2-10-2017:愛board game之The World Council

以前同朋友聚會都多一齊玩board game,特別係同中學時期嘅「佬」聚聚嘅時候,大家總會預備幾套board game一齊分享~但自從大家相繼結婚有小朋友之後,聚會機會一來少咗,二來聚埋一齊時要照顧啲細路變得吵吵鬧鬧,玩board game都要好認真好專心家嘛,所以我好似真係好耐冇玩過board game啦~

難得嘅聚會今次人唔多,小朋友只有接近兩歲半嘅曉一個,比較好控制,而且我哋有兩個manpower(即是我同day兩個),應該都可以兼顧照顧曉同埋玩吧﹗哈哈~

費高帶咗佢買嘅新game「The World Council」嚟一齊玩,佢個人搞笑嘅地方就係充滿矛盾,但今次講得好啱,呢個game既簡單又複雜﹗特別鳴謝佢張相,其實我冇問過佢就係佢Facebook度download咗落嚟寫blog,哈,咁我唔得閒影相嘛~

規則簡單,但變化複雜就係嗰個意思~大家順機抽出自己嘅國家類型--超級大國、已發展國家、發展中國家、獨裁國家、島國,大家都有各自嘅目標,能源嘅目標、軍事目標、水資源目標、技術目標等等,透過每round輪流抽牌去儲條件去達成目標,但好現實地,我哋嘅一舉一動其實都會影響世界嘅大氣候,破壞國家之間和諧啦、環境嘅破壞啦、能源嘅短缺啦等等,如果某個條件消耗得太盡就會爆煲,可能係個別國家嘅滅亡,亦可能係世界末日,所以行動要好小心~

開始時大家唔熟習啲牌,亦唔熟習自己同埋對手嘅目標條件,所以只能focus自己,一直諗住儲夠未呢儲夠未呢呢啲比較膚淺嘅玩法~但玩到兩三次時開始,大家變得越嚟越邪惡,原來人哋就快贏就要搞破壞,原來唔係咁容易爆煲或者世界末日可以盡情破壞世界,原來即使幾窮幾單純嘅國家都要有少少軍事設備以保衛家園,原來要深藏不露,萬一暴露太多自己嘅優勢就會成為眾矢之的~居然越玩越有趣味喎,我哋結果一整個下晝都冇再轉玩其他game呢~

我講起其實呢啲game會唔會出電子版,可以連線玩,我諗現今嘅技術上其實一啲都唔難,不過嘛,board game好唔好玩其實個game本身設計得好唔好係重要,但更加重要嘅係同邊個一齊玩﹗同中學時代嘅老友一齊嘻嘻哈哈咁度過一個下午,個人好似即刻青春咗好多~

題外話,結果曉有冇乖乖俾我玩一陣呢?佢開頭自己玩貼紙書貼個不亦樂乎,貼完晒就不停搵我又同我講嘢,好在屋主叔叔又有得開啲卡通片俾佢睇,睇到攰攰地就係我懷抱之中瞓咗,我可以好專心咁玩game,yeah,多謝曉曉俾機會我~>v<

Comments

comments

在《2-10-2017:愛board game之The World Council》中有 2 則留言

Catherine 發表迴響 取消回覆

你的電子郵件位址並不會被公開。 必要欄位標記為 *