九月一日開學之後，因為令人討厭嘅三號風球令九月四日停課，今日終於有得返學啦～今日係最後一日可以陪埋入去課室一齊上堂lu，聽日就要自己返三個鐘啦～
返咗兩日，仲未掌握到最好嘅返學路線，今日搭唔到小巴，上咗巴士，巴士停站耐，上落乘客多，落車位置又要行遠啲，即使今日出門口時間一樣，到落車時只剩9分鐘，我到站前就同曉講定，陣間要「豹咁快」呀～(之前睇一本Maisy書，講contrast，入面有豹去表現快，烏龜去表現慢，我哋就開始出現「豹咁快」嚟催促佢行路行快啲～)我一心都諗住萬一真係夠鐘就抱佢行快多兩步到學校，好在曉曉豹真係幾快，8:56就返到學校啦，冇遲到～但係聽日都係早啲好啲，去到可以自由拎玩具嚟玩，今日曉一揀好玩具準備玩，老師就拍搖鼓要大家收拾玩具了，慘慘～對曉嚟講，聽到指令要收拾玩具係非常習慣嘅事，以前去playgroup同埋而家個個星期都仲有嘅兒童崇拜都做緊，所以心理上一啲都唔難接受～
不過令我較難接受嘅係，今日第一個環節係洗手食茶點﹗^^”啱啱先食完早餐，邊度咁快食得落茶點？﹗因為今日仲係適應日，返學只有一個鐘，要小朋友嘗試「排洗」、「茶點禮儀」、「等接放學」等事實在時間有啲緊逼，所以一來就先排洗～媽媽真係接近30年冇返幼稚園，所以係零印象，原來課室地板嘅小腳印係用嚟指示佢哋排隊用㗎，男仔排藍色，同校服衫一樣，女仔排粉紅色，同校服裙一樣～跟住老師會放一條布索係男仔女仔中間，大家握住索圈，就變成一列火車可以出發啦～不過今日嘅火車比較累贅，因為每個小朋友都帶住一個家長，啲小朋友又想黏住自己嘅爸媽，所以架火車行走得唔太利落～穿過門口時我難以同曉並排咁出去，佢就用眼神追住我，好在佢都乖乖握住繩索，冇離群走出嚟～
暫時嚟講，曉係屋企唔肯坐小廁所嘛，今日去到學校廁所佢仲呆呆地時我就抱佢除片坐咗上去廁所⋯叫做坐咗幾秒鐘﹗老師話唔尿尿都唔緊要，跟住就洗手～洗手好叻女，果然平時訓練有素～到放學同曉講番今日返學嘅事時，佢仲同我講係橙色梘液添～原來洗完手之後都唔係馬上食得嘢㗎，要去書包架拎自己個書包去自己個位度，再將毛巾盒同水杯放係餐墊上面指定嘅位置，老師會帶祈禱，用歌仔教小朋友合手時，因為曉知道係祈禱佢就歌都未唱完就合好手仔了～犀利咯，今日茶點係蒜蓉包﹗﹗雖然係迷你版，但都好實在～我就諗喇，究竟之後嘅早餐要食幾多成飽呢？會唔會個茶點日日都咁勁呢？今日節目豐富，食包包嘅同時，英文老師入咗嚟課室，帶埋錄音機向小朋友唱咗三首歌，同爸爸姨媽講起時，佢哋問，咁大家忙住食包，咪得老師一個自high？唔係，佢哋好有義氣嘛，仲有本來嘅三位班主任都一齊又唱又跳﹗食完包包，要自己收拾碟去籃入面，用毛巾抹抹口同手，又要放好水杯同毛巾盒入書包，再放好書包先繼續下一個環節，所以都幾緊湊㗎～
之後到做手工，老師先示範一次，之後派材料就可以開始做，估唔到兔兔同貓貓之中⋯
曉曉揀咗貓貓喎～媽媽幫手幫少少、幫口幫多多，曉曉動手動多多，我哋合作完成呢隻貓貓～不過臨尾要吹氣吹漲佢時，曉一吹就漲了，但馬上吸嗰下氣又吸扁咗，哈哈，所以我要趁佢一吹漲時就拔走隻貓貓啦～
其實之後就放學了，不過為咗模擬真實情境，老師要求我哋扮「接放學」，即是爸媽要出去課室外面排隊接，曉都算唔錯，我同佢講定要出一出去再接佢，佢都ok，只有周圍搵下我，有啲小朋友嘅家長一出去就爆喊啦～anyway，聽日要自己返三個鐘，應該個個都會爆喊大合奏了﹗為咗令小朋友分少少心唔好太掛住爸媽，每人送咗一個氣球呢～
今日放學曉冇咁唔捨得走，可能之後聽日又有得返嚟？定係佢已經太攰？不過外面有驚喜等緊我哋呀，原來Mandy姨姨同愷揚嚟接我哋放學呀～曉上堂時神情一直好凝重，佢以前初初返playgroup時都係咁樣，非常留心地觀察，出到去一見到愷揚就笑逐顏開啦～兩個小朋友一齊係屋苑嘅兒童遊樂場玩咗一陣，跟住我哋就返屋企lu～曉？又係途中倒下瞓著覺啦～返一個鐘學要瞓兩至三個鐘，爸爸就問，咁返三個鐘學點算？係咪中間要瞓一瞓？我估應該係會keep住hyper三個鐘，之後一接放學就秒速倒下大昏迷﹗最怕喊到筋疲力盡途中就瞓著，咁點算？﹗
晚上見到公公婆婆姨媽姨丈佢哋，大家都問曉曉返學嘅情況，食晚飯我去咗洗手間時，佢哋原來問佢老師叫咩名，公公同姨媽覆述曉話係「柯老師」、「戴老師」，佢哋向我確認～唔⋯其實都啱嘅，因為事實上係何老師、鄧老師同埋鄭老師，曉心入面冇文字家嘛，聽落何同柯差唔多、鄧同戴差唔多，係咁㗎啦～正如當年我同爸媽講我同學叫「盤一盤」，佢哋都唔明啦，後來先知道佢叫盤頊媛呀，阿爺仲笑我一盤盤添～曉都好叻呀，講得番出嚟～
呢兩日我可以現場直擊報導，打番個紀錄等第時可以回味下，之後曉要自己返學，我得到嘅嘢全部都係第二手資料啦，希望唔好打折打得太犀利～