呢個又係家姐推薦必去項目，所以我哋特地安排咗non-weekend既一個full day去玩，每日入場人數有限，所以我哋決定一早博物館未開門就去視察一下情況，早餐？遲一步再算吧~為咗早啲去到，我哋索性搭的士去到算數~
去到奧森兒童博物館時，博物館已經開門，我哋先買好門票，放好背囊等行裝入locker先去食早餐~發現原來有得即日報名參加課程，我幫詩詩報咗bb既絲巾playgroup(事隔太耐，正名唔記得咗lu)，曉既年紀就處於大嗰一班既最細嗰個，佢又唔識普通話，又要死黏住我哋，所以就冇幫佢報名了~詩詩未夠鐘上堂，我哋正好出去食早餐~
附近有cafe，有麵包店，但嚟到尾二嗰日，我哋決定食番台式早餐店~
其實都係食蛋餅、油條、瓷飯之類，今次叫咗一個豆漿、一個米漿，試下唔同口味~
食飽飽入場我哋就分頭行事啦~我同詩詩去上堂，爸爸就同曉去隨意玩~上堂其實都幾似一堂真正既playgroup，唱下歌、跳下舞做下運動，之後運用絲巾做唔同活動，好似摺嘢啦，拋接啦，另外幼兒區有個機器，有幾條透明粗管道，可以吸絲巾入去，然後小朋友可以用眼睛跟住絲巾去向，再係出口嗰度接番條絲巾~
詩詩係咁多個小朋友之中最細既一個，唔太理解做緊啲乜，經常離開座位，要媽媽捉番住，雖然一舊飯，但佢整個過程都開心既~兒童博物館入場雖然都幾貴，但如果呢類堂成日都會變主題，專登買飛入場當上一堂playgroup其實都抵~
上完堂我哋就去搵番家姐同爸爸啦，似乎呢段時間佢哋乜都玩過lu~
去咗超級市場…
煮咗嘢食…
駕咗車…
仲露咗營，畫咗畫，玩咗泡泡，細膽曉唔敢玩滑索雖然有啲浪費但都係可以想像之中~
之後輪到媽媽陪曉曉了~
我哋坐低做手工，整咗立體既馬馬﹗
邱曉第一次用較剪，要順住動物既面形、耳朵既曲線嚟剪當然做唔到啦，所以我好專心好努力咁整我隻馬馬時，邱曉就亂剪一通+亂油顏色一通，唔緊要啦，我做手工做得好高興﹗哈哈~不過我好小心咁收好我努力整既小馬時，邱曉都好鄭重咁要收好佢亂剪亂油亂貼既「手工」並帶番香港囉~
之後詩詩瞓覺，我同曉就出咗去畫畫，呢度可以自由運用唔同既材料去創作，平面既、立體既都有，我哋有用畫筆+顏料大筆大筆地畫畫畫、點點點，之後又搵咗啲貼紙貼貼貼，仲有毛絨條同閃片等等，好高興~之後仲有同學校一樣既美勞架，可以晾乾啲大作，有職員會幫小朋友順序烘乾，最緊要寫好自己個名就ok了~
我哋又係玻璃窗度塗鴉，三歲半曉都畫得開心，換著今日既四歲曉就應該更高興了，因為可以更靈活運用筆，畫到自己心中想畫既東西吧~
詩詩醒咗我哋就出去食飯了，呢個兒童博物館好處係，入場之後當然戴住手環可以無限次進出，切合小朋友既需要~落雨濕濕，本來想搵個坐得舒服少少既地方食嘢，但行極都搵唔到有bb櫈既餐廳，算數啦，反正都係坐得論盡，我哋索性係街邊檔食咗牛肉麵，不過呢間牛肉麵其實係刀削麵，所以麵質唔係平時嗰啲台灣牛肉麵咁，而且口味比較粗糙，唔算美味，總之填飽肚子就快啲走吧~
詩詩瞓醒又輪到曉曉要瞓了，如果返去兒童博物館咁多嘢玩佢一定好難瞓著，所以我哋兵分兩路，我同曉去附近Starbucks瞓覺，爸爸就帶詩詩返去兒童博物館玩~原來係台灣用Starbucks免費wifi要用啲手機號碼嚟做登記甚麼，總之我用唔到啦，冇得上網之下，攬住瞓覺曉一兩個鐘做咩好？嗰排我興玩Fairway Solitaire，都係啤牌接龍既一種，但冇得上網就冇得用啲睇廣告嚟換既小工具，難好多丫，用多咗好多(遊戲入面既)錢嚟過關~嗰排我又冇玩Candy Crush，如果rotate住嚟玩幾個Candy Crush，即使唔上網，每個game有5條命都可以玩一兩個鐘，只差在個電話夠唔夠電啫~
瞓醒既呆呆曉~
到曉醒咗，我哋番去兒童博物館會合day同詩，其實大家都感覺玩得七七八八，而且距離閉館都冇幾多時間，所以我同曉玩多一次露營，拎番我哋已烘乾既畫作，跟住都差唔多執嘢走lu~
博物館網站話呢度適合0-10歲既小朋友嚟玩，其實都冇錯既，不過如果好似我哋咁樣一個b、一個幼童嚟講，就要分開嚟玩lu，所以如果同同齡既朋友仔嚟玩可能更好~anyway呢度係一個好適合親子旅行既目的地丫﹗推薦~
奧森兒童博物館網站：
https://www.kidsawesome.com.tw/
前往其他台灣旅遊blog