28 & 29-8-2017:開學前3+1高雄假期day 4(part 2) & day 5.多一天的「旅程」

去到機場,即使係病病曉,依然好想坐行李車,仲係咁鍾意玩都係好事嘅~我哋見到新東陽,先買手信,跟住就搵個舒服嘅位置坐低~

曉好快就瞓著,早啲嚟機場果然係明智嘅決定,座位闊啲,冷氣舒服,周邊又有鋪頭可以買嘢食買嘢飲,廁所又方便又乾淨~我哋趁曉曉瞓著咗,食咗day 3企圖係便利店哄曉瞓覺時買嘅薯片(請參閱:27-8-2017:開學前3+1高雄假期day 3(part 3).城市光廊、私人好味拉麵店),再一齊jap多一包啱啱買嘅豬肉紙﹗:p我哋當然各自篤篤篤手機,乜都睇下,又打下機咁啦~

瞓到五點幾差唔多要check in,弊啦,即使食咗退燒藥曉摸落去好熱,會唔會唔俾上飛機㗎?其實係台灣呢邊唔會有人check體溫,最多都係返到香港機場俾衛生署截住要送去瑪嘉烈醫院隔離⋯但如果萬一曉發燒係咩奇怪病,係飛機上散播病菌就大鑊,阿媽係醫生,明知個女發燒都俾佢上飛機,惹到其他乘客都病晒,我真係以後唔駛撈又唔駛見人⋯所以我哋決定向航空公司自首~

其實航空公司都想我哋搭到飛機,佢叫我哋去護理室,護士同曉探熱,其實唔駛探都知佢發燒,咁當然唔合格啦,於是又叫佢飲水又叫我哋同佢抹身,希望個燒暫時退落嚟可以上到飛機啦~到六點幾再探熱,都係燒緊呀~航空公司職員同我哋講,七點幾呢班上唔到㗎啦,幫我哋hold住位睇下九點幾嗰班搭唔搭到⋯我哋先去食晚餐先,隨便係離境大堂食咗個牛肉麵,叫咗個三文治俾曉曉,胃口都唔係太差嘅,都食到少少佢喜愛嘅包包~去到七、八點嗰啲位,我都有少少想放棄,我哋去咗機場已經有四五個鐘,一直都係咁嘅狀況⋯到咗八點幾,曉都係熱辣辣,冇辦法啦,九點幾嗰班機都係上唔到啦~

當機立斷,我哋同航空公司改好第二朝嘅機票,即刻拿拿林book今晚嘅酒店,有agoda app,可以好快速咁揀咗一間最近小港機場嘅motel,近近地平平地就好~搭的士過去,的士大佬都唔太高興,梗係啦,錶都唔駛點跳⋯

原本我哋問航空公司職員係咪可以去小港醫院睇醫生,原來佢哋一般嘅家庭醫生嘅診所開到九點,所以我哋唔一定要去醫院睇急診~我哋搭的士途中,經過見到有診所未關門,太好了,快快check in放低行李就去睇醫生啦,有張醫生紙,對於第二朝上飛機應該有幫助吧?

其實book嘅時候已經feel到,呢間motel應該係⋯情侶賓館﹗

入到去就更加肯定了,check in嘅counter係磨砂玻璃隔開嘅房間,一間間房有獨立車位,泊咗車入個車房之後可以落閘,私隱度十足,再由車房有樓梯行上二樓嘅房間~因為冇乜心情,所以都冇影相,房間嘅浴室超大,有超大按摩浴缸,可以鴛鴦戲水^^”,浴室外牆係透明玻璃,我哋咁嘅身世(連替換衫、底褲同襪都冇晒,又帶住個病病小朋友),乜都唔關我哋事啦~另外一個證據,就係酒店promotion俾客戶嘅獎賞,送嘅大獎係入住一晚,細獎係送入住休息⋯^^”其實我呢,貪呢間房除咗平同埋近之外,佢係三人房,有一張雙人床一張單人床,我同曉瞓雙人床,day瞓單人床咁就鬆動少少~

