落咗的士，去到駁二時，曉已經瞓咗覺了，我哋首先要搵個地方坐低，等佢瞓完個覺先～其實駁二藝術特區非常之大，仲分散得好廣，之前做功課做得唔夠，都冇乜target，的士經過駁二嘅電影院，不如睇下會唔會咁啱有咩戲啱睇，可以一邊抱住佢瞓一邊睇，咁就最抵喇～睇一睇節目表，得兩套戲係差唔多時間開場，但睇落個名都有少少恐怖咁，完全唔係我哋嘅口味～算啦，永恒嘅抱瞓地點⋯梗係cafe啦﹗
原來的士司機放低我哋嘅係大勇區，我哋入咗去駁二誠品入面嘅twotwotogo，坐低就買咗兩杯飲品，好好休息一陣，坐下、飲下嘢、篤下電話，輕鬆地過咗一個幾鐘～
day飲咗好瘦嘅凍綠茶，我飲咗甜蜜蜜嘅果茶，有啲新鮮水果係裡面真係可以篤出嚟食㗎～
乜都睇完晒，點樣kill time？打下Candy Crush、Soda Crush、Jelly Crush⋯乜都得啦～
點解叫做cafe大豪客呢？因為曉瞓醒之後，我哋係度解決埋lunch～
瞓醒變咗可愛曉～
我哋再叫咗一個pasta、一份waffle、一份飛碟三文治，全部都好－－好－－味－－呀﹗賣相已經夠晒吸引啦，味道都好有水準～白汁嘅pasta同埋加咗cream同糖漿嘅waffle好難唔好食，但令我最驚喜嘅係飛碟三文治嘅side dish囉～個沙律嘅醬汁加咗鮮果嚟調，應該係熱情果吧，香甜嘅味道同蔬菜非常夾，而睇落似粟米片嘅其實係乳酪，乳酪加咗果醬又係yummy yummy～叫咗食物冇理由唔飲嘢，我哋又飲多杯走甜嘅茶同埋檸檬汁，但實在太飽了，飲品有少少太多添～
先一日去夢時代逛誠品逛得唔夠皮，今日可以再逛，其實都怕拎得太重都唔敢買，不過都揀咗一本大書俾曉，係可以教埋數數嘅故事書～食得飲得太多，我哋輪住要幫襯下廁所，誠品對面嘅廁所係半露天、天然採光嘅設計，感覺好開揚，仲要係全踎廁，感覺好大自然囉～我諗起嗰陣去斯里蘭卡時嘅無敵山景廁(請參閱：12-12-2012：斯里蘭卡day 5(part 1)．美麗早晨、出發Horton Plains)～
跟住我哋就周圍睇下啦～
實在無目的又無目標，固定展覽同臨時展覽都唔知有咩，是但啦，行到邊睇到邊啦～周圍好多好有特色嘅雕塑可以影下相，又有個手作市集，要星期六日先有得睇㗎～
有好多靚壁畫～今日記得拎自拍神棍出嚟用可以影下三人大合照～
cute～
見大勇區行得七七八八，我哋見有指示牌向大義區，不如又行過去睇下啦～吸住day嘅係一間科學主題嘅鋪頭，叫做賽先生科學工廠(Mr. Sci -> science個sci)，有好多有趣得嚟又好似冇乜用嘅產品^^”，我印象最深刻嘅係有週期表嘅水杯，如果要買，要買邊種元素？我當時第一個反應係calcium同iron，大家最怕會缺嘛(太多病人怕骨質疏鬆同埋貧血)，而家打blog時諗，點解唔想要gold呢？咪仲值錢？﹗哈～另一樣最深刻嘅係樓高四層嘅鋪頭由又窄又高嘅樓梯貫穿，行起嚟都一步一驚心，又要怕曉隻手仔周圍搞嘢要買啲唔想要嘅嘢返屋企～
