終於嚟到呢一日啦﹗為咗返學順利，真係做咗好多準備功夫呢～姨媽姨丈送嘅生日禮物我特別要求咗要學校嘅Lego Duplo，另外我又買咗關於學校嘅字咭俾佢玩，又睇咗N咁多本關於學校嘅圖書，總之結論係－－返學好開心㗎～媽媽陪唔到你但唔駛驚﹗希望真係有啲啲幫助啦～
第一日又未駛咁快獨立住嘅～第一日叫做「領取編班證」，未係正式上堂，學校鼓勵爸爸媽媽都陪住一齊返學～未領取書包，暫時揹住自己嘅背囊返學先～
入到課室，原來曉屬於洋娃娃組，點樣知道自己坐邊個位？小朋友都未識字，原來自己座位前面張枱貼咗自己張相同埋名㗎，咁就唔會坐錯位啦～今日其實只係返45min，開頭父母一齊陪入去，之後其中一個家長就出去外面聽簡介會，係課室裡面嘅小朋友同另一個家長亦冇咩特別活動，不過可以隨意走動同埋攞玩具嚟玩～
雖然只係第一日返學，都有唔少小朋友之間出現「火花」－－搶玩具﹗曉冇搶人玩具但就俾人搶，佢又冇喊又冇發惡喎，默默地拎起其他玩具嚟玩，但又俾人再搶^^”，陰公～返到屋企晚飯時我哋討論過究竟應該點樣處理先好，我同爸爸都提案咗幾個方法，呢個2y4m嘅小人仔都唔係太接收到，或者太複雜唔明吧，佢話「我想玩喎」～anyway，俾佢返N班其實最想佢磨練嘅就係social skill，你慢慢會掌握到辦法啦，爸媽從旁陪住你啦～抵讚嘅係，曉有主動去拎玩具，提醒之下，有同其他小朋友分享玩具，玩完亦肯自己收拾玩具同埋將玩具箱放回原處，做得好﹗做得未夠好嘅呢，曉暫時只同我哋講嘢，未肯同老師、同學仔交談，曉嘛，混熟咗就會變開籠雀，我都唔擔心嘅～
只係45min，時間真係好快過，放學時佢都唔捨得走～
媽：我哋走啦﹗星期一再返學啦﹗
曉：唔好～我要係度﹗
今日有爸媽陪住你就咁鍾意，如果到下星期三要自己返三個鐘都咁開心就好lu～
原來返學真係好攰，可能一下子接收大量資訊吧﹗平時通常起碼十一點幾十二點先眼瞓，有嘢玩直情下晝兩三點先瞓，但今日？放學搭小巴返屋企時就倒下了，返到屋企放低佢繼續瞓，總共瞓咗三個鐘﹗﹗有冇咁誇張呀？如果之後返三個鐘，咁佢會瞓幾耐？﹗
曉瞓三個鐘時我都冇得自己玩，原來佢未有功課我就先有一大堆功課﹗﹗睇咗14頁嘅通告，又要填好多表，之後又要準備返學嘅物品，呢個weekend要準備嘅嘢都一大堆呢～