我哋要同住咗兩晚既北投亞太溫泉飯店say goodbye lu~原本想day 3既早上去北投親子館，原來台北市而家有一區一親子館，應該係公營既設施，可以俾家長帶啲學前嬰幼兒去玩既地方，一站式設計有晒訓練gross motor既遊戲區、訓練fine motor既玩具區、又有圖書區，仲要免費呢，每個session有入場限額，但就可以預先網上登記，個系統都俾我哋呢啲外國家長sign up，但要加入孩子時又遇上技術問題，我send咗e-mail去問，佢叫我再send e-mail去技術支援既地方再搞，出發前嗰幾日太忙，又遇著公眾假期同星期六日，結果爛咗尾，walk in的話唔係唔得，每日都預留少量walk in額，無奈我哋起身梳洗食早餐太慢吞吞，算啦，下次有機會再去啦~
食個早餐先~
取消上晝行程，我哋就悠閒地食早餐，跟住兵分兩路，媽媽梗係執行李組啦，為咗提昇媽媽既執行李速度–
爸爸就帶兩個小朋友去遊戲室組，我執執執，佢哋玩玩玩，可以趕到11點前check out~
帶住一小朋友一b兩件大行李，我哋都唔考慮搭公共交通返出去台北市區了，直接搭的士吧，酒店幫我哋call車，我哋可以坐低等~
酒店lobby等車中
一上車？四個人極速呼呼大睡，相中見到詩第一個倒下~呢個都係避免唔到既結果啦，我都知道，曉瞓咗呢一覺唔足夠既小睡，今日之內都唔會瞓第二次，但又會好攰到夜晚，不過都冇辦法，冇人可以係佢攰時keep住佢係車度清醒大半個鐘，反正佢落車都一定會頂唔順，就順其自然啦~
其實出發前訂酒店都有少少困難，聖誕peak season度度又加價又book到好full，台北市內既酒店呢，我其實主要有兩個要求，想交通方便啲、同埋詩詩唔好碌落床，結果發現好多酒店既家庭房都冇晒吉房了，價錢要唔好太貴又要闊落既要去到新北市嗰邊，結果搵到而家呢間Click Hotel，雖然家庭房full晒，但twin room既兩張單人床併埋+併埋牆都夠瞓既，好多comment話好family friendly，唯一壞處係個入口好難搵，我心諗，有地址係手，可以有幾難搵呀？地址係西寧南路36號10樓之3，原來個西寧南路36號係超級大，成個block，但「10樓之3」係咩思呢？下面係地鋪商場，然後有幾部電梯上大廈，我哋首先搵到既電梯，10樓係港式茶樓，啲食客見到我哋一家大細拎住大行李，咁樣去飲茶似乎怪怪地，都關心我哋係咪行錯路，知道係錯喇，但都搵唔到正確既電梯，結果問咗一間手機店既店員，可能佢都知呢度啲路太難搵，佢都費事指我點行，索性帶埋我哋去電梯口，實在太太太感激了~
上茶樓既lift…錯﹗
搵到酒店了﹗相中曉都未係好瞓醒~
酒店好好，出發前有send e-mail嚟問有咩需要，我要求要拍埋床去牆邊，同埋要嬰兒浴盆，兩樣都幫我哋預備好，我哋其實比起check in時間早咗到，佢都俾我哋提早入房呢~
兩個小朋友入到房即刻醒晒，詩即刻搵到佢既最愛之一–拖鞋~
拎住對拖鞋去搵邊個？
係咪要同爸爸分享？
家姐你仲照鏡？我哋預備好出門口去食嘢啦~
我哋稍稍休息一陣就出去搵食﹗西門町應該好多餐廳吧~我哋先見到一間鴨肉麵專門店，因為覺得啲座位會坐得較逼所以否決咗，跟住搵到我哋去咗食嗰一間cafe，係坐得舒服好多既，又有bb櫈~曉一睇餐牌指住話想食個煙鴨胸意粉，哈，我哋話，一定之前嗰間鴨肉麵會好味好多~
詩詩你又識睇咩？
我開動啦~食住包包等主菜~
唔知道食物portion有幾大，我哋叫咗兩個意粉同一個餐湯，原來都唔係好大，份量唔太夠，老土既係，曉叫嗰個煙鴨胸意粉原來辣辣地，佢要食我哋諗住俾詩食既三文魚白汁意粉~雖然唔夠食，但開頭等食物都等咗耐耐地，味道又唔算特別突出，我哋都唔加單了，反正食完可以落去樓下再掃街~
都係曉對鏡頭最敏感~
落樓發現呢間古潮雞~佢唔係台式鹽酥雞嗰種，而係似日式既唐揚炸雞嗰啲~我哋揀咗古潮雞丁，個名聽落似冇骨，應該食得方便啲，落咗order係度等既時候先發現，原來「古潮香雞」係雞髀，「古潮雞丁」係雞胸，其實「香雞」都係冇骨既，不過錯有錯著，如果唔係有誤會，我哋都試唔到咁嫰、咁有雞味既雞胸~因為全部都係即order即炸，所以新鮮熱辣10個好味，但小朋友們等到冇耐性﹗爸爸帶住個曉去附近行下街，我就抱住個詩企係度等，但等係真係有價值既，真係好好味，推介~有幾好味？四個人火速食光光啲雞，詩都追住要食~雖然要等咁耐，我哋臨走之前嗰晚嚟食多咗一次丫﹗而家打blog諗番起都流晒口水呢~
等到冇心機既曉
食完炸雞，我哋正式出發下晝既行程了~
儷客旅店Click Hotel網站：
https://www.muzikhotel.com.tw/room.php?cID=3
前往其他台灣旅遊blog