧？起碼曉一定係﹗
我開頭以為演員會著造型衫扮故事入面既小動物角色，原來唔係，三個演員著住睇落舒服既工人褲套裝，然後拎住啲毛公仔嚟做戲既~我估唔到，咁簡單既故事都可以做到45分鐘，而且大人小朋友都咁投入睇得咁開心喎，我諗都同劇團既專業好有關係啦，演員做得好好，表情、動作、台詞都好投入，又好切合到3-4歲小朋友既程度，而且中間夾集好多小朋友們熟悉既歌曲(當然啦，啟思既書、歌、甚何嘢都係一條龍嘛)，加上個演出好互動，所以大家都睇到笑咪咪+笑到卡卡聲~
講起互動，有個好搞笑一定要記低，話說鴨媽媽生咗隻蛋之後唔識得孵蛋，演員問小朋友，鴨媽媽生完蛋之後要做啲乜呀？有小朋友答「要睇醫生﹗」實在太可愛了~係呀，啱啱生完都係檢查下身體好啲~哈哈~我記得仲有一個都好搞笑，但打blog時已經唔記得咗，實在太可惜了~
曉平時同我哋時講嘢又多又大聲，但係學校時唔多出聲嘛，我都留意住佢既反應，佢一直都好留心咁睇，開頭時神情比較凝重，但睇睇下都放鬆個人，同埋有微微笑(雖然冇後面個男孩子笑得咁誇張，佢直情笑到個人跌咗出嚟)，而且都大跟大圍答問題，演員們邀請小朋友出去陪小鴨鴨唱歌玩既時候，曉都有舉手，不過怕醜曉舉既手係指向10點鐘方向，而唔係一般既12點鐘方向，但都好叻女啦，起碼肯舉肯參與~大家一齊唱歌時，佢都有開聲唱(雖然係細細聲)同做動作~
好開心，可以同曉share一樣既經歷，度過開心既時間，之後我哋兩母女仲去撐枱腳食pizza添~詩，到你K.1時媽媽又陪你睇話劇啦~
小天使兒童劇團網站：
http://www.angela-c-theatre.com/