買咗Bruno返嚟之後，一直只係用個陶瓷深鍋盤，其他烤盤未出動過，好啦，今次要試下其他嘢啦～其實我一早就預備好(材料)啦～

星期五晚烤咗牛仔骨﹗

早前買落嘅急凍牛仔骨(只係First Choic牌，並非咩名貴靚肉)，解凍後用韓式烤牛肉汁醃一醃，就可以用Bruno平烤盤嚟烤啦﹗我先用高火快啲令成個烤盤平均夠熱，開始煎之後就轉中火，悠閒地監察住佢哋熟嘅程度～其實同普通爐嚟煎有咩分別？我諗最主要係熱度比較容易控制，同埋成個烤盤嘅熱力都一致啦，如果用鑊嚟煎嘅話，火力好容易過猛，而中間嘅肉比起側邊嘅肉會快熟好多，要成日都調位，如果好似而家咁15件一齊煎好容易會失控，而家坐係度慢慢煎心理上輕鬆啲～效果都好好呀，曉一食第一啖就眯眯眼話：「啲肉啲汁好好味呀～」然後吸引佢繼續食白飯嘅就係－－肉﹗﹗﹗

今朝就試下煎pancake～其實想試好耐啦，一早買定啲材料，只係等一個假日早上有得同老公一齊食～呀，仲有，早兩日買埋個油掃就放心啲喇﹗

我今次跟呢個recipe嚟預備粉漿，不過忘記咗篩麵粉，俾老公係個女面前笑我：「媽媽好求其～」，唔緊要啦，攪攪攪時用心啲咪得囉～

http://allrecipes.com/recipe/21014/good-old-fashioned-pancakes/

因為未梳洗太樣衰，打格仔遮住我個樣先～大家見到mix好嘅粉漿同埋油掃嘛？油掃真係好方便，可以好好控制用油嘅份量，而且而家有呢啲矽膠油掃，清潔都容易好多～

我諗用Bruno比起用平底鑊去剪嘅好處係，可以一次煎好多個，個shape完整啲啦，火力均勻啲易控制啦，最重要係嗰六格係可以唔同步嘅﹗﹗夾起咗熟咗嘅一件騰咗個空位出嚟，你可以等你得閒先再倒新嘅粉漿落去，睇到冒泡泡先反，而且冇咁容易燶，亦唔會黐底，好易洗(不過唔係我洗:p)～大家要小心，我之後俾老公提醒/投訴，唔好跌啲粉醬落去烤盤用底盤嘅空隙中間，因為好難清理喎～

第一輪煎嘅唔知應該落幾多粉漿落去一格度，略嫌厚咗少少，後來調整咗份量就越煎越靚，越煎越好味～呢個recipe嘅pancake冇乜甜味，所以我哋再搽果醬同花生醬嚟食～

曉曉食得好滋味，食咗三件半呀﹗好捧場呀～

其實屋企自己整pancake真係好平﹗﹗一包1kg麵粉十幾蚊只係用1/4都唔駛，一隻雞蛋同一盒牛奶都唔值幾多錢，如果裝盤靚啲，切啲新鮮水果係旁邊，仲會即刻好似好高級咁添～

仲有章魚燒烤盤同埋凹凸坑紋烤盤未試用呢～之後要試埋再寫賽後報告呀﹗

Comments

comments