九月一日開學，九月四日打風，九月五日依然係適應日媽媽陪返學一個鐘(請參閱：5-9-2017：半熟手媽媽28m．30年後返幼稚園讀書)，由九月六日開始，就要自己返三個鐘啦，到咗今日九月十三日，自己返學足足夠一個星期了，可以回顧一下～
星期一、三都係著運動衫～我覺得運動衫舒服啲、活動自然啲輕鬆啲～
屯門半晝N班唔多，報學校時都冇報好多間，其實基本上交通都唔太方便，而家學校返咗一個幾星期印象都唔錯，但究竟K1要唔要繼續係度讀，最重要都係返學放學方唔方便嘅問題～返學路線方面，我諗而家都開始掌握得比較好，開學前本身打算搭小巴出市中心再轉去學校屋苑嘅小巴，咁樣可以行路行得相對少啲，不過要等兩次車太多變數，我呢啲好怕返學遲到嘅人太大壓力，如果曉曉唔係太攰都唔好採取呢條路線～上唔到小巴要唔要搭巴士去市中心？原來係nonono，因為巴士停站太多，又太多人上落，車程耐好多，落車位又唔太好要行遠好多，下次唔好諗了～今日嘅路線都唔錯，屋企搭小巴去到屯門診所再行過去，google話650m行12分鐘，之前試過一次行一半買包包坐低食完再繼續行，平路都ok，到上斜，而且都幾斜嗰段曉就唔太願意行，要氹下又行下又搵嘢玩下咁同佢行上去，鬥志鬥力，今日係屋企食完早餐先出去，好叻喎，落車全程自己行冇抱過，又冇拖拖拉拉，行得好合作，最後花咗17分鐘就到學校了，都唔錯～如果天氣唔太差似乎呢條路線都係最好，最怕就係屋企樓下上唔到小巴就麻煩啲～
say goodbye方面，上星期可以陪到入課室，爸媽陪到9:00先出嚟，第一日就犀利咯，老師拍響搖鼓嗰下，幾秒之內課室迅間變成煉獄、或者修羅場，牽衣頓足攔道哭，哭聲直上竿雲霄，實在太誇張了，有啲小朋友邊大喊邊扯住爸媽嘅衫唔俾佢哋走，有啲要老師捉住～曉？我一同佢講我要走就扁嘴，幾秒後就大喊，不過佢就冇追出嚟，坐係自己個位嚎哭～其實當時我覺得有少少好笑多過心痛，因為果然如大家預期嘅一樣，咁呢個係過程嚟嘅，無論係N班定係K1都要經歷～睇啲文章教，家長要溫柔而堅定咁樣道別，唔好顯得太唔捨得，情緒唔好影響小朋友，要盡量自然，我都希望曉盡快適應啦～
至於我自由嘅三個鐘之中，我發覺最好都係唔好走咁遠，自從陀住曉之後，我個Physical會籍已經荒廢，而家終於又入下場用下啦～大住個肚其實我都唔想做gym，我都怕俾職員趕落嚟，所以淨係有踩過單車，其他機都唔敢玩，不過Physical有個好大嘅休息區，有free wifi可以輕鬆上網、打blog、煲劇、睇書，既然呢度有locker、有廁所、有水飲、有冷氣、有wifi、有舒服嘅位坐，點解要專登行咁遠去圖書館？我而家就坐係Physical度打緊blog﹗yeah～啱啱星期一嗰日有啲後悔，我去嘆咗個大早餐，食得太飽滯滯地不特止(其實2nd trimester嘅我好大食，極少會食滯，嗰個早餐真係太大份)，仲食晒啲時間去，之後九點幾十點去街市買餸原來超級多人，我從來未試過咁早去買餸，以前同曉去早極都十點幾，近期多數係十一點幾先去，買相同嘅餸，點解要花咁多時間同人去逼？我又冇乜眼光揀到啲靚嘢，早買遲買其實分別不太～結果買完餸返到屋企放低啲嘢入雪櫃，坐得冇耐又要出門口去接曉～實在太太太唔值得了﹗第時都係星期日買定晒餸，星期一享受下自由活動時間就好～
