離開奧森兒童博物館，我哋就考慮去邊度食晚餐，適逢除夕夜，好怕條街越夜越多人，如果搞到好夜先返到酒店就弊喇~我哋冇book定枱食除夕晚餐，但諗到今個台灣trip仲未去過誠品，而我仍記得幾年前陀住曉去babymoon時，誠品信義店入面有啲靚靚餐廳，咁就即管去下啦~

雖然一心諗住避開除夕倒數既人群，但我實在對台北地理認識太少，我都估計大家會去101大樓附近倒數，但我又冇諗起其實誠品信義店同101大樓原來咁近囉，實在非常非常蠢﹗

捷運一出站就已經有指示牌講跨年甚麼甚麼，人流如何如何管制嗰啲，oh no no~既然已經嚟咗，就快快食完快快離開吧，12點倒數既話，如果我哋9點左右走應該都仲走得甩啩？

我其實真係好鍾意台灣既誠品，如果只有自己一個人，應該可以泡一整日~

有少少燈飾~

我哋去到餐廳樓層，發現呢間食素菜既「卓也小屋」，入面裝潢好雅緻，而餐點睇落亦好賞心悅目，即使係素菜亦非常吸引~我哋就決定係度食我哋既除夕晚餐，似乎兩份既大套餐都夠我哋四個人食lu~其實睇餐牌都唔係好似每一項實質係啲乜，但開始上菜就每一樣都靚到嘩嘩聲~

舒服既餐廳環境~

先上藥膳火鍋，我本來都擔心小朋友會接受唔到個湯底，但原來都冇乜藥味，好清，個豆腐吸咗啲湯汁仲好好味添~

火鍋入面見到啲好似茶樹菇既蔬菜乾類，唔知係咩，食都唔係好食得出，後來睇到卓也小屋賣既土產紀念品先知道係椰菜花乾，原來因為產量太多市場消化唔晒所以曬成乾嚟賣~我哋都買咗返香港，浸發咗之後可以同其他蔬菜一齊炒又得，用嚟放湯又得，果然食物製成乾之後可以濃縮美味~

冷麵

凍既沙律卷，精緻到好似西餐咁~

餡餅

飯飯好味~

我都唔記得呢個酥入面係啲咩lu，反正全部都係素菜啦~

呢個藍雪糕係卓也小屋名物，純天然染色~

好繽紛既丸子糖水~

其實水果入面既柿我都想買番香港架，但真係拎唔掂，寄倉又怕爛，hand carry又重，唯有將個味道記住啦~

愉快除夕晚餐~

呢餐唯一做錯既係，加咗錢轉咗特飲，其實食到尾又有水果又有兩款甜品，甜味既味蕾已經充份得到滿足，加上已經好飽，好似浪費咗個特飲咁，如果係好渴好渴既時候飲應該更好味~

一場嚟到誠品，我哋食飽飽之後都行咗一陣，都有啲收獲呀，買咗幾本書俾小朋友+小朋友仔既手信，又買咗幾件衫俾曉詩+做禮物俾人，見到好多好靚既bb嘢，但我哋兩個寶貝都慢慢變成小朋友，唔需要再用bb用品lu~

出到嚟好凍呀~

好狼狽既合照+聖誕燈飾~

見差唔多時間小朋友要沖涼瞓覺，又要避開倒數既人潮，我哋決定返酒店lu，好在冇搭的士﹗點解？我哋落咗捷運行返去酒店時，又幫襯多一次古潮雞﹗﹗﹗因為上次實在太好味了~上次叫咗雞胸，今次叫咗雞脾，雞脾當然好味啦，但我覺得雞胸好味其實更加難得，因為古潮雞既雞胸都好嫰，唔係度度都食到~

究竟有幾好味？睇下兩隻嘢有幾猴擒就知道~

最後一晚住呢間酒店lu~之前有講過，酒店安排咗嬰兒浴盆俾我哋，所以幫詩詩沖涼方便啲，不過我就冇講過，幫曉沖涼時其實要看住詩會好辛苦，因為浴室升高咗兩級，當時11m既詩詩非常鍾意爬樓梯(打blog今日既16m詩詩非常鍾意行樓梯)，會不停爬上去浴室，然後搣人哋嗰張貼係樓梯級上面「小心梯級」既告示，我哋阻止咗10萬次之後，好似最終都俾佢搣甩咗，早知第一日就搣甩佢，咁就少好多煩惱啦，哈哈~

趕住沖晒涼都要瞓覺啦，都係要第二朝先可以執行李預備返香港啦，goodnight~

返到嚟香港同家姐講起呢個晚餐，先知道原來卓也小屋最初係經營民宿開始，家姐佢哋就住過苗栗既卓也小屋民宿，睇落去都係一貫雅緻既風格，而家再睇個網頁都好想去丫~對比家姐10年前既blog，其實啲餐點都大同小異，不過10年間都與時並進，而家擺盤更加講究同精緻了(請參閱：台北苗栗之旅 – DAY 4 – 來山村裏作客)~

卓也小屋網站：

http://www.joye.com.tw/

前往其他台灣旅遊blog

Comments

comments