anyway,我哋快啲出去睇醫生﹗﹗醫務所就係motel正對面,入到去登記咗坐低等嘅時候,有點納悶,因為陳設有少少古老,入面又有好多個病人係床上面做醫物理治療之類(究竟係中式推拿定係西式物理治療?﹗),其實,呢度會唔會係中醫診所?如果係中醫嘅診斷,醫生紙對於上飛機有冇幫助?不過好快就放心,因為診所嘅poster貼咗關於流感針嘅poster﹗哈哈~另一樣比較奇怪嘅係,登記時姑娘/藥劑師問,要藥丸定藥粉,藥粉?藥粉?真係講藥粉?﹗係香港,除咗係插咗胃喉,或者吞嚥有困難嘅病人之外,好少出現藥粉呢個term喎~點解呢?睇醫生時就一啲都唔奇怪,同我哋平時GOPC睇症都差唔多,因為曉除咗發燒之外有少少鼻水,醫生都當佢係URTI咁處理~

到拎藥時終於明白藥粉了,似乎佢哋唔興俾藥水小朋友bor~曉嘅藥係一包包嘅藥粉,用薄紙分別包好,似乎一包入面有好幾種藥mix埋一齊呢~

同香港好唔同,香港而家啲處方藥物要有labelling,全部藥都有名有姓,有晒醫生名、地址、病人名、藥名、劑量等資料,而家啲藥粉就全部都係不知名嘅藥﹗﹗但係⋯藥粉要點樣俾小朋友食?即刻請教姑娘,姑娘俾咗支超大針筒同膠杯俾我哋,原來都係要mix咗啲藥粉落水度再jit落曉個口入面~曉嘛,對於奇奇怪怪嘅嘢唔太接受,佢--唔--肯--食--藥--﹗﹗

我哋唔好阻住人收工,所以有點論盡咁拎住膠杯同針筒離開診所,去埋附近便利店買少少必需品就返酒店繼續努力試,即使俾住曉用飲品嚟送,佢都唔係好肯食⋯佢話「好驚藍色藥藥」,但佢就肯食我由香港帶過去嘅藥~算吧啦﹗食香港藥藥啦,我哋最重要嘅都係要張診斷書啫~我哋真係唔係claim保險嘅人,一心只掛住點樣食啲藥粉同埋要張診斷書,唔記得咗要單﹗﹗即係claim唔到保險啦,另一方面,我哋都驚訝於點解咁平﹗診金連藥費都係NT$450,我哋仲要係外國人,呢個價錢,我哋小學時代都唔止啦~真係搵食艱難~

成個晚上,曉都係燒下退下燒下退下,希望上飛機時冇燒啦~

呢間咁嘅motel,平平地都居然包早餐,質素當然冇得同之前住幾晚嘅酒店比啦,但都有中式有西式,我同day可以食飯,曉就可以繼續食佢嘅麵包,都算係咁~

臨走影下我哋間房,如果唔係有咩突發情況,恐怕都唔會再book呢類酒店⋯

好啦好啦,我哋終於可以上飛機返屋企啦﹗

去到機場精神少少~

叫做肯影下相~

又借到免費bb車~過去呢一年曉應該係呢兩日坐得最多bb車了,屋企自己架bb車都封晒塵咯,遲啲要拎出嚟抹下,預備俾bb坐呀~

流汗啦流汗啦,退緊燒啦~

我哋亦順利逃過一劫,冇係香港機場俾人捉去瑪嘉烈醫院隔離~我哋講笑咁講,要捉嘅話,可唔可以捉我哋去屯門醫院呀?起碼近啲丫﹗而家更好,可以返屋企了~

雖然係延長咗嘅五日假期,但一啲都唔暢快、一啲都唔歡樂,不過呢啲印象通常都會特別難忘,可能過咗10年之後,頭幾日好高興嗰啲行程唔記得晒,呢啲古靈精怪嘅奇遇就仲好印象深刻﹗曉呀,下次去旅行唔好病啦~知唔知道?

高雄之旅完滿結束

前往其他台灣旅遊blog

Comments

comments

發表迴響

你的電子郵件位址並不會被公開。 必要欄位標記為 *