接放學方面，睇過啲文章講過，課室入面早啲被家長接走嘅小朋友會更有自信，心理健康更好，所以上個星期三第一次接放學時我早啲去到學校門口排隊，哇，我十一點半去到，前面已經有五六個家屋排緊﹗原來到十二點時，先會有校車隊伍出嚟，之後先輪到我哋入去課室接小朋友～第一日時係玻璃窗望入課室見到曉呆呆地，好似好攰咁，前面嘅小朋友開始放學佢就周圍望，表情有啲凝重，到我接佢時佢扁嘴，忍住忍住忍住，最終都冇喊到～上星期三嗰見佢咁攰，我哋搭的士時佢就瞓著咗，返到屋企醒咗之後唔肯再瞓﹗搞一大餐我起身去煮午飯，食完又搞一大輪先再瞓過，又唔敢俾佢瞓咁耐怕夜晚又唔駛瞓，佢瞓時又一直要黏住我走都走唔開～啱啱嘅星期一佢終於跟我嘅劇本演出，我哋搭小巴返屋企時先瞓著，抱到佢返屋企繼續瞓，瞓左足足三個鐘先醒，咁先似樣嘛，返學咁攰，唔瞓多啲邊度似樣？之前返一個鐘都瞓三個鐘，有乜理由返三個鐘會唔瞓？尋日去葉太姨姨度時就出事，放學回程去姨姨度時瞓咗，到屋企時醒咗，咁就急叉咗電，玩玩玩成個下晝，我六點左右一接佢就倒下，返到屋企繼續瞓，七點幾叫都唔係好叫得醒，超級黏住我唔俾我去煮飯(飯就煮好，餸都洗切好，但佢唔放我去炒菜煎魚)，捉咗佢去沖個涼睇下會唔會醒下，但沖完涼都寧願繼續瞓，結果晚飯都冇食，瞓到今朝七點鐘﹗﹗我就要等爸爸放工返到嚟炒菜煎魚，我偷偷摸摸離開到睡房先有得食飯呀陰公～曉，放咗學乖乖地瞓覺咪好囉，搞到飯又食唔到，又冇得同爸媽玩同傾計～
每一日我都會問下曉係學校做咗啲咩，雖然冇辦法確認真偽，我啲closed end嘅yes/no question有機會套錯料，但佢自己爆出嚟嘅肯定唔可以無中生有吧﹗佢話有做手工，老師教我點點點，有紅色同綠色，要著肩肩，點完要抹手，大家覺得佢哋做乜？應該係手指畫吧﹗後來係學校影嘅照片度確認咗係﹗另外著咗運動衫嗰日想知佢做咗咩運動，我哋不停問有冇sir滑梯、有冇捐窿窿、有冇跳、有冇跑，問極都冇乜收獲，佢自己爆出嚟話騎咗馬馬，粉紅色，呢個應該係事實吧？問佢有冇睇書、老師有冇講故事，有一日佢話老師講咗兔兔，另一日佢話講咗老鼠同貓貓，我從來未同佢講過老鼠同貓貓嘅故事，呢個應該係真吧？至於茶點食咗咩，佢有一日答到係蘋果，呢個係其他家長口中確認咗，但佢話有餅餅，呢個又好似冇喎？又有另一日話食麵包，有啲豆係入面，係咪紅豆包？後來從其他家長度得知有食過紅豆包，不過日期好似唔吻口，係咪mix up咗時序？尋日食粥呢個都係事實，佢話佢冇食到，真係冇食？點解呀？曉咁鍾意食嘢？你唔係冇乜機度食唔到嘢啩？佢就話好似唔好食咁～不過放學時老師話佢有喊一陣陣，有得食同有得玩就冇事咁，咁究竟你有冇食茶點呀？
其實都好想知多啲佢返學嘅情況，學校會係課室門口貼咗啲相出嚟，不過只有排隊接放學時可以睇一陣，我都未有機會仔細睇，接放學時個個都心急，老師同每個家長只可以講到一兩句～不過，成班有成28個小朋友，班主任老師係咪真係留意到每一個㗎？我估曉係班入面應該唔係特別突出，佢恐怕會好冷靜、好合作地進行每一項活動，唔會出聲答問題，又唔會搞事，但又唔會開懷笑，老師有留意到佢嗎？期待星期五收到嘅手冊～
家長group入面，有啲家長講小朋友日日都唔肯返學，有啲唔肯換校服又唔肯出門口，so far曉都ok合作，佢係逆來順受嗰type？﹗定係佢都好接受自己嘅「命運」？﹗定係佢其實都ok鍾意返學？﹗早上係有少少情緒嘅，放假放完個weekend，星期一早上起身，乜都未開始同佢講佢就喊，不過出門口前就已經冇喊了，今朝就懶洋洋慢吞吞囉，要push佢好多先可以做到出門準備，但都冇講過一句唔想返學或者唔返學囉～之前有問佢返學開唔開心，佢都話開心，問佢鍾唔鍾意返學，佢都話鍾意，問佢再返學好唔好佢會話唔好，因為會掛住我～呢個問題嘅答案會唔會隨住日子改變呢？
我相信慢慢曉會喊得越來越少嘅，個心越來越放開嘅時候，佢嘅吱喳本性同埋愛熱鬧本性應該會慢慢出來吧？要好好享受學校生活呀﹗