7-9-2017:細bb懷孕扎記20w6d.弟弟?妹妹?我好亂呀~

終於等到照結構嘅日子,我好期待好期待呀~day專登拎咗半日假,我又拜託葉太幫我係星期四嘅日子額外幫我照顧曉一陣,隆重地去照結構﹗

我哋約咗Helen介紹嘅謝喜兒醫生,謝醫生算係Helen嘅師傅,所以Helen非常信任佢+話佢好好人,所以特別推介~原先自己諗住搵Ben Chan,始終以前做houseman時跟過佢,我親身覺得佢好勁+好好人嘛,不過個電話打極都打唔通,試下搵謝醫生啦﹗去到診所時睇一睇掛出嚟嘅cert⋯哇,MBBS 1982?﹗真係好senior﹗﹗﹗當我係MBBS 2008,下年都叫做做咗醫生10年,係病人面前都充滿自信時,同MBBS 1982比真係⋯冇得比﹗1982?我仲未出世丫~

你好呀,fufu~

果然,謝醫生係好friendly,但令我印象更深刻嘅係,佢照超聲波時手勢好利落,果然好熟練,可以迅速咁量度各種parameters同埋搵到啲landmark去觀察各個器官~

當謝醫生一直仔細地睇bb嘅每一個器官、結構正唔正常時,其實我心裡面暗地裡最關心嘅係,究竟係男仔定係女仔?早啲週數時照話似男仔,但我都希望照結構時嘅權威去幫我confirm,一直等緊醫生吐露啲線索出嚟⋯

毫無預警,突然間醫生話,女仔嚟㗎喎~吓?????吓?????吓?????真係女仔?????嗰下有啲晴天霹靂﹗﹗﹗個腦空白咗一兩分鐘,聽唔到之後醫生再講咗啲咩~

我自己腦海閃出嚟嘅首先有兩個念頭,第一係好對唔住個教友,佢陀緊個女,原本話可以俾好多好多女仔嘢佢,而家要食言,第二係,要唔要抽血去confirm一下呢?未夠十二週仲未去做唐氏screening時,其實有考慮過去抽血驗Safe T21,咁就一早可以知係仔定女啦,仲記得嗰陣家姐陀住逸逸時,我哋一齊去台灣旅行,就係食牛肉麵嗰日佢收到診所電話,話俾佢知結果正常+係女仔,咁就清清楚楚又安心啦~我自己又衰孤寒,覺得自己都未算高齡產婦,都唔係好大risk啫,又唔捨得花嗰啲錢,諗住仔女嗰啲,遲啲照咪知囉,點知一次話仔一次話女,而家都唔知點lu~

講真,其實我本身都鍾意女㗎,曉都好乖好好湊丫(唔曳嗰陣都幾乖>v<),如果係仔真係要另外學習一套去適應~如果生個仔,第時就一定要搬間大啲嘅屋,有三間房至得,而家啲樓又咁貴~如果生個仔,第時一家四口去旅行,就算啲細路大個晒,我都冇得同老公一間房~生個女嘅話,我哋三母女可以一齊去浸溫泉⋯無論係重要嘅原因、實際嘅原因、無聊嘅原因,本身覺得女好啲,但我已經因為照咗第一次超聲波,充分地接受到我自己生個仔,亦變成好期待生個仔--我哋嘅褲褲,但而家變成裙裙,好大打擊~

我明明覺得今次同曉嘅時候好唔同,陀住曉時,乜都唔做啲皮膚都好滑,而家雖然冇爆瘡,但都冇曉嗰陣皮膚咁靚⋯(老公掃興地話,你老咗啫~)我今次陀住fufu又鍾意食鹹味啲、重口味啲嘅嘢,曉嘅時候都唔係咁嘅~

返到去我同曉曉講,「醫生話bb係女仔喎」,曉肯定地答我「係男仔」~「可能係妹妹嚟㗎﹗」「係弟弟﹗」「你鍾唔鍾意妹妹?」「少少鍾意~」「弟弟呢?」「鍾意~」「係咪無論弟弟定未妹,總之係bb都鍾意?」「bb就鍾意﹗」

唔理啦,即使隔一輪再照,我都係會十五十六,所以決定咗去抽血﹗啱啱嘅星期六去咗抽血(打blog日期係28/9/2017),應該呢三兩日會有報告啦,大家覺得我哋係有個弟弟定妹妹?係報告出嚟之前,我決定唔同曉再討論呢個話題住~

前往其他懷孕扎記blog

Comments

comments

發表迴響

你的電子郵件位址並不會被公開。 必要欄位標記為 *