28-12-2018:台北+北投溫泉2+2之旅day 2(part 2).靜靜雞大眾風呂與開心家族風呂

返到酒店就趕快同兩個小朋友瞓覺了,好在酒店冇幫我哋收番好啲床鋪,可以直接瞓~我自己似乎都變成咗習慣午睡既體質,當然呢個同夜晚不停俾兩個整醒好大關係啦,我都一齊呼呼大睡,但好好彩,我自己瞓到自然醒時,兩隻嘢都仲瞓緊~我就把握時間,趁佢哋未醒時自己去一趟酒店既大眾風呂先~

其實book呢間溫泉酒店時,一來貪佢有和式房,另一樣貪佢房間內都可以浸溫泉,但係嘛,可以既話,梗係又試下係房浸,又試下去大浴場浸啦~呢度大浴場係採取日式裸湯方式,分開男女,但最遺憾既係,要年滿12歲先可以入場,可能唔想啲細路太嘈影響大家吧?冇得同曉一齊去添~大浴場同之前去過既遊戲室係同一層,拎住房卡就可以借locker同埋入場浸,我去既時候人好少,計埋我前後先得三個人咋~不過我都唔可以太relax,因為要抓緊時間返房丫,唔知佢哋瞓醒唔見咗我會唔會嘈生晒~

(**相片轉載自酒店網站)

大眾風呂有內湯同外湯,我浸咗普通溫度,就試下熱啲嗰個,因為都真係頗熱下,所以再熱啲既外湯我都費事出去了~過咗個癮就算數啦~快快手手著好衫,返到房佢哋仲瞓緊喎,哈,神不知鬼不覺完成﹗

後來兩個小朋友醒咗,我哋晚飯前其實都冇咩特別行程了,都係留係房hea下、休息下,睇下電視、睇下書、聽下歌之類,咁先係度假丫嘛~

唱歌曉與觀眾詩

咁興奮係唱緊咩歌?

梗係讚美之泉啦~

詩,你幾時識一齊跳呀?

第一晚時,職員話晚餐分5:30同7:30兩段時間,我哋發現其實都唔太strict,所以今晚我哋試下早少少過到去餐廳,又安排到入座喎,仲好啦~少少失望既係,原來兩晚半自助餐既主菜係完全一樣既牛排同大蝦,其實味道係ok既,但估唔到連隔日換款都懶,可能真係冇乜人會連續住兩晚吧?我哋唔聽話提早去到餐廳,但一到7:30就好多聽話既人陸續入座,自助餐枱即刻要排晒隊,我哋唔乖都有唔乖既好處,呵呵~

今晚早咗食晚飯,小朋友個午覺又瞓得好,有條件有組織地安排係房一齊浸溫泉呀~經過考慮之後,應該係曉->媽->詩->爸,我幫曉一邊沖時一邊放溫泉水落大浴缸,守規矩曉沖好就入去浸住先,我沖完就加入浸,爸幫詩沖完我就係大浴缸接住詩,爸最後加入,大成功﹗yeah~

幫三父女打格仔先…

可以一家人一齊浸好幸福丫,其實都冇乜得幾多次機會咋,曉曉過多一兩年大個女啲就唔適合同爸爸一齊浸lu~上水次序又係要考慮清楚,應該係媽->曉->詩->爸,我著好衫幫曉著,爸hold住詩,我接住詩幫佢著,最後落水既爸可以浸多一陣先上水,good﹗

沖呢個涼咁複雜,沖完又夠鐘瞓覺啦~day 3我哋就出發返台北市區lu~

北投亞太溫泉飯店網站:

https://www.apresort.com.tw/

前往其他台灣旅遊blog

Comments

comments

發表迴響

你的電子郵件位址並不會被公開。 必要欄位標記為 *