出發前一日好搏盡咁去咗冬日美食節同埋返診所當值，到夜晚好唔爭氣地勁唔舒服，超級攰+喉嚨痛+咳咳地，原本諗住出發前一晚執四個人既行李，結果少少都執唔到，仲幫唔到曉沖涼，我係第一個倒在床上，好在有神隊友，我可以安心休息~第二朝起身好好多，全部人梳洗好食好早餐，就叫day帶兩隻去婆婆度玩，玩到夠鐘先返嚟，我可以安心執行李，婆婆更有義氣地送番個老公返嚟幫我手，好在啫，如果唔係要一個鐘執2大1小1B既行李唔執漏嘢都有啲難~
順利按計劃出門口﹗yeah~今次揀咗搭中午機，可以朝早唔駛咁趕，如果小朋友係飛機上瞓覺更佳，到埗休息一下+食個晚飯，瞓一覺第二朝再出去玩就夠晒精神喇﹗
我有預先網上揀座位，但就冇辦網上check in，以往帶住b都好似做唔到網上check in，何況出發前幾日我忙到完全冇機會拎啲passport嚟逐一輸入資料，好在排隊唔算耐，過埋關時間都仲好充裕~
係機場搵到架bb車俾詩詩坐，但原來架bb車唔搭得無人駕駛列車，詩坐咗一陣又要落車了~
你坐番上你既hipseat座駕，自己扶住啦~
帶住小朋友太多機會有變卦，我哋都係早啲去到閘口好啲~
曉同詩都勁開心，因為可以有好多空間俾佢哋行嚟行去，又可以透過玻璃窗睇飛機~
開心坐地~:D
因為早，我哋要影「招牌相」都唔駛同人逼~任影﹗
四個人既點都要有一張~
夠鐘上飛啦，三父女~
劃到一排三個坐窗口位非常好~曉已急不及待要睇電視~
上咗飛機，基本上詩詩就即刻奶奶瞓覺，曉就心急想睇電視，今次居然有曉曉最近好鍾意睇既Dora the Explorer卡通片，平時睇故事書就睇得多，卡通片就第一次睇，仲有廣東話配音，實在太好了﹗因為有朵拉，基本上全程曉都focus係電視上面，中間可以乖乖停咗電視食飛機餐都算好叻~我陪曉睇咗一陣朵拉就可以睇好耐好耐冇睇過既Running Man，yeah~詩好似幾乎全程唔駛理咁，因為啜完就瞓瞓瞓，瞓到我哋食埋飛機餐差唔多到先至醒~day又係睇咗一陣朵拉，跟住又開咗其他節目嚟睇~似乎到詩都有三歲之後我哋就可以去啲飛得遠啲既旅行了~
曉今次既飛機餐有炒飯同埋果汁，以佢食得晒嚟講味道都應該ok~
寫住Regina既兒童餐~
我個飛機餐就有啲失望了，咖喱雞飯味道其實唔錯，但實在太–細–份–啦–﹗食唔飽係最大罪丫~~~個飯既size同曉嗰個一樣，曉有果汁，我哋大人得水，以前飛台灣短程都有沙律或者甜品或者麵包，起碼都有coffee or tea，而家只有一個筆盒size既飯，實在太過份了~anyway，落機再買嘢食啦~
因為曉全程睇卡通片，到埗時就迅間倒下了，等唔到上車先瞓，過關時都要day抱住過，day徒手抱住個30幾磅曉都可以同時印兩隻手指模都真係好犀利，我自己用揹帶揹住詩可以由行李帶托件行李落嚟都好犀利(第二件有好心人幫我托)~今次提早book咗車嚟接我哋去北投溫泉旅館，網上見啲人講book車平時又唔駛等咁耐，今次經驗真係唔錯，司機好有交帶，落咗機係機場連咗wifi就見到佢個whatsapp message，話到咗，等行李其間已經安排好見面位置~由機場去北投溫泉旅館都係NT900都幾抵~
係車上就全部人都大覺瞓了，我都攰啦~陣間見~
前往其他台灣旅遊blog