離開駁二時我又好攰，曉又好攰，我覺得如果曉唔瞓一覺嘅話晚飯會有啲問題，我哋決定搵個地方坐低俾佢好好瞓一覺，之後先再去晚飯～咦，有一間大大地嘅便利店喎，有得坐低食嘢嗰啲，入面仲可以涼住冷氣，最裡面嘅位啲櫈仲有靠背添，可以慢慢坐，我攬住曉哄佢瞓覺，day就去睇下買啲咩叫做幫襯下～day買完朱古力奶同埋薯片返嚟曉都未瞓著，即是我哋冇得㗩㗩㗩住～播咗好多歌又轉咗好多姿勢，搞咗好耐又差唔多到晚飯時間，佢都唔瞓覺，媽媽投降了﹗
我哋搭的士直接去到城市光廊～城市光廊我都唔係第一次去lu，應該係中學時同爸媽去高雄嗰次有去過，今次呢個trip之中打算去嘅夜晚景點，我係舊嘅城市光廊同埋新嘅愛河之心之間，揀咗去我已經去過嘅城市光廊，因為我知道曉一定會鍾意﹗
落咗車見到第一樣嘅嘢係，有人街頭表演，原來係一班後生仔女，帶晒結他、鼓、音響等出嚟夾band，仲要有班自己人fans捧佢哋場，好熱鬧咁～一向睇啲藝人、youtube channel、facebook fan page等，好似見過好多好有才氣嘅台灣音樂人，點知原來學藝未精嘅台灣小伙子，其實同香港文化中心附近嗰啲充滿熱情嘅香港小伙子都冇乜分別，都係有啲⋯難聽﹗我哋每次經過時要急急腳行過先得⋯你哋要加油呀﹗其實呢，帶埋amp出嚟同大家分享音樂之前，可以係band房夾多啲先㗎～^^”
一pat攰攰曉開頭冇乜心機影相，只係伏係爸爸身上(但又唔肯瞓覺﹗﹗)～
你唔影長頸鹿？我哋唔理你啦～
但一去到彩色燈光嘅「天橋」，成個即刻興奮晒﹗來回跑跑跑跑跑好多次都唔夠～
來回跑﹗
我返嚟啦～
同爸爸跑都好開心～
藍色都幾靚丫～
而家睇番啲相先知道曉原來學我～
城市光廊旁邊就係中央公園，呢度係休息嘅好地方～
玩咩？我哋踩住啲燈﹗
warm up咗嘅曉就肯周圍影相啦～
雖然話城市光廊嘅夜景boost咗曉嘅energy一下，但之後當然會換嚟更加攰啦，所以我都有啲心急要去食晚飯～
我哋經過捷運站嘅隊道過馬路，呢個中央公園站好大好靚呢～長長嘅扶手電梯非常有氣勢～
開始落少少雨，我哋就更加狼狽了～day抱住曉，我拎住遮同揹背囊，希望可以盡快搵到適合嘅餐廳坐低～一邊行一邊都不停講：「睇落嗰邊好似多啲機會有餐廳喎～」咁行咗好多個街口，終於揀咗間日本拉麵店坐低咗～其實我哋都唔係好高要求啫，希望可以坐得稍稍舒服少少就好了～
坐得舒服﹗估唔到有bb櫈呢～
點解標題係「私人拉麵店」？因為我哋去到時得一枱客人食緊，我哋坐低冇耐佢哋都埋單走埋添lu～所以成間鋪頭得我哋三個客人﹗似乎台灣人真係比較早食飯，午餐同晚餐都係，我哋八點幾食，可能差唔多打烊先咁少人～我哋day 4 book咗自助午餐嘛，只可以揀11:30或者12:00入座，可想而知佢哋係比較早食飯～
拉麵店好似日本咁，要用自助點餐機，好似買汽水咁自己入錢同埋揀食物，不過有個waitress係度幫我手落order，咁⋯點解唔佢負責點餐？我哋叫咗兩個拉麵同埋一碟餃子，店員見我哋帶住小朋友，佢都好貼心咁問我哋駛唔駛加底，以曉嘅(眼瞓)狀態嚟講，佢嘅食量真係唔太樂觀，我哋都係小心為上～
我食嘅雞湯拉麵同埋day食嘅豬骨湯拉麵，兩款都好有水準喎，夠香濃得嚟又唔會太膩，調味唔會太鹹，食得好舒服，拉麵入面舊雞就腍到不得了，好味～餃子就中規中矩啦～飲得太多甜嘢，我哋都冇叫飲品，餐廳供應沿沿不絕嘅凍水以大熱天時嚟講實在太好了～
食飽飽，曉又好似冇攰得咁緊要，我哋身處嘅位置其實同酒店都幾近，搭捷運返去啦﹗搭的士嘅話仲易瞓著﹗﹗出咗去成日，曉，要沖涼先得呀～
係捷運站見到呢間美容院嘅treatment menu，每一次經過時都要問一次，究竟邊個會去做「臀部除痘」呢？﹗如果要靠個pat pat嚟搵食嘅話，除咗痘都有疤痕，個pat都唔夠白滑，都係冇乜競爭力，但普通人個pat pat又唔駛見人，連自己都同佢好少見面⋯點解要除痘？﹗諗極都唔明～
不過落咗捷運之後，要不停用唔同嘅方法吸引佢行路返酒店，包括要用奇怪嘅步姿嚟行等佢扮我啦，仲要匿埋係柱後面等佢追上嚟啦，要幫佢沖個涼先瞓真係要鬥智鬥力呀～
待續
前往其他台灣旅遊blog