今個星期，係曉曉學校一人一花種滿八星期要交功課既日子，今次其實比舊年既黃時鐘花大大地進步了，起碼種咗咁耐呢盆一串紅都仲未死…上次因為太遲都冇將花苗由紙杯轉過去花盆，一、兩個星期左右就枯萎咗，之後每個星期要交成長紀錄嘛，我哋向老師認錯之後就冇得寫lu~今次一拎花苗返屋企，我哋第二日就趕緊種過去花盆度，真係好好多~不過嘛，曉曉媽媽向來有種乜死乜既才能，所以今次呢盆一串紅既生命力真係算好強﹗

其實通告寫咗啱啱呢個星期一要帶返學校分享，一來出門口時趕趕忙忙唔係好記得，二來我心裡面其實都覺得有少少羞愧，唔想曉帶返學校要佢出醜…(雖然佢未必覺得)因為我家棵一串紅真係好—-醜—-樣—-﹗﹗﹗就係佢喇：

我哋將盆一串紅放係廚房出面，照計每日下晝會有陽光，不過嗰個位都幾食風又真~有時幾日唔記得淋水，有時出面又凍又大風又唔記得搬番佢入屋，所以都係不斷係乾水同吸番水脹番之間徘徊，最致命一次係大風到吹到個盆跌低，唔知隔番幾耐先搬番正，嗰次真係搞到一串紅奄奄一息，但最終佢又冇事喎~

係學校派花苗之前已經bookmark定一篇種一串紅既小tips，但結果人哋話轉盆兩三星期要施肥我哋又冇做到，人哋話要摘頂等佢橫向生長我哋又冇做到，加上照顧不善咪搞成咁囉~

但呢個星期，我越來越睇見我哋棵一串紅非常旺盛既生命力…

人哋話最好遲啲先開花，我哋十一月底就第一次開咗花，但居然一月又再開多一次花喎，仲要有兩朵，加埋之前謝咗又未脫落嗰朵，變成咗三串紅﹗

光禿禿既莖部居然無啦啦自己標啲健康既嫰葉出嚟，實在太厲害了﹗

聽曉曉講，有啲同學棵一串紅好大，大到佢哋捧住盆花嚟影相會遮住自己，另一方面，我都係Facebook見到有啲朋友既一串紅真係好茂盛，雖然我哋棵一串紅一啲都唔靚又唔壯，但生命力真好強，我決定要一直繼續觀察佢既成長丫~

Comments

comments