反而更吸引我嘅係賽先生旁邊嘅甜品店，原來啲雪糕係用燈膽形狀嘅杯嚟裝住㗎，雖然我唔食得雪糕，我就慫恿兩父女食﹗
結果我哋三個揀嘅口味都一致呢，我話，燈膽梗係要配黃色雪糕啦，一係要芒果一係要菠蘿啦，day就提議睇下邊一款係店鋪人氣no.1，我抱起曉俾佢望啲雪糕，逐樣讀出嚟話佢知係咩嚟嘅，原來芒果牛奶雪糕一次滿足晒三個願望～
造型係幾靚，但day話味道就唔算太突出，平時去黃金海岸我哋鍾意幫襯嗰間Angelato啲雪糕好食啲，係咪香港人食得太多滿記同埋許留山，對於芒果味嘅甜品要求特別高？
咁好嘅？有洗手盆係旁邊，可以即刻洗乾淨個「燈膽」，帶番香港留念，雪糕係曉想食嘅，燈膽杯係我想要嘅，day？係幫手食杯雪糕嗰個囉～
我哋順便去埋同「燈膽雪糕」同系列嘅創意精品店同埋gallery～
入面環境好舒服，比起商品，曉寧願坐係窗台度玩，我哋又可以輪流休息一下～
難以分辨藝術品同商品～
3/F gallery有個影相位，好多道具俾你任玩～
day似乎好欣賞gallery啲圖畫呢，佢影咗好多張相喎～
係咪因為都係舊樓改建呢？啲樓梯都好窄呢～
舒適寛闊嘅環境～
可以輕鬆散步去～
驚唔驚？
周圍嘅房屋都被髹滿壁畫，全部都變成藝術品了﹗
行去大義區之前經過碼頭，時間都晏晏地，我哋唔打算搭船了，不過呢度可以買駁二手環，即是任入展館嘅入場券，其實都唔知多唔多嘢想睇，不過買咗先啦～
曉好鍾意呢個碼頭入面嘅「魚檔」～
手環成功購入﹗既然買咗⋯一定要睇三兩個展館丫﹗
有啦有啦，有輕軌經過啦～
今日曉嘅狀態麻麻地，成日都要爸爸抱住，其實開始到五六點佢都幾乎唔肯行，辛苦爸爸了～我哋結果都有入到展館，印象比較深刻嘅一個係關於漫畫嘅展覽，叫做動漫倉庫－－
我哋都鍾意睇漫畫，但對於「畫漫畫」呢件事，了解得比較多嘅應該係嚟自《爆漫》呢套漫畫吧(未睇過可以睇下呀，幾好睇)，今次嘅展覽用更學術嘅眼光去解構點樣畫漫畫～
畫漫畫唔係單純嘅畫公仔，故事嘅建構、世界觀、人物服裝、場景同道具、故事嘅敍述、情感嘅表達，原來好多嘢要考慮，又有好多技巧，難怪漫畫嘅產量咁多，但真正出名嘅人氣漫畫唔係真係咁多，就係高手同低手嘅分別～
兩父女去砌下啲眼耳口鼻先～
另外又睇咗啲較現代風格嘅畫展～
具體啲、故事性強啲嘅就睇得明白啲，太抽象嘅就水過鴨背，睇完就馬上係腦海消失了～一個gallery入面有多個藝術家同時展出作品，門口放咗佢哋啲咭片係度，我揀咗一張可愛嘅俾曉曉拎住嚟玩～
好精細嘅畫工，重現咗高雄舊時嘅小店鋪～
有個好有型嘅鞦韆，但曉已經冇力冇興緻去排隊玩了～
大家都攰啦，曉？我覺得佢應該要瞓多一覺先至食晚餐會好啲囉⋯
駁二藝術特區官方網站：
http://pier-2.khcc.gov.tw/home01.aspx?ID=1
賽先生科學工廠：
待續
前往其他台灣旅遊blog