夜晚曉瞓係我側邊時已經覺得佢熱熱地，佢半睡半醒時話同佢探熱食藥佢又話唔好，見隔一陣佢又瞓番我就由得佢先～到第二朝起身時探一探熱，真係發燒啦～day又話佢係胡暐二號啦，旅行時病﹗(請參閱：13-4-2012：首爾濟州櫻花遊day 6(part 2)．北村韓屋村)其實day 4定好嘅行程就只有一早係香港時book咗自助午餐，而其他嘅行程都係就住呢個buffet行程而設計，因為想曉食buffet時有精神，總之早上唔好玩得太盡太攰啦～不過而家病咗，我哋決定留係酒店休息直到check out時間，之後直接去自助餐嘅地方，病又好冇病又好，飯都總要食嘛(何況曉要搭尾班車唔駛錢食自助餐﹗)～
食完酒店早餐就返上房休息，其實個早餐我都盡量食得好小心，避免食得太飽，影響自助午餐嘅戰鬥力，係呀，三日之中我唯獨今日冇食到飯～但⋯好似都係食得唔夠少﹗另一方面，曉食咗退燒藥之後好似精神咗好多，返到房想瞓覺嘅反而係我哋兩個，曉就不停要我同佢睇書﹗﹗
我哋寄好行李係酒店櫃枱，就搭的士出發去訂咗枱嘅漢來大飯店，點解要去呢度食自助餐？應該有十幾年前同爹媽去高雄時，佢哋嘅舊同學帶我哋嚟呢度食自助餐，無敵大海景又靚，自助餐菜式又多又好味，年少無知嘅我第一次見識到爸媽舊同學嘅太太同刀叉嚟優雅地食蝦，我哋一家四口(而家四口變八口了，就快九口﹗:D)個個對嗰次嘅自助餐都印象深刻，原來家姐後來每一次去高雄都盡量安排去食一次呢個自助餐，今次都係佢推波助瀾叫我一定要再去食，我先上網搵到eztable可以預早book定枱～
我哋book咗12:00，去到時都係11:40左右，門口已經有人等緊位，果然好有人氣﹗我哋被安排嘅位其實都係靠近窗邊，但有條大柱擋住，睇唔到海景～果然係一早book好嘅枱，酒店已經貼心地預早放好bb櫈同埋兒童餐具～不過⋯病病豬曉唔肯自己坐，樹熊一樣黏住我，唯有派爸爸出去拎食物～
可能地方太大，食物種類太多，爸爸出咗去好耐(起碼我感覺好耐啦)，返嚟竟拎得一碗湯？﹗我問佢有咩食，佢都唔係好講得出，點會咁㗎(躁躁地)？﹗我決定自己出去一趟，好在曉肯拖住我俾我出去，哈，我明點解day講唔出有咩食了，因為佢哋嘅排列同香港唔係好同，香港or澳門嘅自助餐都係排列成好分明嘅一區區，冷盤沙律、凍海鮮、壽司、麵包&湯、熱盤、廚師現煮counter、甜品等等，但漢來嘅分佈同我哋嘅認知唔係好同，而且凍嘢/生嘢太多，其實唔係太啱大肚婆食～加上時間太早，我哋都唔係好餓，食物嘅吸引力大大降低，今次嚟咗三個蝕本貨，平時黑馬曉病病冇戰鬥力，大食嘅我同day都因為唔太餓，再加上我大住肚好多嘢唔食得，有少少意興闌珊，好可惜呀～曉就一直黏到實，只有短暫時間肯自己坐bb櫈，冇乜胃口嘅時候，吸引到佢食嘅只有幾樣最愛：芝士、西瓜汁、餅乾～我同day輪流陪佢睇書，我哋先有得食下嘢～
勉強的笑容⋯
嗲嗲曉～
今次嘅自助餐唔太暢快，其實只係揀我食得嘅嘢嚟食，而唔係好多樣食物之中揀我鍾意嘅嘢嚟食，好可惜呀～下次我哋兩個要餓住肚子+帶埋健康豬豬曉嚟，好好咁大吃特吃至得﹗
坐我哋附近有一個奇怪嘅女人，佢不停拎好多好多食物返嚟－－堆﹗﹗﹗好恐怖呀～佢只係食少少，但枱面就有好多「食物山」﹗而且搞到啲嘢好核突㗎～不過佢睇落唔係好正常，我諗waiter都唔敢走埋嚟叫佢唔好浪費食物，俾我就唔敢走埋去同佢講嘢～我係又八卦想望下佢，同時又覺得噁心⋯
酒店大堂好grand～
同day商量之後嘅行程，day 2去夢時代時知道大商場有得免費借bb車，不如我哋俾曉坐bb車休息，我哋逛下百貨公司啦～
我哋埋好單就去酒店附屬嘅漢神百貨，順利咁借到bb車，曉都肯坐，不過間百貨公司真係唔係太有趣～可能啲貨品太高級，根本冇乜客人，成間百貨公司靜英英，行咗兩層左右我都唔想行了～曉唔坐慣bb車，係車入面根本瞓唔著，佢想瞓覺時就要爸爸抱了，抱到瞓著咗，一放落去車度就醒，算啦，還番架車啦～
爸爸抱住曉瞓，我哋放好背囊係百貨公司嘅免費locker，決定搵個地方坐低飲杯嘢，俾佢瞓到醒為止～見到有間飲各式茶嘅小店有冷氣樓上雅座，就入去啦，派day去買嘢飲，點知嘢都未開始飲，曉就醒咗﹗﹗﹗仲要嗰杯檸檬茶勁澀勁難飲⋯>.<“我哋話，早知平平地係附近book間商務旅館休息幾個鐘都好啦，而家又辛苦周圍騰又休息唔到⋯
既然曉要坐低瞓覺，可能機場啲櫈仲闊仲舒服，不如提早去機場啦～我哋經酒店拎番行李，就好早好早去咗機場lu～七點幾嘅飛機，三點幾去到機場，應該係第一次吧？
可以網上book枱嘅eztable：
https://tw.eztable.com/search?q=
漢來大飯店：
待續
前往其他台灣旅遊blog