係香港比較注目嘅bb展，一般第一時間都會諗起荷花一年兩次嘅大型bb展，一次夏天八月左右，一次冬天二月左右，陀住曉曉時我哋就係二月嘅bb展大出血(請參閱：1-2-2015：懷孕扎記28w1d．興奮買買買@BB春季購物節)，今次陀住fufu，八月時連廿週都未夠，買嘢實在太早，到下年二月又已經出咗世喎，諗住都冇機會去行bb展，點知有一日搭地鐵時經過見到有海報廣告，原來有第一屆Mothercare bb展喎，四日嘅展期，抽一日去參觀應該唔難啩？大住個肚唔會星期四帶住放學後嘅攰曉去行，星期五又要返工+去飲，星期日下晝day要去學車，只剩低星期六非常緊逼－－曉嘅interview後家族聚會前－－少少時間﹗咁我真係好想去下丫嘛，好在day都(勉強地)肯奉陪～佢不嬲都好怕呢啲咁逼人嘅展覽，書展美食展都唔太想去(所以而家我搵曉陪我去書展，爸媽陪我去美食展﹗)，今晚仲要有地方去嘅時候都未必好適合買嘢，你肯陪我去真係好唔話得啦～咁有真係真係好啱嘅嘢我先買啦～
今次Mothercare bb展係九展舉行，我老實講唔太鍾意呢個地方，交通唔方便之餘又周圍立立亂，帶住曉又唔夠時間，我哋由九龍灣搭咗的士過去～今次入場只係$10，咁都好啲，萬一唔好行或者買唔到嘢都唔算太大代價嘅～入到去展覽場地，我第一個反應真係覺得都幾細，好似好快行晒咁～高興嘅係，我哋咁都撞到熟人喎，我都唔知Brian嘅太太preg咗，原來下個月bb就出世啦，恭喜晒﹗又撞到家榮佢哋一家三口～兩組人都大有斬獲，good﹗
我哋？我其實心目中最主要想買兩樣嘢，一樣係奶樽啦，睇下有冇比平時bb部平啲，我都唔諗住用咩豪華嘅牌子，曉細個時用嘅Pigeon平靚正，或者試下母乳friendly嘅chuchu都可以～另一樣係初生用嘅橫抱式揹帶啦，屋企嘅揹帶多就多，不過四個月大可以用hipseat之前我都prefer用硬淨少少嘅橫抱式揹帶，以前曉用嘅係金借俾我嘅Combi揹帶，咁佢哋條揹帶又俾咗人咯，屋企可以初生用嘅揹帶我都覺得唔太理想～因為坐完月我都要帶住fufu接送曉返學放學、買餸等各樣活動，希望我會對條揹帶有信心啲，唔駛成日顧住望住個bb﹗加入infant insert嘅ergobaby揹帶、同埋之前自己買嘅Moby Wrap布揹帶都係打直抱，頸仔唔夠力時我都唔太放心，而後來好後期買嘅超輕揹帶、同埋曉有好一段時間用嚟瞓覺嘅Babasling揹帶都可以橫揹，但好軟身唔夠承托力，我都覺得要成日望住至得，我都係想要一條硬淨少少嘅橫抱揹帶﹗不過⋯呢兩樣嘢我都買唔到﹗今次個bb展似乎比較多歐洲牌子呢，奶樽都見到有熟悉嘅Avent同埋Tommee Tippee賣，但我target嘅牌子就見唔到，揹帶方面，都只係有各種hipseat同埋打直抱嘅揹帶～
想買嘅嘢買唔到，不過都有開下眼界嘅～
呢個迷你小童安全帶系統，之前係玩具反斗城有見過，都有興趣想了解下，但嗰度冇人現場示範都唔太明白，而且產品說明話for四歲以上，我諗暫時都唔關曉事，今次有promoter +我哋嘅小model做示範，知道原理係點了﹗不過嘛，等day pass咗考車先算啦～而且我都覺得，個pat pat坐係塊硬板上面會唔會好唔舒服呢？
我哋行完大半個bb展都冇乜收獲，結果我唯一有買到嘅嘢就係Medela嘅配件同埋羊脂膏，家姐用完嘅奶泵可以過俾我用，我都要買番一set新嘅喇叭同埋valves，fufu埋身啜啜唔知叻唔叻得過曉家姐，但曉曉當時搞到我乳頭成日損嘛，羊脂膏都搽過唔少～我估bb展買即使唔特別平，點都唔會貴過平時去代理商度買啩？我哋冇睇到嘅部份就係Mothercare自己個booth囉，因為要排超長龍入去，我哋又攰，拎住啲嘢又重，而且每人限買$1一件嘅貨品嘅吸引力唔夠大到吸我入去，冇乜心機排隊，其實平時都鍾意Mothercare啲衫下嗰啲，但我都真係冇力衝入去人群搏殺，所以提早收隊﹗都好在早少少走，晚上嘅飯局先冇遲到，因為九展交通實在太唔方便了～
個bb展行得最開心嗰個，其實可能係曉曉囉⋯
有得同Peppa同佢哋嘅好朋友影相之餘，周圍又可以搞下嘢，玩下人哋demo嘅玩具，平時同爸爸去街成日都要抱住嘅曉，入去bb展都自己行咗唔少路(去玩)﹗
冇辦法啦，買唔到嘢，fufu嘅嘢都係要去番Aeon bb部、一田bb部等地方採購啦～
前往其他懷孕扎記blog